بۇگىن ەلىمىزدىڭ باس پروكۋراتۋراسى ارنايى مالىمدەمە جاساپ، ءابليازوۆ پەن ونىڭ ايتاقشىلارىنان ساق بولۋعا كەڭەس بەردى. ايتۋلارىنشا، ولارعا قولداۋ ءبىلدىرىپ، قاتارىنا قوسىلعاندار بۇدان-بىلاي قىلمىسكەر بولىپ سانالادى، — دەپ حابارلايدى كتك ارناسىنىڭ دەرەگىن نەگىزگە الا وتىرىپ. 

بۇدان بىلاي «دۆك»-نى قارجىلاي قولداپ نەمەسە ۇيىمنىڭ اتىنان ءتۇرلى ميتينگ وتكىزەتىندەر 2 جىلدان 17 جىلعا دەيىن باس بوستاندىعىنان ايىرىلۋى مۇمكىن. ءتىپتى، قوزعالىستىڭ قاتارىنا قوسىلماي-اق، ءابليازوۆتىڭ الەۋمەتتىك جەلىسىندەگى جازباسىن قولداپ، لايك باسقاندار دا شاتىلۋى ىقتيمال.

سوندىقتان، پروكۋرورلار قاشقىننىڭ پاراقشاسىنا جازىلعان ازاماتتارعا ودان دەرەۋ شىعىپ كەتۋگە كەڭەس بەردى.

«قوزعالىس تۋرالى كەز-كەلگەن جازباعا وڭ پىكىر قالدىرۋ، ۇيىم تۋرالى اقپارات تاراتۋ دا قىلمىس ەكەنىن ەسكەرتەمىز. مۇنداي ادامدارعا 5 مىڭ تەڭگەگە دەيىن ايىپپۇل سالىنادى نەمەسە 2 جىلعا دەيىن تۇرمەگە جابىلادى»، — دەيدى باس پروكۋراتۋرانىڭ قىلمىستىق قۋعىنداۋ قىزمەتىنىڭ باسشىسى ەرلان ابايەۆ.

ءقازىردىڭ وزىندە پروكۋرورلار ەكسترەميزمدى ناسيحاتتاعان ءابليازوۆ قوزعالىسىنىڭ 5 مۇشەسىن قاماۋعا العان. ءبىراق، ولاردىڭ كىم جانە نە ءۇشىن ۇستالعانى ازىرگە قۇپيا.

ال بتا بانكتەن 7 جارىم ميلليارد دوللاردى جىمقىرىپ، سىرتتاي 20 جىلعا سوتتالعان قاشقىن وليگارحتىڭ ءوزى ءقازىر فرانسيادا باس ساۋعالاپ ءجۇر.