بۇگىن الماتى قالاسى تۇركسىب اۋدانىنىڭ قورعانىس ىستەرى جونىندەگى باسقارماسىنىڭ مۇرىنبىق بولۋىمەن 83 مەكتەپ-گيمنازياسىندا "ەرلىك - ۇرپاققا ۇران" تاقىرىبىندا ەرلىك ساباعى وتكىزىلدى. ساباقتا پاتريوتيزمگە ەرەكشە كوڭىل ءبولىندى، دەپ جازادى Qamshy.kz اقپارات اگەنتتىگى.

اتالعان شاراعا 83 مەكتەپ-گيمنازياسىنىڭ ديرەكتورى نۇرعالييەۆا اجار عازيز قىزى، مەكتەپ ديرەكتورىنىڭ ورىنباسارى كازانسيەۆا ۆەرا ۆيكتوروۆنا، العاشقى اسكەري دايىندىق ءپانىنىڭ ءمۇعالىمى، اۋعان سوعىسىنىڭ ارداگەرلەرى، مەكتەپ وقۋشىلارى قاتىستى. مەكتەپ ديرەكتورى نۇرعالييەۆا اجار عازيز قىزى: "پاتريوت دەگەنىمىز – وتانىن، حالقىن، جەرى مەن سۋىن شىنايى سۇيەتىن، حالىق مۇددەسى ءۇشىن بار كۇش-جىگەرىن، قابىلەتىن ايامايتىن ادام.

سونىمەن بىرگە ءوز وتانىن، حالقىن شەكسىز سۇيە وتىرىپ، بارشا كۇش-جىگەرىن وتان مۇددەسىنە ارناعان ادامعا ءتان تەرەڭ سەزىم" دەپ ءوز ويىن ايتتى. شارا بارىسىندا قازاقستان رەسپۋبليكاسى پرەزيدەنتى ن.نازاربايەۆتىڭ "قازاقستان – 2050" ستراتەگيالىق باعدارلاماسىنداعى ەلىمىزدىڭ ۇلتتىق قاۋىپسىزدىگى مەن تاۋەلسىزدىگىن، ەگەمەندىگىن تانىتۋ تۋرالى قادامدارى تالقىلانىپ، جاستار ءپاتريوتيزمنىڭ قالىپتاسۋىنا نازار اۋدارىلدى اسىرەسە، پاتريوتيزم - ءدال بۇگىنگى شاقتا كوتەرىلىپ وتىرعان ماڭىزدى ماسەلەلەر قاتارىندا جاستاردى پاتريوتتىق سەزىمگە باۋلىپ، ءوسىرۋ وزەكتى سانالادى.

تاعى ايتىپ كەتەتىن بولساق، الماتى قالاسى تۇركسىب اۋدانىنىڭ قورعانىس ىستەرى جونىندەگى باسقارماسى، الماتى قالاسى تۇركسىب اۋدانىنىڭ اكىمدىگى مەكتەپتەرمەن تىعىز بايلانىس جاساپ، ۇنەمى بىرگە جۇمىس اتقارىپ كەلەدى.