بۇگىن ق ر پرەمەر-مينيسترى باقىتجان ساعىنتايەۆتىڭ توراعالىعىمەن وتكەن ۇكىمەت وتىرىسىندا 2013–2017 جىلدارعا ارنالعان قازاقستاندا ءدىني ەكسترەميزم مەن تەرروريزمگە قارسى ءىس-قيمىل جونىندەگى مەملەكەتتىك باعدارلامانىڭ ورىندالۋ بارىسى قارالدى. بۇل تۋرالى Qamshy.kz اقپارات اگەنتتىگى حابارلايدى. سونىمەن بىرگە ۇكىمەت وتىرىسىندا 2018–2022 جىلدارعا ارنالعان مەملەكەتتىك باعدارلاما جوباسى ماقۇلداندى.
ق ر ۇلتتىق قاۋىپسىزدىك كوميتەتى ءتوراعاسىنىڭ ورىنباسارى گەنەرال-مايور نۇرعالي بىلىسبەكوۆ 2018–2022 جىلدارعا ارنالعان باعدارلامانىڭ ماقساتى — ءدىني ەكسترەميزم كورىنىستەرىن ەسكەرتۋ جانە تەرروريزم ءقاۋپىن بولدىرماۋ ارقىلى ادامنىڭ، قوعامنىڭ جانە مەملەكەتتىڭ قاۋىپسىزدىگىن قامتاماسىز ەتۋ ەكەنىن اتاپ ءوتتى.
2013 جىلدان باستاپ ەلىمىزدە ءدىني ەكسترەميزم مەن تەرروريزم يدەولوگياسىن تاراتۋدىڭ سەبەپتەرى مەن جاعدايلارىن جويۋ جانە اتاۋلى اقپاراتتىق ءتۇسىندىرۋ جۇمىستارىن ۇيىمداستىرۋ جونىندە 202 كوميسسيا جۇمىس ىستەيدى.
مالىمدەلگەن اقپاراتقا سايكەس، اتالعان باعىتتا جالپى سانى 8،1 ملن-نان استام ادام قامتىلعان 96،6 مىڭنان استام شارا وتكىزىلدى.
اتقارىلعان جۇمىس ناتيجەسىندە 755 «جيحادشى» قالىپتى جولعا كوشىرىلدى. دايىندىق جۇمىستارىنىڭ باستاپقى كەزەڭىندە 38 تەرروريستىك سيپاتتاعى زورلىق-زومبىلىق ەكسترەميستىك ناۋقاندارىنىڭ ىسكە اسىرىلۋىنا جول بەرىلمەدى. شەتەلدە كۇدىكتى ءدىني ءبىلىم بەرۋ مەكەمەلەرىنەن 384 ستۋدەنت ەلگە قايتارىلدى.
سونداي-اق، مەملەكەت باسشىسىنىڭ تاپسىرماسىنا سايكەس دايىندالعان قازاقستان رەسپۋبليكاسىندا 2018–2022 جىلدارعا ارنالعان ءدىني ەكسترەميزم مەن تەرروريزمگە قارسى ءىس-قيمىل جونىندەگى مەملەكەتتىك باعدارلامانىڭ جوباسى تانىستىرىلدى.
جوبانى ازىرلەۋ كەزىندە 2013–2017 جىلدارعا ارنالعان مەملەكەتتىك باعدارلامانى ىسكە اسىرۋ ناتيجەلەرىنىڭ تالداۋ دەرەكتەرى، ەكسترەميزم مەن تەرروريزم ءقاۋپىن تۋدىراتىن جاعدايلار مەن فاكتورلاردىڭ تالداۋى، حالىقارالىق وزىق تاجىريبە، مەملەكەتتىك ورگانداردىڭ، ۇەۇ-دىڭ جانە قوعامدىق بىرلەستىكتەردىڭ ۇسىنىستارى ەسكەرىلدى.
ۇلتتىق ەكونوميكا ءمينيسترى تيمۋر سۇلەيمەنوۆ تە اتالعان ماسەلەگە قاتىستى ءسوز سويلەدى. مەملەكەتتىك جوسپارلاۋ جۇيەسى قۇجاتتارىنىڭ تالاپتارىنا سايكەس ق ر ءدىني ەكسترەميزم مەن تەرروريزمگە قارسى ءىس-قيمىل جونىندەگى 2013–2017 جىلدارعا ارنالعان مەملەكەتتىك باعدارلامانىڭ ىسكە اسىرىلۋىنىڭ تيىمدىلىگىنە باعالاۋ جۇرگىزىلدى.
باعالاۋ 4 كريتەريي بويىنشا جۇرگىزىلدى: نىسانالى ينديكاتورلار مەن ناتيجەلەر كورسەتكىشتەرىنە قول جەتكىزۋ دارەجەسى، ءىس-شارالاردى ورىنداۋ تولىقتىعى، بيۋدجەت قاراجاتىن يگەرۋ دەڭگەيى، نىسانالى ينديكاتورلاردى جانە ناتيجەلەر كورسەتكىشتەرىن جوسپارلاۋ.
«2 نىسانالى ينديكاتور مەن 19 ناتيجەلى كورسەتكىشكە كول جەتكىزىلدى. مەملەكەتتىك باعدارلاما اياسىندا 115 ءىس-شارا ورىندالدى»، — دەدى تيمۋر سۇلەيمەنوۆ.
ۇلتتىق ەكونوميكا مينيسترلىگىنىڭ مالىمەتىنە سايكەس، بيۋدجەت قاراجاتىن يگەرۋ دەڭگەيى 95،8%-دى قۇرادى.
«نىسانالى ينديكاتورلاردى جانە ناتيجەلەر كورسەتكىشتەرىن جوسپارلاۋ ساپاسى بويىنشا مەملەكەتتىك باعدارلاما قابىلدانعان ساتتەن باستاپ ينديكاتورلار مەن كورسەتكىشتەردىڭ ماندەرى، ءىس-شارالاردى ورىنداۋ مەرزىمدەرى تۇزەتىلمەگەنىن اتاپ وتەمىن»، — دەدى تيمۋر سۇلەيمەنوۆ.
