الماتىلىق بلوگەر ادىلەت راحمەتوللا جۇمىسى ەلەنە بەرمەيتىن ايەلدەردى ەرەكشە تاسىلمەن قۇتتىقتاپ، Instagram جەلىسىندەگى پاراقشاسىندا جاريالادى. بۇل تۋرالى Qamshy.kz اقپارات اگەنتتىگى Tengrinews.kz سايتىنا سىلتەمە جاساپ حابارلايدى.
«بەيتانىس جان سىزگە وتە سۇلۋ ەكەنىڭىزدى ايتىپ، گۇل سىيلاسا، قانداي سەزىمدە بولار ەدىڭىز؟! مۇنداي توسىن ارەكەت جۇمىس باسىنداعى ادامعا قالاي اسەر ەتپەك؟ حالىقارالىق ايەلدەر كۇنى قارساڭىندا بۇل سۇراقتىڭ جاۋابىن انىقتاپ كورۋگە تىرىستىم. شارا بارىسىندا مەن ءارتۇرلى قىزمەتتەگى ايەلدەردى سۋرەتكە ءتۇسىرىپ: «ءسىز سونداي ادەمىسىز. مىنا گۇل سىزگە»، - دەپ ءىلتيپاتىمدى ءبىلدىردىم جانە ول كىسىلەردىڭ جۇزىندەگى باقىت پەن تاڭدانىستى كامەرا وبەكتيۆىنە ءتۇسىرىپ ۇلگەردىم»، - دەيدى ادىلەت راحمەتوللا.
«ارينە، فوتواپپاراتتى كورگەن كەزدە قاشقاقتاپ، باس تارتقاندار از بولمادى. الايدا مەن ءوزىمنىڭ كاسىبيلىگىمدى ىسكە قوسىپ، قاجەتتى كادرلاردى تابۋعا تىرىستىم. كىم دە بولسا كوشە سىپىرۋعا قۋانىپ شىقپايتىنى انىق قوي. مىسالى، كوشە سىپىرىپ جۇرگەن تاتەمىز اۋەلى قارسى بولدى. «ءبىز تۇسىرۋگە ءتيىسپىز. بىزگە سونداي تاپسىرما ءتۇستى»، - دەپ ءجاي عانا ءتۇسىرىپ الدىم! سودان كەيىن: «ءسىز سونداي سۇلۋسىز. باقىتتى بولىڭىز»، - دەپ گۇل ۇسىنعان كەزدە قۋانىشتان ءجۇزى بال-بۇل جايناپ كەتتى"، - دەپ باياندايدى بلوگەر.
«سامسا ساتاتىن ارۋعا: «ءسىز سۇلۋسىز. مىنا گۇل سىزگە»، - دەپ ۇسىنعان كەزدە مۇلدەم سەنبەدى. «ءقازىر تۇسىرىلىمنەن كەيىن الىپ كەتەسىزدەر مە؟ شىنىمەن دە ماعان با؟»، - دەپ تاڭعالىپ، ءبىراز تۇسىنبەي تۇردى. فوتومودەلدەرىمنىڭ اراسىندا «گۇل الماعالى 5-6 جىل بولىپ ەدى، مىناۋ ءبىر باقىت بولدى عوي» دەپ قۋانعاندار دا، «توڭىپ جۇرگەندە جانىما جىلۋ سىيلادىڭىزدار» دەگەن اپكەلەرىمىز دە، «ءوزىڭنىڭ اقشاڭا ساتىپ الدىڭ با؟ قاپ، بەكەر شىعىنداندىڭ عوي" دەپ قالتامىزدى اياعان جاندار دا بولدى»، - دەپ قىزىقتارىمەن ءبولىستى ادىلەت ءوز پاراقشاسىندا.
«ەڭ باستىسى، سىيلىقتىڭ باعاسى ەمەس، مەيىرىمدىلىك ماڭىزدى ەكەنىن سەزىندىك. وزدەرىڭىز فوتوسۋرەتتەرگە مۇقيات قاراساڭىزدار، جىلى ءسوز ايەلدەردى ەرەكشە ارلەيتىنىن ءسوزسىز تۇسىنەسىزدەر. سوندىقتان اينالاڭىزداعى نازىك جاندىلارعا ءجيى ءىلتيپات كورسەتىپ، ماحابباتقا تولى جىلى سوزدەرىڭىزدى ايتۋدان شارشاماڭىزدار. اللا رازى بولسىن!»، - دەپ اياقتادى ول.
پىكىر قالدىرۋ