شىعىس قازاقستان وبلىسىنىڭ اكىمى دانيال احمەتوۆ سەل جۇرگەن اۋدانعا بارىپ، تۇرعىندارمەن كەزدەسۋىندە وسىلاي دەپ ۋادە بەردى. سونداي-اق، ءوڭىر باسشىسى ۇيلەردىڭ تابيعي اپاتتان كەيىنگى جاعدايىمەن تانىستى، دەپ حابارلايدى قازاقستان ۇلتتىق تەلەارناسى.

اياگوز وزەنىندەگى بوگەتتى بارىپ كورىپ، ءقاۋىپسىز جەرگە كوشىرىلگەن وتباسىلارمەن كەزدەستى. ەكى كۇن بويى جاۋعان قار ارالاس جاڭبىر اياگوز اۋدانى تۇرعىندارىن كۇندىز كۇلكى، تۇندە ۇيقىدان ايىرعانى جاسىرىن ەمەس. وسى ارالىقتا اسىرەسە، ۇيلەرىن سۋ شايىپ كەتكەندەر كوز ىلمەدى. دانيال احمەتوۆ قيىن كەزدە قىسىلعان سول ادامداردىڭ بىرازىمەن كەزدەستى، بىرنەشە باسپانانى ارالاپ كوردى. بۇگىنگى مالىمەتكە سايكەس 148 ۇيگە سۋ كىرگەن، 10-عا جۋىعىنا جوندەۋ جۇمىستارى جۇرگىزىلۋى كەرەك جانە 8 ءۇي تۇرۋعا مۇلدەم جارامسىز،-دەپ تانىلىپ وتىر.

زارداپ شەككەندەردىڭ ءبىرى جالعىزباستى انا. ول ءۇش بالاسىمەن دالادا قالعان بولاتىن. ءبىراق، ءوڭىر اكىمى جاقسى حابارمەن سۇيىنشىلەدى. حالىق اكىمدى جان-جاقتان قاۋمالاپ باسىنا تۇسكەن اۋىرتپالىقتارىن ايتىپ قالۋعا تىرىستى. ولاردىڭ بازىناسىن شەشۋ جەرگىلىكتى باسشىلارعا تاپسىرىلدى. ابىروي بولعاندا ادام شىعىنى جوق. ال، تاسقىن سۋ تالقانداپ كەتكەن اينالانى تازارتۋعا 400-دەي ازامات تارتىلعان. 50 ارنايى تەحنيكا تاعى بار. بۇدان سوڭ دانيال احمەتوۆ باستاعان توپ اياگوز وزەنىنە باردى. ونداعى بوگەتتى ءالى دە توپىراق توگىپ بيىكتەتۋ كەرەكتىگى ەسكەرتىلدى.

ويتكەنى، تابيعات توسىن مىنەز تانىتسا، ابدىراپ قالۋعا بولمايدى. الدىن نىقتاپ الۋ قاجەت. ال، سەلدەن سەكەم العان جۇرتقا العاشقى كومەك رەتىندە قارجى بولىنەتىن بولدى. بۇل كۇندەلىكتى تۇرمىستىق قاجەتتىلىكتى وتەۋ ءۇشىن عانا. تاسقىن سۋ سالدارىنان 400-دەي ادام ءقاۋىپسىز جەرگە كوشىرىلدى. سونىڭ ىشىندە 20 وتباسى اۋدانداعى №6 مەكتەپ-ينتەرناتىنا ورنالاستىرىلدى. ولاردىڭ قاتارىندا ۇيسىز-كۇيسىز قالعاندار دا بار. ءبىراق، باستارىنا باسپانا تيگەنشە سول جەردى پانالايتىن بولادى. كيىمدەرى ءبۇتىن، قارىندارى توق. ءتورت مەزگىل تاعام بەرىلىپ تۇرادى. تۇرعىنداردىڭ قول ۇشىن بەرىپ جاتقان جاندارعا ريزاشىلىعى شەكسىز. تەك باستارى قۇرالىپ، باسپاناعا كىرۋدى اڭسايدى.

بۇرىن-سوڭدى اياگوزدە مۇنداي جاعداي بولماپتى. بايىرعى حالىق جاڭبىر قانشا قۇيسا دا كوشە اراسىن ارالاي اعاتىن ارىقتىڭ سۋى ارناسىنان اسپاعان. ولار تەك ءبىر نارسەگە كۇدىكتەنەدى. ءۇش بيىك دەپ اتالاتىن جەردە بوگەت جارىلىپ، تاسقىن سۋ سودان بولعان،-دەگەن بولجام جاساپ وتىر. مۇنىڭ انىق-قانىعىن وبلىس اكىمى انىقتايتىن بولدى. ارنايى توپ تىك ۇشاقپەن توڭىرەكتى تۇگەل شولىپ شىعىپ، الداعى 4 كۇندە ناقتى مالىمەت بەرەتىنىن جەتكىزدى.