قازاقستاندىق اينۇر نۇسىپبەكوۆا ەلىمىزدە ءتۋريزمدى دامىتۋ ءۇشىن ايگىلى بريتاندىق كوميك ساشا كوەندى قازاقستانعا شاقىرۋدى نەمەسە قالالاردىڭ بىرىندە ونىڭ ەسكەرتكىشىن ورناتۋدى ۇسىندى، دەپ حابارلايدى Qamshy.kz اقپارات اگەنتتىگى. 

تourcenter.kz پورتالىنىڭ نەگىزىن قالاۋشى اينۇر نۇسىپبەكوۆا بۇل ۇسىنىسىمەن الەۋمەتتىك جەلىدە بولىسكەن.

«وزدەرىڭىز بىلەتىندەي، قازاقستان ءقازىر ءوزىن الەمگە تانىتۋ ءۇشىن بەلسەندى ارەكەت ەتۋدە جانە سول ءۇشىن ارنايى Kazakh تۋريزم ۇيىمى قۇرىلىپ، ەلىمىزگە تۋريستتەردى تارتۋمەن اينالىسىپ جاتىر. ءبىراق، وكىنىشكە وراي، قازاقستاننىڭ باستى پروبلەماسى تۋريستتەردى وزىنە تارتا الماۋىمەن عانا شەكتەلمەيدى، جالپى كوپ جەرلەردە ءبىزدى ەل رەتىندە ەشكىمنىڭ تانىماۋى بولىپ تابىلادى. قازاقستاننىڭ كوپتەگەن جەتىستىگى بار الايدا شەتەلدىكتەردىڭ باسىم كوپشىلىگى قازاقستان دەسە، بوراتتى ەسكە ءتۇسىرىپ، بىردەن تاني كەتەدى»، — دەيدى اينۇر نۇسىپبايەۆا. سول سەبەپتى بورات ەسىمدى كەيىپكەردى سومداعان اكتەر ساشا كوەندى قازاقستانعا شاقىرۋدى ۇسىنادى.

«…قارا پيار دەگەن دە پيار. ول ءبىر عانا فيلممەن ءبىزدىڭ ەلىمىز ميللياردتاپ قاراجات جۇمساپ جاتقان جەتىستىككە جەتتى. بوراتپەن حابارلاسىپ، استانادا قىدىرتىپ، ءبىراز شۋ شىعارۋعا بولادى. بالكىم بىرىگىپ ءازىل-ىسقاق فيلم تۇسىرۋگە كەلىسۋگە بولاتىن شىعار. سيۋجەتى بويىنشا، بورات بولاشاققا، قازىرگى استاناعا كەلىپ، نەشە ءتۇرلى قىزىقتار كورسەتىپ، ەلوردامىزدىڭ جاڭا كەلبەتىنە تاڭعالىپ جاتسا… وسى يدەيانى ءارى قاراي دامىتىپ، جەتىلدىرۋگە بولادى. دەگەنمەن وسى بورات ارقىلى ەلىمىزگە كەرەك تانىمالدىققا قول جەتكىزىپ، قىرۋار اقشا ۇنەمدەي الامىز. مەنى قاتتى سىنعا الماسسىزدار، ايتا كەتەيىن: قاراعاندىدا ما نەمەسە باسقا قالالاردىڭ بىرىنە بوراتقا ارناپ ەسكەرتكىش ورناتىپ، تۋريستتەردى سوندا اپارۋعا بولادى»، — دەپ ويىن ورتاعا سالدى قازاقستاندىق.