قازاقستاندىق بيزنەسمەن مۇراتحان ءتوقماديدىڭ ۇستالعانى جايلى مالىمەت تارالىپ جاتىر، - دەپ حابارلايدى تengrinews.kz.

بۇل مالىمەتتى ق ر ىشكى ىستەر مينيسترلىگى جەدەل باسقارما ورتالىعىنىڭ وكىلدەرى راستادى، الايدا ولار بيزنەسمەننىڭ قالاي ۇستالعانىن ناقتىلامادى. ورتالىقتاعى كەزەكشى قىزمەتكەر مۇراتحان ءتوقماديدى ق ر ۇلتتىق قاۋىپسىزدىك كوميتەتىنىڭ قىزمەتكەرلەرى ۇستاعانىن حابارلادى.

كەيبىر مالىمەتتەرگە قاراعاندا، ءتوقمادي تارازداعى №1 ىقشاماۋداندا ۇستالدى.

كەشە، 8 ناۋرىزدا الەۋمەتتىك جەلىلەردە مۇراتحان ءتوقماديدىڭ قاشىپ كەتكەنى جايلى مالىمەت تارالعان ەدى. "08.03.2018 جىلى كەشكى 19.30 بەن 20.00 اراسىندا تارازداعى وبلىستىق اۋرۋحانادان مۇراتحان ءتوقمادي بەلگىسىز باعىتتا قاشىپ كەتكەن، ول ادام ءولتىردى دەگەن ايىپپەن قاماۋدا بولعان. ول تىزەگە دەيىن تۇسەتىن قارا كۇرتە مەن دجينس كيگەن، اياعىندا نە تۋفلي، نە كروسسوۆكا بولعان"، - دەلىنگەن ەدى حابارلامادا. 

وسىعان دەيىنگى سوت وتىرىسىندا بيزنەسمەن ءوز كىناسىن مويىنداعان ەدى.

ەسكە سالا كەتەيىك، مۇراتحان ءتوقمادي بىلتىر 12 ماۋسىمدا ۇستالعان بولاتىن. الماتىدا ارنايى قىزمەت "دەپۋتاتتىق كورپۋس" اتتى قىلمىستىق توپتى ۇستاۋ بويىنشا وپەراسيا وتكىزگەن ەدى. باق-تا شىققان اقپارات بويىنشا، بۇل قىلمىستىق توپتى "قازشىنىقۇرىلىس" زاۋىتىنىڭ يەسى مۇراتحان ءتوقمادي باسقارعان. سونداي-اق، پروكۋراتۋرا مالىمەتىنشە، ونىڭ ءۇيىن ءتىنتۋ كەزىندە قارۋ-جاراق پەن ءوق-دارى تابىلعان. ال تاياۋدا بيزنەسمەنگە قاتىستى ۇكىم شىققان. مۇراتحان ءتوقمادي 3 جىلعا باس بوستاندىعىنان ايىرىلعان بولاتىن.