ەلباسى تاجىكستان پرەزيدەنتى ەمومالي راحمونعا «پاراسات» وردەنىن تابىستادى دەپ حابارلايدى Qamshy.kz اقپارات اگەنتتىگى.
بۇگىن مەملەكەت باسشىسى نۇرسۇلتان نازاربايەۆتىڭ شاقىرۋىمەن ەلىمىزگە تاجىكستان پرەزيدەنتى ەمومالي راحمون رەسمي ساپارمەن كەلگەن بولاتىن.
بۇگىنگى رەسمي كەزدەسۋ كەزىندە ەلباسى مەن تاجىكستان پرەزيدەنتى ءبىرقاتار ماسەلەلەردى تالقىلادى.
ەستەرىڭىزگە سالا كەتسەك، 15 ناۋرىزدا نۇرسۇلتان نازاربايەۆ پەن ەمومالي راحمون ورتالىق ازيا ەلدەرى باسشىلارىنىڭ استانادا وتەتىن جيىنىنا قاتىسادى.
ە.راحمون نۇرسۇلتان نازاربايەۆقا قازاقستانعا شاقىرعانى ءۇشىن جانە جوعارى ماراپات تابىس ەتكەنى ءۇشىن العىس ءبىلدىردى.
– قازاقستانعا كەلگەن ءار ساپارىمدا استانانىڭ كەلبەتى جىلدام وزگەرىپ كەلە جاتقانىن بايقايمىن. بۇل جەتىستىك، ەڭ الدىمەن، ءسىزدىڭ دانا ءارى كورەگەن ساياساتىڭىزدىڭ جەمىسى بولىپ سانالادى، – دەدى تاجىكستان رەسپۋبليكاسىنىڭ پرەزيدەنتى.
ە.راحمون ەكى ەل اراسىنداعى ساۋدا-ەكونوميكالىق قارىم-قاتىناستىڭ قارقىندى دامىپ كەلە جاتقانىنا توقتالىپ، ونى ءارى قاراي ىلگەرىلەتە تۇسۋگە نيەتتى ەكەنىن اتاپ ءوتتى.
– تاۋار اينالىمىنىڭ كولەمى جونىنەن قازاقستان تاجىكستاننىڭ جەتەكشى ەكونوميكالىق ارىپتەستەرى اراسىندا ەكىنشى ورىنعا يە. ءبىز ەلدەرىمىزدىڭ كەشەندى ءارى ستراتەگيالىق قارىم-قاتىناستارىن نىعايتۋعا نيەتتىمىز، – دەدى تاجىكستان رەسپۋبليكاسىنىڭ پرەزيدەنتى.
