ۇلتتىق بانك ءتوراعاسى دانيار اقىشيەۆ ۇكىمەت وتىرىسىندا "7-20-25" باعدارلاماسى اياسىندا 7 پروسەنتتىك يپوتەكانىڭ تالاپتارىن ايتتى، دەپ حابارلايدى Qamshy.kz اقپارات اگەنتتىگى.

ۇلتتىق بانك ءتوراعاسىنىڭ مالىمەتىنشە، قارىز الۋشى تولەمگە قابىلەتتى بولۋى شارت.

-باعدارلاماعا رەسمي كىرىسى بار قازاقستان ازاماتى قاتىسا الادى. ونىڭ شارتتارى بانكتەرمەن تالقىلانىپ جاتىر. ماسەلەن، ءۇيدىڭ قۇنى - 7 ملن تەڭگە بولسا، اي سايىنعى تولەم 50 مىڭ تەڭگە. بۇل جۇمىس ىستەيتىن كوپتەگەن قازاقستاندىق ءۇشىن قولايلى. ءىرى قالالار مەن ايماقتار بويىنشا باسپانا باعاسىنا ديففەرەنسياسيا جاسالۋى مۇمكىن، - دەدى دانيار اقىشيەۆ.

ايتا كەتەيىك، نۇرسۇلتان نازاربايەۆ «7-20-25» باعدارلاماسىن تانىستىرىپ، ەڭبەك ەتۋشى ءار قازاقستاندىق تۇرعىن ءۇيدى جىلدىق مولشەرلەمەسى 7 پايىزدان اسپايتىن وسىممەن الا الاتىنىن ايتقان بولاتىن. ەلباسى تانىستىرعان «7-20-25» باعدارلاماسىندا قاراپايىم حالىققا قولجەتىمدى باعادا ءۇي الۋ ماسەلەسى قاراستىرىلعان.