2018 جىلدىڭ 26 اقپانىندا  قازمەديا ورتالىعىنىڭ 5ء-شى ستۋدياسىندا “قازاقستان” رترك اق باسقارما ءتوراعاسى ەرلان قارين  ۇلتتىق ارنانىڭ كوكتەمگى تەليەۆيزيالىق ماۋسىمىمەن تانىستىرىپ، جاڭا جوبالارى جايلى ايتىپ، 2017 جىلدىڭ نەگىزگى جەتىستىكتەرىن اتاپ ءوتتى. بۇل تۋرالى Qamshy.kz اقپارات اگەنتتىگى حابارلايدى.

   قازاقتىڭ ءتول ونەرىن دارىپتەيتىن “مەن قازاقپىن” حالىقارالىق مۋزىكالىق جوباسى مەن 8 مەملەكەتتە تىكەلەي ترانسلياسيا ارقىلى كورسەتىلگەن “SilkWayStar” مەگاجوباسى كورەرمەندەر اراسىندا جوعارى باعالانىپ،  وتكەن ماۋسىمنىڭ باستى جاڭالىعى بولدى.

  سونداي-اق، 2017 جىلى “پاراسات مايدانى”، “1ستۋديا”، “باستى تاقىرىپ”، “ماسەلە”، “ەلدەن حابار” جانە ت.ب قوعامدىق-ساياسي جانە اقپاراتتىق-ساراپتامالىق جوبالاردىڭ سانى ارتىپ، كورەرمەنگە جول تارتتى. 

سونىمەن قاتار، ۇلتتىق ارنا مەملەكەتتىك ماڭىزى جوعارى تۇسىرىلىمدەر مەن تىكەلەي ترانسلياسيالاردى جۇزەگە اسىردى. اتاپ ايتساق،  2017 جىلعى قىسقى ۋنيۆەرسيادا، اسكەري شەرۋ، حالىقارالىق مامانداندىرىلعان “استانا ەكسپو-2017” كورمەسىنىڭ اشىلۋ مەن جابىلۋ سالتاناتى، ق ر پرەزيدەنتىنىڭ قاتىسۋىمەن  وتكەن “يندۋستريالاندىرۋ كۇنىنە” ارنالعان ەلىمىزدىڭ 26 نىسانىن قامتىعان تەلەكوپىر وتكىزىلدى.

            “وتكەن جىلى كونتەنتتى جاڭارتۋ بارىسىندا الەۋمەتتىك جوبالاردىڭ سانى ارتتى، اقپاراتتىق-ساراپتامالىق باعدارلامالاردىڭ فورماتى وزگەردى. ەڭ باستىسى، ءوزىمىزدىڭ ىشكى تەلەونىمنىڭ ۇلەسى 80%-عا ءوستى، ياعني بۇل سىرتتان ساتىپ الىنباعان كونتەنت. ءبىز ءارى قاراي دا كونتەنتتى جاڭارتۋ جۇمىستارىن جالعاستىرىپ، ساپالى تۋىندىلاردىڭ سانىن ارتتىرۋعا اتسالىسامىز»، دەدى ەرلان قارين.

            ۇلتتىق تەلەارنادا جاڭا تەليەۆيزيالىق ماۋسىم ءداستۇر بويىنشا، ناۋرىز ايىنىڭ باسىنان باستالماق.  «Qazaqstan» تەلەارناسىنان بىرنەشە جاڭا جوبالار مەن  تەلەحيكايالار كورەرمەنگە جول تارتادى. بۇرىننان كەلە جاتقان تانىمال جوبالاردىڭ جۇرگىزۋشىلەرى اۋىسىپ، ەندى “تۇنگى ستۋديانى” اكتەر ءارى سىقاقشى  قايرات ادىلگەرەي جۇرگىزسە، “سەنبىلىك شوۋدىڭ”  تىزگىنىن تۇرسىنبەك قاباتوۆ ۇستايدى.  سونداي-اق، جاڭا ماۋسىم اياسىندا  اقپان ايىندا ەفيرگە شىققان “باقىتتى ايەل” توك-شوۋى ايەلدەر اراسىندا ۇلكەن سۇرانىسقا يە. بۇل باعدارلامادا كەيىپكەرلەر ءوزىنىڭ باسىنان وتكەن قىزىقتى وقيعالارى مەن باقىتتى بولۋدىڭ قىر-سىرلارىمەن بولىسەدى.  الداعى ۋاقىتتا ەلىمىزدىڭ تاريحىنان سىر شەرتەتىن “الاش اقيقاتى” باعدارلاماسى مەن “بالا كوڭىلى” اتتى بالالار تاربيەسىن قوزعايتىن گۋمانيتارلىق-اعارتۋشىلىق جوبا شىعاتىن بولادى.

“كوكتەمگى ماۋسىمنىڭ باستى تۇساۋكەسەرى «ءجۇرسىننىڭ جۇيرىكتەرى» اتتى اقىندار سايىسى بولماق. ايتىستا  20 شاقتى اقىن ايتىسىپ، ءوز ونەرلەرىن ورتاعا سالادى. بۇل جوبا بىرنەشە اي بويى جۇرەدى، ۇلتتىق ناقىشتى ساقتاي وتىرىپ، جاڭا فورماتتا ۇسىناتىن بولامىز”- دەدى ەرلان كارين.

«ءجۇرسىننىڭ جۇيرىكتەرى» باعدارلاماسىنىڭ قازىلار القاسىندا بەلگىلى ونەر قايراتكەرلەرى: قازاق كينوسىنىڭ مايتالمانى، ق ر حالىق ءارتىسى ءاسانالى ءاشىموۆ، ءانشى ءارى  كومپوزيتور، ق ر حالىق ءارتىسى التىنبەك قورازبايەۆ، پروفەسسور، عىلىم دوكتورى نامازالى وماشيەۆ پەن ق ر حالىق اقىنى اسيا بەركەنوۆا. ال، جوبانىڭ باستى قوناعى ق ر ەڭبەك سىڭىرگەن قايراتكەرى، اقىن جانە جۋرناليست ءجۇرسىن ەرمان سايىس اراسىندا پىكىرىن ايتىپ وتىراتىن بولادى.

سونىمەن قاتار، ۇلتتىق ارنا  جاس اۋديتوريانى ارتتىرۋ ماقساتىندا، قىزىقتى  ءارى ەرەكشە «Q-pop Idols» اتتى جوبانىڭ تۇساۋىن كەسپەك. بۇل جوبانىڭ جەتەكشىسى بەلگىلى مۋزىكانت، پروديۋسەر ەربولات بەدەلحان.

جاڭا ماۋسىم اياسىندا ءبىرقاتار جاڭا وتاندىق تەلەحيكايالار ۇسىنىلاتىن بولادى. 26 ناۋرىزداا الاش زيالىلارىنىڭ 20-شى عاسىردىڭ باسىندا تاۋەلسىزدىك جولىنداعى  تاعدىرىن باياندايتىن “تار زامان” تەلەحيكاياسى ەفيرگە شىعادى. اتاپ ايتقاندا،  كورەرمەندەر «تۋعان  جەر»، «سۇيە بىلسەڭ-2»، «جارالانعان جۇرەكتەر»، «ىڭكار جۇرەك-3» جانە ت.ب تەلەحيكايالاردى تاماشالايتىن بولادى.

بەلگىلى بولعانداي، بيىل قازاق تەليەۆيزياسى 60-جىلدىق مەرەيتويىن اتاپ وتۋدە. وسى ايتۋلى  مەرەكە قارساڭىندا “Qazaqstan” تەلەارناسى بىرنەشە ءىس شارالاردى وتكىزىپ كەلەدى.

«ۇلتتىق ارنادا ءار جىلدارى كوپتەگەن تانىمال تۇلعالار، زيالى قاۋىم وكىلدەرى ەڭبەك ەتىپ، قازاق تەليەۆيزياسىنىڭ دامۋىنا ۇلكەن ۇلەسىن قوستى.  ولاردىڭ اتقارعان وراسان ەڭبەكتەرىن ۇمىتپاۋ - ءبىزدىڭ پارىزىمىز.  اقپاننىڭ باسىنان باستاپ، ءار جەكسەنبى سايىن ۇلتتىق ارنانىڭ “التىن قورىندا” ساقتالعان، كەزىندە كورەرمەننىڭ كوڭىلىنەن شىققان بۇرىنعى باعدارلامالاردى ەفيرگە شىعارۋدى ۇيعاردىق. سونداي-اق،  ۇلتتىق ارنانىڭ “تاڭشولپان”، “دارا جول”، “كەلبەت” جانە باسقا دا باعدارلامالارىندا وتاندىق تەليەۆيزيا ارداگەرلەرىنىڭ قاتىسۋىمەن ارنايى شىعارىلىمدار جارىق كورەدى. مۇنىمەن قوسا، كورەرمەندەرگە توسىن سىي رەتىندە، بۇرىنعى تەلەجۋرناليستەر مەن ديكتورلار جۇرگىزۋشى بوپ ەفيرگە شىعاتىن بولادى»، دەپ اياقتادى ءسوزىن باسقارما ءتوراعاسى ەرلان قارين.