بىرنەشە كۇن بەدەرىندە كاسىپقوي بوكستان ءناپاقاسىن ايىرىپ جۇرگەن مەكسيكالىق ساۋل الۆارەستىڭ كلەنبۋتەرولمەن ۇستالىپ قالعانى جايلى اقپارات عالامتور كەڭىستىگىن جايلاپ ۇلگەردى. رۇقسات ەتىلمەگەن بۇل پرەپەرات تۋرالى ابدەن وقىپ، زەردەلەپ، قانىققان بولارسىز. ەندەشە ءدامى كەتكەن قازىنى كوپ شايناماي، GGG-Canelo اراسىنداعى ەكىنشى شايقاسقا كلەنبۋتەرول كەدەرگى بولا ما دەگەن ساۋالعا جاۋاپ ىزدەپ كورسەك.
بىرىنشىدەن، كانەلونىڭ بيزنەس-يمپەريا ەكەنىن ايتا كەتكەن ءجون. كىم نە دەسە و دەسىن، ءبىراق ساۋل الۆارەس – بۇگىنگى كاسىپقوي بوكس الەمىنىڭ پاسپورتى. HBO سەكىلدى الپاۋىت تەلەارنا ءۇشىن دە، بوكس ۇيىمدارى ءۇشىن دە الۆارەس – اند تاۋىنىڭ ۇشار بيىك شىڭى. ال قاي تاراپقا بولسىن قىرعىن اقشا تۇسىرەتىن، جانكۇيەرلەر بازاسى ابدەن قالىپتاسقان، ناعىز بيزنەس-جوبانى تۇپ-تامىرىمەن كەسىپ تاستاۋ كىمگە ءتيىمدى؟ كانەلونىڭ ەسەبىنەن اقشا تاۋىپ وتىرعان بارلىق تاراپقا ءتيىمسىز. قانداي اۋىر قىلمىسپەن ۇستالسا دا، باسقا-باسقا، مەكسيكالىقتار ءۇشىن ءبارى كەشىرىمدى. ويتكەنى كاسىپقوي بوكس الەمى اتالاتىن ءتورت بۇرىشتىڭ جارتىسىن مەكسيكالىقتار ۇستاپ تۇر. مەيلى، فاناتتار اسكەرى جاعىنان، ماقۇل، بوكس ۇيىمدارى تاراپىنان بولسىن... ءيا، سانامالايىق پا؟ بۇكىل الەمدىك بوكس كەڭەسى (WBC)، بۇكىل الەمدىك بوكس اسسوسياسياسى (WBA) سەكىلدى الپاۋىت ۇيىمدار ماۋريسيو سۋلەيمان مەن حيلبەرتو مەندوسونىڭ قولىندا تۇرعاندا كانەلونىڭ جولىنا كىم كەدەرگى تاستار تاستاي الماق؟ ەشكىم...
ەكىنشىدەن، الۆارەس كوشەدە جۇرگەن بوكسشى نەمەسە «جولاۋشى» (پوپۋچيك) چەمپيون بولعان ەمەس. ونىڭ وتكىزگەن جەكپە-جەكتەرىنىڭ تىزىمىنەن كىمدەردى كورەسىز؟ ماني، ياعني كىشى فلويد مەيۆەزەر، كوپتەگەن بىلعارى قولعاپ شەبەرى ءۇشىن وتە ىڭعايسىز ەريسلاندي لارا، وستين تراۋت... قىسقاسى، توپ بوكسشىلار جەتكىلىكتى. مۇنىڭ ىشىندە ساۋل تەك فلويدقا ەسە جىبەرگەنىن بىلەمىز. ال جانكۇيەرلەر ءۇشىن جاعىمىز پەرسونا بولا تۇرا كاسىپقوي بوكستىڭ كورولىنە اينالعان مەيۆەزەر مانسابىن اياقتاعان سوڭ الۆارەس جەكە-دارا بيزنەس جوباعا اينالدى. قانداي كاسىپقوي بوكس ۇيىمى «ساۋىن سيىردان» ايرىلعىسى كەلەدى؟ ەشقايسىسى. بۇل دالەلدەۋدى قاجەت ەتپەيدى.
ءۇشىنشى جانە ەڭ باستى ارگۋمەنتىمىز، گولوۆكين – الۆارەس اراسىندا شەشىمىن تاپپاعان داۋ بار. ءيا، بىرىنشە جەكپە-جەكتە قازاقستاندىق بوكسشى باسىمداۋ كورىنگەن. الايدا «Golden boy» پروموۋتەرلىك ۇيىمىمەن، ادەلايدا بەرد سەكىلدى «سۇڭعىلا» تورەشىلەر تاندەمىمەن جانە ساۋل الۆارەسپەن شارشى الاڭ ىشىندە جانە سىرتىندا جۇدىرىقتاسقان گەناعا وڭاي سوققان جوق. ايتالىق، الۆارەس چەمپيون بولىپ، گولوۆكين ۇمىتكەر سانالعاندا ءايتىپ-بۇيتىپ جەڭىستى مەكسيكالىققا اپەرە سالار ەدى. ءتىپتى، ءبىرىنشى شايقاس كوپ ادامنىڭ كوكەيىندە كۇمان قالدىردى. بارلىق جاعىنان ايگىلى وسكار دە لا حوييانىڭ (الۆارەستىڭ پروموۋتەرى) ايتقانىنا كونىپ، ايداۋىنا جۇرە سالاتىن توم لەففلەر (گولوۆكيننىڭ پروموۋتەرى) استىرتىن تەڭ ناتيجەگە كەلىسىپ الۋى دا بەك مۇمكىن. ونى گولوۆكيننىڭ جاتتىقتىرۋشىسى ابەل سانچەس تە ءبىلۋى ىقتيمال. تەك گەنا بىلمەسە كەرەك... ستراتەگيانى باپكەر قۇرادى عوي. سوندىقتان ءبىز ءسال باسقاشالاۋ شايقاس كوردىك... وسىنداي وي دا ميدىڭ ءدالىزىن كەزىپ كەتەتىنى بار. كىم ءبىلسىن؟ ءبىرىنشى جەكپە-جەك، قالاي دەسەك تە، جۇمباق بولىپ قالدى. جۇرت جۇمباقتىڭ شەشىلگەنىن قالايدى. تەك فاناتتار ەمەس، بۇكىل بوكس الەمىنىڭ مايتالماندارى. سول سەبەپتى ەكىنشى كەزدەسۋ ناعىز كاسسالىق ايقاسقا اينالماق. بۇل پروموۋشن ءۇشىن دە، تەلەارنا ءۇشىن دە، بوكسشىلار ءۇشىن دە اسا ماڭىزدى. ەندى وسىنداي كەزدەسۋدىڭ الدىنا قايداعى ءبىر كلەنبۋتەرول كەدەرگى بولا الادى دەپ ويلايسىز با؟ جوق! كلەنبۋتەرول – تەك قوسىمشا ينتريگا.
كەزىندە ەريك مورالەس پەن فرانسيسكو ۆارگاستىڭ بويىنان تابىلعان كلەنبۋتەرول ولارعا تۇك تە كەسىرىن تيگىزبەگەن بولاتىن. مورالەس تە، ۆارگاس تا – عالامات بوكسشىلار. ايتكەنمەن، اتى اتالعان بىلعارى قولعاپ شەبەرلەرى ءدال الۆارەس سەكىلدى «ساۋىن سيىر» بولا المادى. ەندى ويلاڭىز، مورالەس، ۆارگاس اينالىپ وتكەن دوپينگ داۋى الۆارەستىڭ الدىنداعى الىنبايتىن اسۋ ما؟ ەزۋگە كۇلكى ۇيىرىلەدى. الۆارەستى، قاجەت بولسا، VADA دا، باسقا دا اقتاپ الۋعا ءتاس-تۇيىن دايىن. ەندەشە بىزگە الۆارەستىڭ جازالانۋى مۇمكىن ەمەستەي كورىنەدى. سوعان قاراعاندا، قازاقستان ۋاقىتىمەن 6-مامىردى كۇتەتىن ءتۇرىمىز بار. مەگا شايقاس مەرزىمى تىم تاياۋ. ءۇمىت باسىم، كۇدىك كەمشىن. ءبىز گەناعا سەنەمىز. ءسىز شە؟
تابيعات ابايلدايەۆ
