ءماجىلىس سپيكەرى نۇرلان ءنىعماتۋليننىڭ توراعالىعىمەن وتكەن جالپى وتىرىستا پالاتا ىشكى ىستەر ورگاندارىنىڭ قىزمەتىن جەتىلدىرۋگە قاتىستى تۇزەتۋلەردى ءبىرىنشى وقىلىمدا قاراپ، ماقۇلدادى، دەپ حابارلايدى Qamshy.kz اقپارات اگەنتتىگى.
اتالعان زاڭ جوباسى بويىنشا ىشكى ىستەر ءمينيسترىنىڭ ورىنباسارى ەرلان تۇرعىمبايەۆ بايانداما جاساپ، قۇجات اياسىندا اۋماقتىق ىشكى ىستەر دەپارتامەنتتەرى مەن جەرگىلىكتى پوليسيا قىزمەتىن قۇرىلاتىن دەپارتامەنتتەردى ىشكى ىستەر مينيسترلىگىنە باعىندىرا وتىرىپ، پوليسيا دەپارتامەنتتەرىنە بىرىكتىرۋ جولىمەن پوليسيا جۇيەسىن جاڭعىرتۋ كوزدەلىپ وتىرعانىن اتاپ ءوتتى. سونىمەن بىرگە، اكىمدەرگە پوليسيا دەپارتامەنتتەرىنىڭ الدىنا قازىرگى كەزدە جەرگىلىكتى پوليسيا قىزمەتىنىڭ قۇزىرەتىنە جاتاتىن مىندەتتەرىن قويۋ قۇقىعى بەرىلمەك.
ايتا كەتەرلىگى، زاڭ جوباسى بويىنشا جۇمىس توبىنىڭ وتىرىستارىندا دەپۋتاتتار جەرگىلىكتى پوليسيا قىزمەتىنىڭ جۇمىسىنا، پوليسيا قىزمەتىنىڭ ايقىندىعىن ارتتىرۋعا، ادامداردى ارناۋلى ءۇي-جايلاردا ۇستاۋدىڭ تارتىبىنە بايلانىستى ۇسىنىستار ەنگىزدى.
سونداي-اق، وسى كۇنى پالاتا تمد قاتىسۋشى مەملەكەتتەردىڭ اقپاراتتىق قاۋىپسىزدىكتى قامتاماسىز ەتۋ جونىندەگى كەلىسىمگە بايلانىستى راتيفيكاسيالىق زاڭ جوباسىن ماقۇلدادى.
اتالعان كەلىسىم اقپاراتتى ترانسشەكارالىق بەرۋدى ۇيىمداستىرۋ، الەۋەتتى جانە ناقتى قاۋىپ-قاتەرلەردەن اقپاراتتىق جۇيەلەر مەن رەسۋرستاردى قورعاۋ تەحنولوگياسىن جەتىلدىرۋ، اقپاراتتى قورعاۋ قۇرالدارىن سەرتيفيكاتتاۋدىڭ جانە سەرتيفيكاتتاۋ ناتيجەلەرىن ءوزارا تانۋدىڭ كەلىسىلگەن ءتارتىبىن بەلگىلەۋ باعىتىنداعى ىنتىماقتاستىقتى ارتتىرۋعا مۇمكىندىك بەرەدى.
حالىق قالاۋلىلارى جالپى وتىرىستا ارحيۆ ءىسى جونىندەگى تۇزەتۋلەرگە دە قولداۋ ءبىلدىردى.
بۇل كۇنى ءماجىلىس اقش پەن مەملەكەتتىك اۋە كەمەلەرىنە اەروناۆيگاسيالىق قىزمەت كورسەتۋ ءۇشىن تولەماقى الۋعا قاتىستى، سونىمەن بىرگە، قازاقستان ۇكىمەتى مەن بۇۇ ازىق-تۇلىك جانە اۋىل شارۋاشىلىعى ۇيىمى (فاو) اراسىنداعى فاو-نىڭ ءبىزدىڭ ەلدەگى بايلانىس جانە ارىپتەستىك جونىندەگى بيۋروسىن قۇرۋ تۋرالى، سونداي-اق، قىتايمەن قورعاس وزەنىندە «شۇكىربۇلاق (المالى)» بىرلەسكەن سەل ۇستايتىن بوگەتىن سالۋداعى ىنتىماقتاستىق تۋرالى ۇكىمەتارالىق كەلىسىمدەردى جانە 2009 جىلعى 17 قاراشاداعى رەسەيمەن «بايقوڭىر» كەشەنىن جالعا الۋ جاعدايىندا بايقوڭىر عارىش ايلاعىنىڭ پەرسونالىنا، بايقوڭىر قالاسىنىڭ، تورەتام جانە اقاي كەنتتەرىنىڭ تۇرعىندارىنا مەديسينالىق قىزمەت كورسەتۋ ءتارتىبى تۋرالى ۇكىمەتارالىق كەلىسىمگە وزگەرىستەر ەنگىزۋ تۋرالى حاتتامانى راتيفيكاسيالاۋعا قاتىستى زاڭ جوبالارىن جۇمىسقا قابىلدادى.
