استانا سوتى بۇرىنعى ۇلتتىق ەكونوميكا ءمينيسترى، سىبايلاس جەمقورلىق ايىبى تاعىلعان قۋاندىق بيشىمبايەۆتى 10 جىلعا سوتتادى، دەپ حابارلادى ازاتتىق سوت زالىنان تىكەلەي تاراتىلىم جاساپ.

سۋديا قۋاندىق بيشىمبايەۆتى قىلمىستىق كودەكستىڭ 28-بابىنىڭ 3ء-بولىمى ("قىلمىستىق قۇقىق بۇزۋشىلىق جاساۋدى ۇيىمداستىرعان نەمەسە ونىڭ ورىندالۋىنا باسشىلىق ەتۋ، سول سياقتى قىلمىستىق توپتى قۇرۋ نە وعان باسشىلىق ەتۋ")، 189-بابى 4ء-بولىمىنىڭ 2-تارماعى ("توپ بولىپ نەمەسە استىرتىن ءسوز بايلاسىپ، سەنiپ تاپسىرىلعان بوتەن ءمۇلiكتi يەمدەنiپ الۋ نەمەسە تالان-تاراجعا سالۋدى ۇيىمداستىرۋ") بويىنشا ايىپتى دەپ تانىدى. سوت سونىمەن قاتار بيشىمبايەۆتى مەملەكەتتىك باسشىلىق قىزمەتتى اتقارۋ قۇقىعىنان ءومىرباقيعا ايىرىپ، قىلمىستىق جولمەن الىنعان مۇلكىن تاركىلەۋگە ۇكىم كەستى. سوت بۇعان قوسا پرەزيدەنتتىڭ اتىنا ەكس-مينيستردى مەملەكەتتىك "قۇرمەت" وردەنىن قايتارىپ الۋ تۋرالى ۇسىنىس جاساۋعا ۇيعاردى.

8 اي ۇلتتىق ەكونوميكا ءمينيسترى بولعان بيشىمبايەۆ 2016 جىلى 28 جەلتوقساندا تۇتقىندالعان. 

قۋاندىق بيشىمبايەۆتىڭ «بايتەرەك» ۇلتتىق باسقارۋ حولدينگى» اق باسقارما ءتوراعاسى بولعان كەزدەگى، «Orda Glass» ج ش س مەن «شىمكەنتحيممونتاج» ج ش س ارقىلى قىزىلورداداعى تاباق شىنى ءوندىرۋ جانە وڭدەۋ زاۋىتىنىڭ قۇرىلىسىنان ءبىر ميلليارد تەڭگەنى جىمقىرۋ بويىنشا قىلمىستىق سحەمانى ۇيىمداستىرعان دەپ ايىپ تاعىلعان. بيشىمبايەۆ تەرگەۋ جۇمىستارى بارىسىندا وزىنە قىسىم جاسالعانى تۋرالى مالىمدەگەن بولاتىن.

ايتا كەتەر بولساق، 30 جەلتوقسان كۇنى پرەزيدەنت نازاربايەۆ بۇرىنعى ەكونوميكا ءمينيسترى قۋاندىق بيشىمبايەۆقا قاتىستى تەرگەۋ شارالارى جۇرگىزىلىپ جاتقانىن ايتقان ەدى. 

ەسكە سالساق، 1980 جىلدىڭ تۋماسى، جاس كادرلار وكىلى بولعان بيشىمبايەۆ «بولاشاق» باعدارلاماسى بويىنشا دج. ۆاشينگتون ۋنيۆەرسيتەتىن بىتىرگەن.