استانا اكىمدىگى تۇرعىنداردى ساق بولۋعا شاقىردى دەپ جازادى Qamshy.kz اقپارات اگەنتتىگى استانا اكىمدىگىنىڭ رەسمي سايتىنىڭ دەرەگىنە سۇيەنىپ. قاردىڭ قالىڭ جاۋعانىنا بايلانىستى استانا كوممۋنالدىق قىزمەتى كۇشەيتىلگەن رەجيمدەگى جۇمىس كۇشىنە اۋىستى.

ءدال ءقازىر قالا كوشەلەرىن 800 بىرەگەي تەحنيكا مەن 2 مىڭعا جۋىق جۇمىسشى قاردان تازالاپ جاتىر. 

سارىارقا اۋدانىن قاردان ارشۋعا 569 جۇمىسشى مەن 264 تەحنيكا شىقتى. 

ەسىل اۋدانىنىڭ اۋماعىنا تازالاۋعا 276 تەحنيكا مەن 738 جول جۇمىسشىسى جۇمىلدىرىلدى. 

الماتى اۋدانىن تازالاۋعا 296 تەحنيكا مەن جولدى كۇرەۋگە 588 ادام كىرىستى. 

اسىرەسە ەڭ ءبىرىنشى اۆتوبۋس ايالدامالارى مەن جەراستى وتكەل جولدارى، كوپىر، وتپەجول، حالىق كوپ جينالاتىن ورىندار، اۋرۋحانا مەن باسقا دا ماڭىزدى الەۋمەتتىك نىسانداردىڭ ماڭايى قاردان تازارتىلدى. 

سونداي-اق، تەپكىشەكتەرگە قاتقان مۇزدان جاراقات الۋشىلار سانىن ازايتۋ ءۇشىن كوكتايعاققا قارسى اۋلا ماڭىنداعى جەرلەرگە دە كوبىرەك كوڭىل بولىنۋدە. 

ول ءۇشىن استانادا كوكتايعاققا قارسى ارنايى قۇرالدىڭ قورى ساقتالعان. ال شىعارىلعان قاردى ارنايى قار توگەتىن پوليگونعا جەتكىزەدى. 

قالا بيلىگى استانا تۇرعىندارى مەن قوناقتارعا قاۋىپسىزدىك شارالارىن ساقتاۋدا مۇقيات بولۋعا شاقىرادى. كولىكتى باسقارۋدا جىلدامدىقتى ازايتىپ، اراقاشىقتىقتى ساقتاۋمەن قاتار، شالت قيمىل جاساماۋ كەرەكتىگىن ەسكەرتەدى. 

بۇدان باسقا، جاياۋ جول جۇرگىنشىلەرى بەلگىسىنە دە اباي بولۋ كەرەك. ارعى بەتكە ءوتۋ ءۇشىن تەك جاياۋ جول جۇرگىنشىلەرىنەن ءوتۋى ءتيىس. قالا جولدارىنداعى ارنايى جۇمىس ىستەپ جاتقان تەحنيكالار كولىكتەردىڭ ارى-بەرى ءجۇرۋ باعىتىن كىشكەنە باسەڭدەتۋى مۇمكىن. وسىعان بايلانىستى الدىن الا ەرتەرەك قالادا جۇرەتىن باعدارىڭىزدى جوسپارلاپ الۋىڭىز قاجەت.