قاراعاندىدا بالالار كيىمدەرىنەن ۋلى زات تابىلدى. كۇرتەلەر، جەيدەلەر مەن بەلدەمشەلەر، ءتىپتى، جاڭا تۋعان نارەستەلەرگە ارنالعان يت كويلەكتەردەن دە ءقاۋىپتى گاز – فورمالدەگيد انىقتالعان. بۇل تۋرالى وبلىستىق قوعامدىق دەنساۋلىق ساقتاۋ دەپارتامەنتىنىڭ وكىلدەرى مالىمدەدى، دەپ حابارلايدى Qamshy.kz اقپارات اگەنتتىگى astanatv.kz. 

«بۇل كيىمدەردىڭ بارلىعى قىرعىزستاننان اكەلىنگەن. كاسىپكەرلەر ولاردى الماتى، بىشكەك قالالارىنىڭ بازارلارىنان تاسيدى. ولاردىڭ قۇرامىندا فورمالدەگيدتىڭ مولشەرى وتە جوعارى. بۇل بالالارىمىزدىڭ دەنساۋلىعىنا ۇلكەن ءقاۋىپ توندىرەدى. ادامنىڭ دەنەسىنە بىرتىندەپ ءسىڭىپ، اۋىر دەرتتەرگە شالدىقتىرادى»، — دەيدى قاراعاندى وبلىستىق قوعامدىق دەنساۋلىق ساقتاۋ دەپارتامەنتى باسشىسىنىڭ ورىنباسارى يۋريي زالىگين. 

سانيتارلاردىڭ ايتۋىنشا، ۋلى زات تىنىس الۋ جولدارى مەن جۇيكە جۇيەسىن زاقىمدايدى. كوز، تەرى اۋرۋلارىنا شالدىقتىرادى. سوندىقتان ماماندار اتا-انالارعا ءيىسى وتكىر كيىمدەردى ساتىپ الماۋعا كەڭەس بەرەدى. ويتكەنى قىرعىزستاندىق كيىم ساۋداسىنا توسقاۋىل قويۋ مۇمكىن بولماي وتىر. 

2017 جىلى تەكسەرۋلەر ناتيجەسىندە 40-قا جۋىق كاسىپكەرگە ەسكەرتۋ جاسالىپ، 2 ميلليون تەڭگەدەن استام ايىپپۇل سالىنعان. الايدا، جوسپاردان تىس تەكسەرۋگە ىلىكپەگەن ساۋدا نۇكتەلەرى جەتەرلىك. ماماندار ساۋداگەرلەر كيىمدەر تۋرالى اقپاراتتارعا، وندىرىلگەن ورنى مەن ماتا قۇرامىنا ءمان بەرمەيتىنىن ايتادى. كوپشىلىگىندە ساپا سەرتيفيكاتى دا جوق بولىپ شىققان.