بۇگىن جەزقازعان قالاسىندا حالىق شىعارماشىلىعى مەن كوركەمونەرپازدار ونەرىنىڭ «ۇلىتاۋ ءۇنى» ءححۇىىى ايماقتىق فەستيۆالى باستالدى، دەپ حابارلايدى Qamshy.kz اقپارات اگەنتتىگى. 

فەستيۆالدىڭ اشىلۋ سالتاناتىنا جەزقازعان قالاسى اكىمىنىڭ ورىنباسارى زينا اقىلبەكوۆا قاتىسىپ، قۇتتىقتاۋ ءسوز سويلەدى.

– «ۇلىتاۋ ءۇنى» فەستيۆالى – تالاي ءدۇلدىلدىڭ باعىن اشىپ، جۇلدىزىن جاققان ونەر بايگەسى. ءداستۇرلى تۇردە وتەتىن فەستيۆال ايماعىمىزدىڭ رۋحاني ومىرىندە ايرىقشا ورىن يەلەنەدى. جەزقازعان-ۇلىتاۋ ايماعىنىڭ باستى ونەر فەستيۆالىنىڭ اشىلۋىمەن شىن جۇرەكتەن قۇتتىقتايمىن، - دەدى ز. اقىلبەكوۆا ءوزىنىڭ قۇتتىقتاۋ سوزىندە.

فەستيۆال اياسىندا «ارۋ قالام – استانام» اتتى قولونەر شەبەرلەرىنىڭ كورمە بايقاۋى، ۇلى كۇيشى قۇرمانعازى ساعىرباي ۇلىنىڭ 200 جىلدىعىنا ارنالعان كۇيشىلەر سايىسى، ماعجان جۇمابايەۆتىڭ تۋعانىنا 125 جىل تولۋىنا وراي «ماعجاننان قالعان مارجان جىر» كوركەمسوز وقۋ شەبەرلەرىنىڭ بايقاۋى، مادەنيەت قايرەتكەرى، جەزقازعان قالاسىنىڭ قۇرمەتتى ازاماتى مورلىبەك مۇراتبايەۆتى ەسكە الۋعا ارنالعان «جىلدار مەن جولدار» كەشى، «جۇلدىز – 2018» ايماقتىق ءان بايقاۋى ونەر سۇيەر قاۋىمعا قۋانىش سىيلاماق. 

قازاقستان رەسپۋبليكاسىنىڭ ەلورداسى استانا قالاسىنىڭ 20 جىلدىعى اياسىندا ۇيىمداستىرىلىپ وتىرعان ونەر مەرەكەسى 22-24 اقپان ارالىعىندا وتەدى.