وزبەكستان پرەزيدەنتى شاۆكات ميرزيايەۆ اقورداعا كەلدى، دەپ جازادى Qamshy.kz اقپارات اگەنتتىگى.

بۇگىن استانادا وتەتىن ورتالىق ازيا باسشىلارىنىڭ كەزدەسۋىنە قاتىسۋعا كەلگەن وزبەكستان پرەزيدەنتى شاۆكات ميرزيايەۆتى ەلباسى قابىلدادى.

ق ر ەلباسى وزبەكستان باسشىسىن ىستىق ىقىلاسپەن كۇتىپ الدى.

«شاۆكات مىرزا، قوش كەلدىڭىز قازاقستانعا، قاتتى كۇتەمىز، ساعىندىق، كەزدەسپەگەنىمىزگە ءبىراز بولدى. ساعىندىق. كوپ شارۋالار جاساپ جاتىرسىز. كورشىلەردىڭ بارىنە بارىپ قايتتىڭىز. بارلىعىن تۇزەپ جاتىرسىز. ەكى ەلىمىزدىڭ اراسىنداعى اينالىم ءسىز ايتقان 2 ميلليارد دوللارعا جەتتى. وسى جىلى كوپتەگەن جۇمىستاردى اتقاردىق، كورشىلەرىمىزبەن دوستىق قاتىناس ورناتتىق. ونداعان جىلدار بويى شەشىلمەي كەلە جاتقان ساۋدا-ساتتىق ماسەلەسىن جانە باسقا دا ماسەلەلەردىڭ شەشىمىن تاپتىق. ورتالىق ازيا باسشىلارىنىڭ كەزدەسۋى جايلى پىكىردى دە ءسىز ايتىپ ەدىڭىز، بۇگىن بەس ەلدىڭ باسشىلارى كەزدەسىپ وتىرمىز. ءبىز بارلىعىمىز باۋىرلاس ەلدەرمىز، ساياسي ماسەلەلەر تۋىنداعان ەمەس. وسى جەردە كوپتەگەن ماسەلەلەردى – ەكونوميكا، ءوزارا قارىم-قاتىناس، ساۋدا-ساتتىق، بايلانىس، ترانسپورت ماسەلەلەرىن تالقىلايتىن بولامىز»، - دەدى نۇرسۇلتان نازاربايەۆ.

«قۇرمەتتى نۇرسۇلتان ءابىش ۇلى، مەن جانە ءبىر مارتە ءسىزدى كورگەنىمە بەك قۋانىشتىمىن. البەتتە سىزبەن كەزدەسكەنىمىزدەن بەرگى ءبىر جارىم جىل ىشىندە ەكى دوس حالىق اراسىنداعى قارىم-قاتىناس مۇلدە باسقا ارناعا اۋىستى. ءبىز كۇتپەگەن ناتيجەلەرگە قول جەتكىزدىك. سىزبەن كەزدەسكەننەن بەرى قاراي بارلىق الاڭدا ىلگەرىلەۋشىلىك بار، ەكونوميكالىق اينالىمنىڭ ءبىر جىلدىڭ ىشىندە 2 ميلليارد دوللار بولعانى ۇلكەن ناتيجە. باسقا بارلىق ۇمىتتەرىمىز بەن سەنىمدەرىمىزدىڭ ورىندالعانى ادامداردىڭ جۇزدەرىنەن اق كورىنەدى. شەكارالاردى اشقانىمىز، ترازيتتەر مەن تاريفتەردىڭ وزگەرگەنى، تەك تەمىرجولدىڭ وزىندە تاۋاراينالىمى 44 پايىز پايىزعا دەيىن ءوسۋ – ۇلكەن ناتيجە. الداعى ۋاقىتتا دا بىرگە كوپتەگەن ماسەلەلردى شەشەتىن بولامىز»، - دەدى وزبەكستان باسشىسى شاۆكات ميرزيايەۆ.

ايتا كەتەتىن بولساق، ورتالىق ازيا ەلدەرى، سونىڭ ىشىندە قازاقستان رەسپۋبليكاسى، قىرعىز رەسپۋبليكاسى، تاجىكستان رەسپۋبليكاسى، تۇرىكمەنستان جانە وزبەكستان رەسپۋبليكاسى باسشىلارىنىڭ جۇمىس (كونسۋلتاتيۆتىك) كەزدەسۋى 5 مەملەكەتتىڭ ىشىندەگى جاعدايلاردى، ەكونوميكا، ساۋدا-ساتتىق، ينفراقۇرىلىم، لوگيستيكا، سىندى بارلىق ماسەلەلەردى شەشۋگە باعىتتالعان.