قازاقستان رەسپۋبليكاسىنىڭ ءدىن ىستەرى جانە ازاماتتىق قوعام ۆيسە-مينيسترى بەرىك ارىن اقتوبە وبلىسىنىڭ تۇرعىندارىمەن بولعان كەزدەسۋدە مەملەكەت باسشىسى ن.ءا.نازاربايەۆتىڭ «ءتورتىنشى ونەركاسىپتىك ريەۆوليۋسيا جاعدايىنداعى دامۋدىڭ جاڭا مۇمكىندىكتەرى» اتتى جولداۋىنىڭ باسىم باعىتتارىن ءتۇسىندىردى، دەپ حابارلايدى Qamshy.kz اقپارات اگەنتتىگى
ۆيسە-مينيستر اقتوبە وبلىسىنىڭ مۇعالجار جانە العا اۋدانىنىڭ تۇرعىندارىمەن وتكەن كەزدەسۋدە ءدىن ىستەرى جانە ازاماتتىق قوعام مينيسترلىگىنىڭ قىزمەتىنە سايكەس كەلەتىن جولداۋدىڭ باسىم باعىتى - ادامي كاپيتالدى دامىتۋ ەكەندىگىنە توقتالىپ ءوتتى.
«ادامي كاپيتالدى دامىتۋ اياسىندا تۇرعىنداردىڭ دەنساۋلىعىن نىعايتۋ، مەديسينالىق كومەكتىڭ ساپاسى مەن قول جەتىمدىلىگىن جاقسارتۋ قاجەتتىلىگى ماڭىزدى ەكەنى ايتىلدى. ءبىزدىڭ قوعام ءۇشىن جولداۋدىڭ ساپالى جۇمىسپەن قامتۋ جانە الەۋمەتتىك قامتاماسىز ەتۋ جۇيەسىن دامىتۋ بويىنشا ءبولىمى وزەكتى بولىپ تابىلادى. مۇندا بارلىق نەگىزگى ماماندىقتار بويىنشا زاماناۋي ستاندارتتاردى ازىرلەۋ ماڭىزدى»- دەپ اتاپ ءوتتى بەرىك ارىن.
ادامي كاپيتالدىڭ العا جىلجۋىنا، ارينە ەلدەگى تۇراقتىلىق پەن بەيبىتشىلىكتىڭ ۇلەس قوساتىنى ءسوزسىز. وسى تۇرعىدا بەرىك ارىن بيىلعى جولداۋدا مەملەكەت باسشىسى ەلىمىزدىڭ الەۋمەتتىك-ەكونوميكالىق جەتىستىكتەرىنىڭ ىرگەسىندە كونفەسسياارالىق جانە ەتنوسارالىق كەلىسىم جاتىر - دەپ اتاپ وتكەنىن تۇرعىندارعا جەتكىزدى. سونداي-اق مينيسترلىكتىڭ اتقارىپ وتىرعان قىزمەتىنە توقتالىپ، ءدىن سالاسىندا ازىرلەنىپ جاتقان جاڭا زاڭ جوباسى قوعام اراسىندا بارىنشا ءتۇسىندىرىلىپ جاتقاندىعى تۋرالى باياندادى.
«بۇل جوبا كوپتەگەن ءتۇرلى ديالوگتىك الاڭداردا ساراپشىلاردىڭ، ءدىني بىرلەستىكتەر مەن مەملەكەتتىك ورگانداردىڭ وكىلدەرىنىڭ، تەولوگتاردىڭ، بۇقارالىق اقپارات قۇرالدار مەن ۇكىمەتتىك ەمەس ۇيىمداردىڭ قاتىسۋىمەن تالقىلاندى. رەسپۋبليكا بويىنشا وڭىرلەردە 2000-نان استام كەزدەسۋلەر مەن پىكىر الماسۋلار ۇيىمداستىرىلدى. وسىلايشا مەملەكەتتىك-كونفەسسيالىق قاتىناستاردىڭ قازاقستاندىق مودەلىنىڭ قالىپتاسۋى بارىسىندا جان-جاقتى سىندارلى سەرىكتەستىك ورنىعۋدا»- دەدى بەرىك ارىن.
وتكەن جىلى مينيسترلىك قمدب-مەن بىرلەسىپ، «ۋاقىپ» قايىرىمدىلىق قورىن قۇرعان بولاتىن. قور شالعاي اۋدانداردا تۇراتىن، ماتەريالدىق جاعىنان مۇقتاج 300-دەن استام ءدىن قىزمەتكەرىنە كومەك كورسەتتى. سونداي-اق، جوبا بويىنشا اقتوبە وبلىسىنداعى 24 يمامعا ستەپەنديا بەرىلۋدە. «ۋاقىپ» قورى ارقىلى اقتوبە وبلىستىق ورتالىق مەشىتىنە كولىك الىپ بەرىلدى جانە اقتوبە قالاسىندا حالىقتىڭ الەۋمەتتىك وسال توبىنا ارنالعان 4 قاباتتى تۇرعىن ءۇيدىڭ قۇرىلىسى جوسپارلانىپ وتىر.
جۇمىس ساپارى اياسىندا ۆيسە-مينيستر بەرىك ارىن وبلىستىڭ ءبىرقاتار الەۋمەتتىك نىساندارىن ارالادى. اتاپ ايتقاندا بەستاماق كەنتىندەگى ءدىني باعىتتا ءبىلىم بەرەتىن «اقتوبە مەدرەسە» كوللەدجىنە، تاحاۋي احتانوۆ اتىنداعى وبلىستىق دراما تەاترىنا باردى. ءوڭىر يمامدارىمەن كەزدەستى. سونداي-اق ۆيسە-مينيسترگە وبلىستىق ءدىن ىستەرى باسقارماسى جانىنداعى «اڭسار» اقپاراتتىق تالداۋ ورتالىعىنىڭ جانە «وبلىستاعى ءدىني احۋال كارتاسى» اقپاراتتىق جۇيەسىنىڭ جۇمىسى تانىستىرىلدى.
