اقمولا وبلىسىندا كامەلەتتىك جاسقا تولماعان مەكتەپ وقۋشىسىن سوققىعا جىعىپ، ەس-تۇزسىز اۋرۋحانادان ءبىراق شىعارعان قورعالجىن اۋىلدىق وكرۋگىنىڭ اكىمى جانات وماروۆتىڭ ىسىنە قاتىستى تارتىپتىك كەڭەستىڭ وتىرىسى بولىپ ءوتتى، دەپ حابارلايدى قازاقپارات ءتىلشىسى.

ەسكە سالا كەتەيىك، وسىعان دەيىن حابارلاعانىمىزداي، قورعالجىن اۋدانىنىڭ تۇرعىنى ايگۇل بەكجانوۆا فەيسبۋك الەۋمەتتىك جەلىسىنە ا.تولەۋبايەۆ اتىنداعى ورتا مەكتەپتە وقيتىن ۇلى، 8-سىنىپ وقۋشىسى دياس مۇقاندى قورعالجىن اۋىلدىق وكرۋگىنىڭ اكىمى جانات وماروۆ سوققىعا جىققاندىعى تۋرالى جازعان بولاتىن.

وندا زارداپ شەككەن بالانىڭ اناسى ۇلىنىڭ «ميدىڭ شايقالۋى» دياگنوزىمەن قورعالجىن اۋداندىق اۋرحاناسىنا، كەيىن استانا قالاسىنداعى №2 اۋرۋحاناسىنا جەتكىزىپ، نەيروحيرۋرگيا ءبولiمشەسىندە جاتقانىن ايتقان ەدى. بۇل جازبا كوپشىلىك اراسىندا نارازىلىق تۋدىرىپ، الەۋمەتتىك جەلى قولدانۋشىلارى وقۋشىعا قول كوتەرگەن اكىمنىڭ ءىسىن قاتاڭ سىنعا الدى. 

ق ر باس پروكۋراتۋراسىنىڭ باسپا ءسوز قىزمەتى مۇقان دياستىڭ دەنساۋلىعىنا زيان كەلتىرۋ فاكتىسى بويىنشا قورعالجىن اۋداندىق ىشكى ىستەر بولىمىمەن قىلمىستىق ءىس قوزعالىپ، تەرگەلىپ جاتقانىن اتاپ ءوتتى. بۇگىن وسى وقيعاعا سەبەپكەر قورعالجىن اۋىلدىق وكرۋگىنىڭ اكىمى جانات وماروۆتىڭ ىسىنە قاتىستى اقمولا وبلىسى بويىنشا مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل دەپارتامەنتى ادەپ جونىندەگى كەڭەسىنىڭ كەزەكتەن تىس وتىرىسى ءوتتى.

كەڭەس مۇشەلەرى ق ر مەملەكەتتىك قىزمەت تۋرالى زاڭىنىڭ 10 بابىنىڭ  8 بولىمشەسى، 49 بابىنىڭ 1 بولىگى 3، 4، 7  بولىمشەلەرى، ادەپ جونىندەگى كودەكستىڭ 5 بولىگى 2، 7، 13 جانە  7 بولىگى 1 بولىمشەسى بويىنشا ايىپتالعان قورعالجىن اۋىلدىق وكرۋگىنىڭ اكىمى، مەملەكەتتىك قىزمەتشى جانات وماروۆتى قىزمەتىنەن بوساتۋ تۋرالى ءبىراۋىزدان شەشىم شىعاردى.