نۇرلان ەرمەكبايەۆ قوستاناي وبلىسىنىڭ زيالى قاۋىم وكىلدەرىمەن ەلباسى جولداۋىنىڭ باسىم باعىتتارىن تالقىلادى، دەپ جازادى Qamshy.kz اقپارات اگەنتتىگى ق ر ءدىن ىستەرى جانە ازاماتتىق قوعام مينيسترلىگىنىڭ باسپا ءسوز قىزمەتىنە سىلتەمە جاساپ.

23 اقپان كۇنى قوستاناي وبلىسىنا جۇمىس ساپارى بارىسىندا ق ر ءدىن ىستەرى جانە ازاماتتىق قوعام ءمينيسترى نۇرلان ەرمەكبايەۆ ازاماتتىق قوعام، عىلىم جانە شىعارماشىلىق ينتەلليگەنسيا وكىلدەرىمەن، جوعارى وقۋ ورىندارىنىڭ ستۋدەنتتەرىمەن كەزدەستى.

كەزدەسۋ بارىسىندا نۇرلان ەرمەكبايەۆ مەملەكەت باسشىسى ن.ءا.نازاربايەۆتىڭ «ءتورتىنشى ونەركاسىپتىك ريەۆوليۋسيا جاعدايىنداعى دامۋدىڭ جاڭا مۇمكىندىكتەرى» اتتى قازاقستان حالقىنا جولداۋىنىڭ نەگىزگى باعىتتارى جايىندا حاباردار ەتتى.  

ءمينيستردىڭ ايتۋىنشا، جولداۋدا الەمدىك ەكونوميكانىڭ ەرەكشەلىكتەرىنە ەلىمىزدىڭ تابىستى بەيىمدەلۋى ءۇشىن 2018 جىلى شەشىلۋى قاجەت ناقتى مىندەتتەر قويىلعان. ونىڭ ىشىندە، جاڭا تەحنولوگيالاردى، ەكونوميكالىق الەۋەتتى جانە ينفراقۇرىلىمدى، مەملەكەتتىك باسقارۋ جانە ادامي كاپيتالىن دامىتۋ سالاسىندا 10  مىندەت بەلگىلەنگەن. 

مينيستر ءدىن سالاسىنداعى مەملەكەتتىك ساياساتتىڭ، ازاماتتىق قوعام جانە جاستار ساياساتى سالالارىنىڭ نەگىزگى باسىمدىقتارى جايلى ايتتى.

«ءدىن سالاسىنداعى مەملەكەتتىك ساياساتتىڭ شارالارى كەلەسى  باسىمدىقتارعا باعىتتالعان. بىرىنشىدەن، ازاماتتاردىڭ قۇقىقتارى مەن بوستاندىقتارىن ساقتاۋدا ءدىندى دەسترۋكتيۆتى ماقساتتاردا پايدالانۋعا جول بەرمەۋ.  ەكىنشىدەن، ءدىني قاتىناستاردا زاڭدى جۇمىس جاسايتىن سۋبەكتىلەردىڭ  مۇددەلەرىن قورعاۋ. ۇشىنشىدەن، كوپەتنوستى مەملەكەتتەگى تىنىشتىقتىڭ كەپىلى بولىپ تابىلاتىن مەملەكەتتىڭ زايىرلى نەگىزدەرىن ساقتاۋ»، - دەپ اتاپ ءوتتى ن. ەرمەكبايەۆ.

ءدىن ىستەرى جانە ازاماتتىق قوعام ءمينيسترى ءدىن ماسەلەلەرى تۋرالى زاڭ جوباسىنىڭ كەيبىر ماڭىزدى ەرەجەلەرىنە  توقتالىپ ءوتتى.

«مەملەكەتتiك قىزمەتشiلەرگە قىزمەت بابىن ءوزىنىڭ نەمەسە باسقالاردىڭ  ءدىني مۇددەلەرىنە پايدالانۋعا جول بەرمەۋ جونىندەگى  تالاپتار ناقتىلانۋدا.  جوبامەن بۇعان دەيىن ونسىز دا مەملەكەتتىك قىزمەتشىلەردىڭ ادەپ كودەكسىندە قاراستىرىلعان تەك ءۇش شەكتەۋ عانا ەنگىزىلەدى. الايدا بۇل شەكتەۋلەر مەملەكەتتىك قىزمەتكە كىرۋگە، قۇدايعا سەنۋ نەمەسە مەشىتكە، شىركەۋگە بارۋ قۇقىعىنا اسەر ەتپەيدى»، - دەپ ءتۇسىندىردى ن. ەرمەكبايەۆ.

ازاماتتىق قوعاممەن ءىس-قيمىل سالاسىندا «كوممەرسيالىق ەمەس ۇيىمداردىڭ قىزمەتى تۋرالى زاڭنامالىق اكتىلەرگە وزگەرىستەر ەنگىزۋ تۋرالى» زاڭ جوباسى دايىندالدى. زاڭ جوباسىنىڭ ماقساتى - مەملەكەتتىك الەۋمەتتىك تاپسىرىستى بارىنشا ساپالى جانە ءتيىمدى ەتۋ.

نۇرلان ەرمەكبايەۆ ءتۇرلى وڭىرلەر مەن  اۋىلدىق جەرلەردەگى  ۇكىمەتتىك ەمەس ۇيىمداردى، جاستار ۇيىمدارى مەن ءدىني قىزمەتكەرلەردى قولداۋ ماقساتىندا جاڭا جوبالار جۇزەگە اسىرىلىپ جاتقاندىعىن اتاپ ءوتتى.

«ماسەلەن،  مينيسترلىك قازاقستان مۇسىلماندارى ءدىني باسقارماسىمەن بىرلەسىپ، وتكەن جىلى «ۋاقىپ» قايىرىلىمدىلىق قورىن قۇردى. قور شالعاي ەلدى-مەكەندەردە تۇراتىن جانە ماتەريالدىق تۇرعىدا كومەككە ءزارۋ 300-دەن استام ءدىني قىزمەتكەرلەرگە كومەك كورسەتىپ ۇلگەردى. «ۋاقىپ» قورى  اقتوبە تۇرعىندارىنىڭ الەۋمەتتىك وسال توپتارى ءۇشىن ارنايى سالىنىپ جاتقان 4 قاباتتى تۇرعىن ءۇي قۇرىلىسىنا قولداۋ كورسەتۋدە. سونداي-اق، قايىرىمدىلىق قورى وسى ايدا الماتى وبلىسىنىڭ تۇرگەن اۋىلىندا ورتەنىپ كەتكەن  پراۆوسلاۆ شىركەۋىن قالپىنا كەلتىرۋ جۇمىستارى ءۇشىن قارجى ءبولىندى. بۇل قور تاراپىنان كورسەتىلەتىن كومەكتىڭ از عانا بولىگى»، - دەپ اتاپ ءوتتى ن. ەرمەكبايەۆ.

مينيستر قوستاناي وبلىسى قوعامدىق كەڭەستەرىنىڭ بەلسەندى جۇمىسىن ەرەكشە اتاپ ءوتتى.

«قوستانايلىقتار قوعامدىق كەڭەستەردىڭ جۇمىسىنداعى وزەكتى ماسەلەلەردى شەشۋ ءۇشىن كوپتەگەن ۇسىنىستار ءبىلدىرىپ جاتىر جانە ءبىزدىڭ سەمينارلارىمىزعا تۇراقتى تۇردە قاتىسىپ وتىرادى... وسى تۇرعىدا اۆستريالىق فيلوسوف پول كارل فەيەرابەندتىڭ: «ازاماتتىق قىزمەت - بۇل قوعامداعى ەركىن ازاماتتاردىڭ ەڭ ۇزدىك جانە جالعىز مەكتەبى» -دەگەن ءسوزىن اتاپ وتكىم كەلەدى»- دەدى نۇرلان ەرمەكبايەۆ.

جولداۋدى جۇزەگە اسىرۋ شەڭبەرىندە ءدىن ىستەرى جانە ازاماتتىق قوعام مينيسترلىگى ەلىمىزدىڭ بەلسەندى ازاماتتارىمەن بىرلەسىپ «رۋحاني جاڭعىرۋ» اياسىندا «اتامەكەن» شاعىن باعدارلاماسىن ىسكە اسىرۋدا. 

ن. ەرمەكبايەۆتىڭ ايتۋىنشا، قوستاناي وبلىسىنىڭ كاسىپكەرلەرى «اتامەكەن» شاعىن باعدارلاماسىن ىسكە اسىرۋعا بەلسەندى قاتىسۋدا.  ءوڭىر كاسىپكەرلەرى زاتوبولسك ەلدى-مەكەنىندە جالپى قۇنى 38 ملن. تەڭگەنى قۇرايتىن قارجىعا تۇرعىن ۇيلەر اۋلالارىن جاڭارتىپ، اباتتاندىرۋ جۇمىستارىن جۇرگىزگەن. قامىستى اۋدانىنداعى قاراباتىر اۋىلىنىڭ تۇرعىنى م.قۇدايقۇلوۆ اۋىلدىق مادەنيەت ءۇيىنىڭ عيماراتىن جوندەۋدەن وتكىزدى، ال سارىكول اۋىلىندا كاسىپكەرلەر ەسەبىنەن سپورت زال كەشەنى قالپىنا كەلتىرىلگەن.

جاستار ساياساتى سالاسىندا «رۋحاني جاڭعىرۋ؛ بولاشاققا باعدار» باعدارلامالىق ماقالاسىنىڭ شەڭبەرىندە مەملەكەتتىك جاستار ساياساتى تۇجىرىمداماسىن جۇزەگە اسىرۋ جونىندەگى جوسپار جاڭارتىلدى.  جوسپارعا ەنگەن ءىس-شارالاردا جۇمىسپەن قامتۋ، وتباسىلىق قۇندىلىقتاردى دامىتۋ، جاستار ۇيىمدارىن قولداۋ، كاسىپكەرلىك پەن ەرىكتىلەر قىزمەتى جۇيەلەلەرىن جەتىلدىرۋ ماسەلەلەرى ەسكەرىلگەن.

جۇمىس ساپارى بارىسىندا ءدىن ىستەرى جانە ازاماتتىق قوعام ءمينيسترى  قوستاناي وبلىسىنىڭ اكىمى ارحيمەد مۇحامبەتوۆتىڭ حالىق الدىنداعى  ەسەپتىك كەزدەسۋىنە قاتىستى، سونداي-اق ۇكىمەتتىك ەمەس ۇيىمداردىڭ  رەسۋرستىق ورتالىعىنا، «سارىارقااۆتوپروم» ج ش س، ىبىراي التىنسارين مەموريالدى كەشەنىنە، شاقشاق جانىبەك قوشقار ۇلى ەسكەرتكىشىنە جانە «ايماعانبەت قاجى سپان ۇلى» اتىنداعى وبلىستىق مەشىتكە بارىپ، ارالادى.