ەنەرگەتيكا ۆيسە-مينيسترى عاني سادىبەكوۆ ەكى ايعا قاماۋعا الىندى، - دەپ حابارلايدى Tengrinews.kz.
2 ناۋرىزدا استانا قالاسىنىڭ الماتى اۋداندىق № 2 سوتى كۇدىكتى عاني سادىبەكوۆ پەن سەرىكباي جۇمالينوۆتى قاماۋعا الۋ تۋرالى بۇلتارتپاۋ شاراسىن قاراستىردى.
"سوت ۇكىمىمەن كۇدىكتىلەردى ەكى اي مەرزىمگە قاماۋعا الۋ تۇرىندە بۇلتارتپاۋ شاراسى شىعارىلدى. 3 ناۋرىزدا استانا قالاسىنىڭ الماتى اۋداندىق № 2 سوتى كۇدىكتى بەكزات قادىربەرلين مەن جان نۇربەكوۆتى 2 اي مەرزىمگە قاماۋ تۋرالى ۇكىم شىعارعان ەدى"، - دەلىنگەن سوت باسپا ءسوز قىزمەتىنىڭ وكىلدەرى.
ەسكە سالايىق، ەنەرگەتيكا ۆيسە-مينيسترى عاني سادىبەكوۆ پەن بىرنەشە لاۋازىمدى تۇلعا جەمقورلىق دەرەگى بويىنشا ۇستالدىعان ەدى.
"سىبايلاس جەمقورلىققا قارسى كۇرەس ۇلتتىق ءىس-قيمىل بيۋروسىنىڭ قىزمەتكەرلەرى ەنەرگەتيكا مينيسترلىگىنىڭ بىرنەشە لاۋازىمدى تۇلعاسىن ۇستادى. ەنەرگەتيكا ۆيسە-مينيسترى عاني سادىبەكوۆ "ايماق" ج ش س مەردىگەرلىك ۇيىمىنىڭ باسشىسى دۋانبەك د.-مەن بىرىگە وتىرىپ، بيۋدجەتتەن اسا ءىرى كولەمدەگى قاراجاتتى جىمقىرعان. ول قاراجات ششۋچينسك-بۋراباي كۋرورتتىق ورنىندا وزەندى تازالاۋعا ارنالعان قاراجات بولعان. وسى قىلمىسقا ەنەرگەتيكا مينيسترلىگىنىڭ دەپارتامەنت باسشىسى نۇربەكوۆ ج. مەن مەردىگەر كومپانيانىڭ وكىلدەرى جۇمالينوۆ س. مەن قادىربەرلين ب. قاتىسقان. سادىبەكوۆ قول قويعان جالعان اكتىلەردىڭ ناتيجەسىندە ەنەرگەتيكا مينيسترلىگى 2017 جىلى ورىندالعان جۇمىستاردىڭ ۇلكەن كولەمى ءۇشىن 3،6 ميلليارد تەڭگە تولەدى. وسى سومادان 1 ميلليارد تەڭگەدەن اسا اقشا قولما-قول تولەمگە اينالدىرىلعان. تەكسەرىس كەزىندە بۇل اقشالار تاركىلەندى"، - دەلىنگەن ۆەدومستۆونىڭ حابارلاماسىندا.
"2018 جىلى وزەن تازالاۋعا بولىنگەن تاعى 1،5 ميلليارد تەڭگەنى جىمقىرۋ دەرەگىنە توسقاۋىل قويىلدى. سادىبەكوۆ، نۇربەكوۆ، دۋانبەك، جۇمالينوۆ جانە قادىربەرلين ۇستالدى. سوتقا دەيىنگى تەرگەۋ جۇرگىزىلىپ جاتىر"، - دەپ حابارلادى اگەنتتىك وكىلى نۇرلان جاحين.
عاني سادىبەكوۆ 1967 جىلى 23 قازاندا دۇنيەگە كەلگەن. ءتۇرلى جىلدارى (12.2009 - 12.2010 جىلدار)جامبىل وبلىسى اكىمى اپپاراتىندا باسشى قىزمەتىن، 2010-2013 جىلدار ارالىعىندا جامبىل وبلىسى اكىمىنىڭ ورىنباسارى، 2013-2016 جىلدارى پاۆلودار وبلىسى اكىمىنىڭ ورىنباسارى قىزمەتتەرىن اتقاردى.
ال ەنەرگەتيكا ۆيسە-مينيسترى قىزمەتىنە 2016 جىلدىڭ 3 مامىرىندا كەلدى.
پىكىر قالدىرۋ