«سەنات باياعىدان قازاقشا سويلەيدى نەمەسە مەن جوقتا «تورىمە جاتىپ العان» قوناقتار تۋرالى» دەگەن تاقىرىپپەن ق ر پارلامەنتى سەناتى باسپا ءسوز قىزمەتىنىڭ جەتەكشىسى ادىلبەك قابا ءوزىنىڭ Facebook پاراقشاسىندا جازبا جاريالادى. 

— بۇل ءوزى قىزىق بولدى. پاراقشامدى اشىپ قالسام مەنىڭ بەتىمدە مەن ورنالاستىرماعان ءبىر دۇنيە تۇرادى. كۇندە سولاي. ءوزىڭىز جوقتا ۇيىڭىزگە كىرىپ، تورگە شىعىپ جاتىپ العان سياقتى نارسە ەكەن. الايدا مەن وعان رەنجىگەن جوقپىن. ايتارى بار ازاماتتاردىڭ پىكىرلەرى ەكەن. ونىڭ بىرىنە جاقىندا ارى-بەرىسىن سارالاپ جاۋاپ بەرەمىن. ەكىنشىسى ءوزىمنىڭ «ايقىندىق» ارىپتەسىم بەرىك بەيسەن ۇلىنىڭ جازباسى ەكەن. پاراقشانى اشقانىمدا «ولار سويلەي الادى. سويلەپ جاتىر. ءبىر-اق اۋىز ءسوز ولاردى سويلەتىپ جىبەردى. بىلمەي ءجۇر ەكەنبىز، باعالاماي ءجۇر ەكەنبىز عوي، ءبىزدىڭ مينيسترلەر پوليگلوت ەكەن. ءبىر تۇندە ءتىل ۇيرەنىپ الدى» دەپ باستاعان جازبانى كورگەندە «ويپىرماي، نە بولدى مەن ۇيىقتاپ تۇرعانشا ءبىراز نارسە وزگەرىپ كەتىپ، قۇر قالعانمىن با» دەپ ءارى قاراي وقىسام، بارلىق اڭگىمە ەلباسىنىڭ "قازاق ءتىلىنىڭ مارتەبەسىن ارتتىرۋ جونىندەگى جۇمىستاردى جالعاستىرۋىمىز قاجەت. پارلامەنت پەن ۇكىمەتتىڭ قىزمەتى تەك مەملەكەتتىك تىلدە جۇرگىزىلۋگە ءتيىس. سونداي-اق، بۇل ماسەلە بويىنشا ازاماتتاردىڭ قۇقىعىن شەكتەۋگە بولمايدى. ولار ءۇشىن ىلەسپە اۋدارما جاساۋ مۇمكىندىگىن قاراستىرعان ءجون"، - دەگەن سوزىنەن باستاۋ الىپ جاتىر ەكەن.

شىنىمەن-اق، ازاماتتار جيىنداردى جاپپاي قازاقشا وتكىزىپ جاتىر. سەڭ قوزعالدى. كەنەن اتامنىڭ انىندە «وسى ەدى عوي كۇتكەنىم باياعىدان» دەيتىنىندەي، جۇرتتىڭ كۇتكەنى دە وسى ەدى. ەندى شەتتەن كەلگەن ەلشىلەرمەن دە تەك قازاقشا پىكىر الماسسا، شەتەلدەردە وتەتىن جيىنداردا دا بايانداما قازاقشا جاسالسا، تىپتەن كەرەمەت بولار ەدى. ەڭ باستىسى، بارلىق قۇجاتتتار الدىمەن قازاقشا دايىندالماي ەشنارسە وزگەرمەيدى. 

سەناتتىڭ قازاقشاسى قالاي ەكەنىن ايتايىن. نەگە ەكەنىن بىلمەيمىن، مەن سەناتقا كەلگەنگە دەيىن بارلىق جيىندار، پالاتا وتىرىستارى بارلىق جەردەگىدەي ورىسشا وتەتىن شىعار دەپ ويلايتىنمىن. وسىدان بەس التى جىل بۇرىن قىزمەتكە شاقىرىلىپ، العاشقى جيىنىنا قاتىستىم. تاڭ قالدىم. بۇكىل جيىندار باستان اياق قازاق تىلىندە وتەدى. سەنبەسەڭىز، ونلاين قوسىپ كورىڭىز. ارحيۆتەرىن اقتارىپ كورىڭىز. ارينە، اراسىندا ءتىلىن سىندىرماعان مينيسترلەر كەلىپ ورىسشا بايانداما جاسايدى، وعان امال جوق. ەندى ويتپەيتىن شىعار. ءبارى تالپىنىپ جاتىر عوي.

...ءتىلدى ءالى تولىق مەڭگەرمەگەندەردىڭ دە جاعدايى جاسالعان. ورىسشا بىلمەيتىنگە قازاقشا، قازاقشا بىلمەيتىنىنە ورىسشا سينحروندى اۋدارما جاسالادى. 

جازدا شالكودە جايلاۋىندا جۇرگەنىمىزدە بۇركىپ وتە شىعاتىن جاۋىن بولۋشى ەدى. ونى ءبىز «وتكىنشى» دەپ اتايتىنبىز. ەلەمەيتىنبىز. مەملەكەتتىك ورگانداردىڭ قازاق تىلىندە سويلەپ، ءىس قاعازدارىن جۇرگىزۋى دە وتكىنشى بولماسا ەكەن دەپ تىلەيىك، - دەپ جازدى ءا. قابا.