ەلباسى، «نۇر وتان» پارتياسىنىڭ ءتوراعاسى نۇرسۇلتان نازاربايەۆتىڭ شەشىمىمەن تامارا دۇيسەنوۆا پارتيا حاتشىسى قىزمەتىنە تاعايىندالدى، دەپ جازادى Qamshy.kz اقپارات اگەنتتىگى پارتيا سايتىنداعى اقپاراتقا سۇيەنىپ.
بۇگىن «نۇر وتان» پارتياسى ءتوراعاسىنىڭ ءبىرىنشى ورىنباسارى ماۋلەن اشىمبايەۆ ورتالىق اپپارات ۇجىمىنا پارتيانىڭ جاڭا حاتشىسىن تانىستىردى. ماۋلەن اشىمبايەۆ تامارا دۇيسەنوۆانىڭ مەملەكەتتىك قىزمەتتە جانە باسشىلىق لاۋازىمدا تاجىريبەسى باي ەكەنىن ەرەكشە اتاپ ءوتتى. سونداي-اق ول ەلباسىنىڭ پارتيا قىزمەتىن جاڭعىرتۋ جونىندەگى تاپسىرماسىن جۇزەگە اسىرۋعا جاڭا حاتشىنىڭ ۇلكەن ۇلەس قوساتىنىنا سەنىم ءبىلدىردى.
– ءسىزدىڭ الەۋمەتتىك سالاداعى باي تاجىريبەڭىز پارتيا جۇمىسىنا يگى اسەرىن تيگىزەدى دەپ ەسەپتەيمىن. سەبەبى، الەۋمەتتىك ماسەلەلەردى شەشۋ «نۇر وتان» پارتياسىنىڭ باسىم باعىتتارىنىڭ ءبىرى بولىپ سانالادى. ءسىزدىڭ پارتيا قاتارىنا كەلۋىڭىزبەن وسى باعىتتاعى جۇمىسىمىزدى ودان ءارى كۇشەيتەمىز دەپ سەنەمىن، – دەدى ماۋلەن اشىمبايەۆ.
تامارا قاسىم قىزى دۇيسەنوۆا 1965 جىلى 11 قاڭتاردا وڭتۇستىك قازاقستان وبلىسىندا تۋعان. تاشكەنت حالىق شارۋاشىلىعى ينستيتۋتىن بىتىرگەن. ەكونوميكا عىلىمدارىنىڭ كانديداتى. ءار جىلدارى ول جاۋاپتى باسشىلىق قىزمەتتەردى ابىرويمەن اتقاردى. اتاپ ايتقاندا، شىمكەنت قالاسى اكىمىنىڭ ءبىرىنشى ورىنباسارى، وڭتۇستىك قازاقستان وبلىسى اكىمىنىڭ ورىنباسارى، ەڭبەك جانە الەۋمەتتىك قورعاۋ مينيسترلىگىنىڭ جاۋاپتى حاتشىسى، ۆيسە-مينيسترى، دەنساۋلىق ساقتاۋ جانە حالىقتى الەۋمەتتىك قورعاۋ ءمينيسترى، ەڭبەك جانە حالىقتى الەۋمەتتىك قورعاۋ ءمينيسترى بولىپ جۇمىس ىستەدى.
پىكىر قالدىرۋ