الماتى وبلىسىندا كوكتەمگى مەرزىمدى اسكەرگە شاقىرۋ ناۋقانىنا قىزۋ دايىندىق ءجۇرىپ جاتىر، دەپ جازادى Qamshy.kz اقپارات اگەنتتىگى.
وسىعان وراي، الماتى وبلىسى اكىمىنىڭ ءبىرىنشى ورىنباسارى ءلازات تۇرلاشوۆتىڭ قاتىسۋىمەن قورعانىس ىستەرى جونىندەگى دەپارتامەنتىندە شاقىرۋ جانە مەديسينا كوميسسياسىنىڭ ءتوراعالارى، جەرگىلىكتى اسكەري باسقارۋ ورگاندارىنىڭ باستىقتارى، ۇقكد، ءىىد، سونداي-اق تالدىقورعان گارنيزونى اسكەري بولىمدەرى وكىلدەرىنىڭ قاتىسۋىمەن نۇسقاۋلىق-ادىستەمەلىك جيىن وتكىزىلدى. جيىننىڭ باستى تاقىرىبى – 2017 جىلعى مەرزىمدى اسكەرگە شاقىرۋدى قورىتىندىلاۋ، 2018 جىلعى كوكتەمگى شاقىرۋدىڭ مىندەتتەرى مەن تالاپتارىن تالقىلاۋ.
ءار قۇرىلىمدىق بولىمدەردىڭ وكىلدەرى ءوز سالاسىنا قاتىستى تاقىرىپتا بايانداما جاساپ، مەرزىمدى اسكەرگە شاقىرۋدا ورىن الاتىن كەلەلى ماسەلەلەر مەن ولاردى شەشۋ جولدارىمەن بولىسەدى.
سونىمەن قاتار، قورعانىس ىستەرى جونىندەگى بىرىكتىرىلگەن باسقارماسى مەن ءبولىم باستىقتارى مەرزىمدى اسكەر قاتارىنا شاقىرۋعا دايارلىقتارى، جۇرگىزىلگەن جۇمىستارى مەن جوسپارلارى بويىنشا تىڭدالادى.
ءوز كەزەگىندە قورعانىس ىستەرى جونىندەگى دەپاراتمەنتىنىڭ باستىعى پولكوۆنيك بەردىبەك بەرىستەموۆ شاقىرۋ مىندەتى جۇكتەلگەن مامانداردىڭ جاۋاپكەرشىلىگىن ەرەكشە اتاپ ءوتتى.
- اسكەرگە شاقىرۋ جۇمىستارىن ساپالى جۇرگىزۋدى باستى نازاردا ۇستاۋ قاجەت. اسكەر قاتارىنا قابىلداناتىن ازاماتتاردىڭ دەنساۋلىعى مىعىم، فيزيكالىق دايىندىعى كۇشتى، ءارى ەرىك-جىگەرى مىقتى بولۋى قاتاڭ قاداعالانسىن، - دەپ ويىن تۇيىندەدى ول.
ايتا كەتەرلىگى، بيىل تۇڭعىش رەت جىلجىمالى شاقىرۋ كوميسسياسى الماتى وبلىسىنا قاراستى قالالار مەن اۋدانداردا جۇمىس جۇرگىزدى. كوميسسيا قۇرامىنا جەرگىلىكتى اسكەري باسقارۋ ورگاندارىنىڭ، اكىمشىلىكتىڭ، دەنساۋلىق ساقتاۋ سالاسىنىڭ، قۇرىلىمدىق كۇشتەردىڭ وكىلدەرى كىرەدى. كوكتەمگى اسكەرگە شاقىرۋ ناۋقانىن ساپالى، ءارى ۋاقتىلى ورىنداۋ ماقساتىندا اتالعان كوميسسيا ءار شاقىرىلۋشىنى جەكە دارا قاراستىرىپ، العان ءبىلىمىن، وتباسى جاعدايىن ەسكەرە وتىرىپ، دەنساۋلىعىنىڭ جارامدىلىعىن باستى نازاردا ۇستاپ، ونى اسكەر قاتارىنا قابىلداۋ-قابىلداماۋ تۋرالى شەشىم قابىلدايدى.
كوكتەمگى مەرزىمدى اسكەري قىزمەتكە قابىلداۋ ناۋقانى 2018 جىلعى ماۋسىم ايىنىڭ سوڭىنا دەيىن جۇرگىزىلەدى.
