وڭتۇستىك قازاقستان وبلىسىنىڭ تۇركىستان قالاسىندا ەسىمى ەرەكشە ازامات تۇرادى جانە ول ءقازىر سوتتالىپ جاتىر. بۇل تۋرالى Qamshy.kz اقپارات اگەنتتىگى Otyrar.kz پورتالىنا سۇيەنىپ جازدى. 36 جاستاعى اقپانتوقپانتۇرارقوجا جانبەكوۆ بوتەننىڭ مۇلكىن تالان-تاراجعا سالدى دەپ ايىپتالۋدا.
تەرگەۋ ماتەريالدارىنان بەلگىلى بولعانداي، ەر ازامات بىلتىر ماۋسىم ايىندا قالالىق ەمحانادا مەحانيك قىزمەتىندە ءجۇرىپ، ءوزىنىڭ لاۋازىمىن پايدالانىپ، سەنىپ تاپسىرىلعان ءىرى كولەمدەگى بوتەننىڭ مۇلكىن تالان-تاراجعا سالعان. كەيىن بۇل قىلمىسىن ول جالعان قۇجات جاساۋ ارقىلى جاسىرماق بولعان ەكەن. اتاپ ايتقاندا، اقپانتوقپانتۇرارقوجا قۇنى 1 ملن 200 مىڭ تەڭگەدەن اساتىن كولىك جانارمايىن جاراتىپ جىبەرىپتى.
كۇدىكتى ءوز كىناسىن تولىقتاي مويىنداپ، پروكۋرورمەن پروسەسۋالدىق كەلىسىمگە كەلۋگە ءوتىنىش بەرىپ وتىر. سوت ۇكىمى ەندى شىعادى.
ايتا كەتەيىك، اقپانتوقپانتۇرارقوجا جانبەكوۆتىڭ ەسىمى قازاقستاندىقتارعا 2013 جىلى بەلگىلى بولعان ەدى. بازبىرەۋلەر ونىڭ جەكە كۋالىگىن سۋرەتكە ءتۇسىرىپ، الەۋمەتتىك جەلىلەرگە تاراتىپ جىبەرگەن.
