بالا قۇقىقتارى جونىندەگى ۋاكىل، دەپۋتات زاعيپا بالييەۆا سارىاعاشتاعى زورلىقتىڭ قۇربانى بولۋى مۇمكىن مەكتەپ وقۋشىسىمەن كەزدەستى، دەپ جازادى Qamshy.kz اقپارات اگەنتتىگى. كەزدەسۋدەن سوڭ دەپۋتات بالانىڭ جاعدايى تۋرالى جۋرناليستەرگە بەرگەن سۇحباتىندا ايتىپ بەردى.

بالييەۆانىڭ ايتۋىنشا، بالانىڭ قۇقىقتارى مەن قاۋىپسىزدىگىن قامتاماسىز ەتۋ ءۇشىن وعان ءتۇرلى سۇراقتار قويۋعا تىيىم سالۋ تۋرالى شەشىم قابىلدانعان.

ء-تىپتى بالاعا مەن دە ەشقانداي سۇراق قويا المايمىن. مەنىڭ مىندەتىم – بالانىڭ قاۋىپسىزدىگىن قامتاماسىز ەتۋ. قازىرگى ۋاقىتتا ونىڭ جانىندا جاقىندارى مەن پسيحولوگ بار. تەرگەۋشىنىڭ نۇسقاۋى بويىنشا، بالانىڭ كوزىنشە زورلىق تۋرالى اڭگىمە بولماۋى ءتيىس. بالا تىنىعۋ قاجەت. جاعدايى جاقسى، كوڭىلدى ءجۇر. مەنىڭشە، تاعى ەكى-ۇش كۇن كۇتە تۇرۋ كەرەك»، - دەدى بالييەۆا.

سونداي-اق دەپۋتات بالانىڭ اناسى تابىلعانىن ءارى ونىمەن سويلەسە العانىن ايتتى.

-بالا ءقاۋىپسىز جەردە. اجەسى مەن تاتەسى جانىندا، مەن دە بارمىن.   اناسىن تاۋىپ، سويلەستىم. ولار ەرتەڭ مەنىمەن استاناعا ۇشادى. بالانىڭ تىنىعۋى ءۇشىن جايلى جاعداي جاساۋ قاجەت. سەبەبى الدا بولاتىن ساراپتامالار  بالانى كۇيزەلىسكە ۇشىراتۋى مۇمكىن. مەملەكەتتىك ورگان وكىلدەرى دارىگەرلەر، پسيحياترلار جانە پەدياترلاردى قامتاماسىز ەتۋگە دايىن»، - دەدى ول.

زاعيپا بالييەۆا بالامەن كەزدەسۋ ءۇشىن شىمكەنتكە 14 ناۋرىزدا تۇنگى ۋاقىتتا بارعان.

ايتا كەتەيىك، «وقو-داعى سارىاعاش اۋدانى اباي اۋىلىنىڭ جەتى جاستاعى تۇرعىنى زورلىقتىڭ قۇربانى بولدى» دەگەن حابار الەۋمەتتىك جەلىگە كەڭ تاراپ، جەرگىلىكتى باق-تىڭ نازارىنا ءىلىنىپ، الەۋمەتتىڭ اشۋ-ىزاسىن تۋدىرىپ، قاتتى تالقىلاۋعا ۇلاسقان. 14 ناۋرىز كۇنى باتىربەكوۆا مەن جيەنىن پوليسيا ۇستاعانى حابارلانعان. جەرگىلىكتى قوعام بەلسەندىسى دىنمۇحامەد ارتىقوۆتىڭ ايتۋىنشا، باتىربەكوۆا مەن ونىڭ جيەنىن سارسەنبى كەشكى ساعات 20.00 شاماسىندا شىمكەنت ۆوكزالىنان الماتىعا جۇرەيىن دەپ تۇرعان جەرىنەن جيىرما شاقتى پوليسەي كۇشتەپ الىپ كەتكەن بولاتىن.