سەمەيدە قاراۋسىز جاتقان كارىز قۇدىقتارى تۇرعىندارعا ءقاۋىپ ءتوندىرىپ تۇر. سەبەبى، بەتى اشىق قۇدىقتاردىڭ يەسى دە جوق بولىپ شىقتى.
ايتا كەتەرلىگى، قالا اكىمىنىڭ ەسەپتىك كەزدەسۋىندە تۇرعىندار اشىق ءارى قاراۋسىز جاتقان سۋ قۇبىرلارى مەن كارىز قۇدىقتارىنىڭ تۇرعىندار مەن كولىكتەر ءۇشىن ءقاۋىپتى ەكەنىن ايتقان بولاتىن. وسىعان بايلانىستى اكىمنىڭ تاپسىرماسىمەن ارنايى كوميسسيا قۇرىلىپ، قاراۋسىز جاتقان قۇدىقتارعا تەكسەرۋ جۇرگىزدى. ناتيجەسىندە 45 يەسىز قۇدىق انىقتالدى.
«ازىرگە كوميسسيا انىقتاعان 45 يەسىز قۇدىققا قاتىستى قاۋىپسىزدىك شارالارىن جۇزەگە اسىردى. ينۆەنتاريزاسيادان سوڭ، قاراۋسىز قالعان قۇدىقتار «زەلەنستروي» مەملەكەتتىك كوممۋنالدىق كاسىپورنىنا تاپسىرىلادى. قارجى قاجەت بولسا بولەمىز. ماسەلە كوپ ۇزاماي شەشىلەدى. بۇل باعىتتاعى جۇمىستار ءالى دە جالعاساتىن بولادى» - دەدى قالا اكىمى ەرماك ءسالىموۆ.
ماماندار قاراۋسىز جاتقان يەسىز قۇدىقتاردىڭ ءالى دە بار ەكەنىن العا تارتادى. سوندىقتان، ولاردى انىقتاۋ جۇمىستارى جالعاسادى. ويتكەنى، ونداي اشىق-شاشىق قۇدىقتار ادام ومىرىنە ءقاۋىپتى. مىسالى، بىلتىر قاراشا ايىندا 6 جاسار بالا يتىمەن سەرۋەندەۋگە شىعىپ، سول كۇيى ۇيىنە ورالماعان ەدى. ال دەنەسىن اشىق جاتقان كارىز قۇدىعىنان ءولى تاپقان بولاتىن. ءبىراق قايعىلى وقيعادان كەيىن قۇدىقتىڭ قاي مەكەمەنىڭ بالانسىندا ەكەنى انىقتالمادى.
بەلگىلى بولعانداي، سەمەيدە ەڭ كوپ كارىز قۇدىعى «قازاقتەلەكومعا» تيەسىلى ەكەن.
