قىرعىزستان پرەزيدەنتى ساۋرانباي جيەنبەكوۆ اقورداعا كەلدى، دەپ حابارلايدى Qamshy.kz اقپارات اگەنتتىگى.

قازاقستان پرەزيدەنتى نۇرسۇلتان نازاربايەۆ قىرعىز ارىپتەسىمەن كەزدەسۋ بارىسىندا ەكى ەل اراسىنداعى ىنتىماقتاستىقتىڭ نىعايا بەرەتىنىنە سەنىم ءبىلدىردى.

- قوش كەلدىڭىز، ساۋرانباي ءشارىپ ۇلى. بۇگىندە بىرنەشە ماسەلەلەر شەشىلىپ جاتىر. جول كارتامىز بار، ساۋدا-ساتتىق تا جاقسى بولىپ جاتىر. بولاشاقتا بارلىعى دۇرىس بولادى دەپ ەسەپتەيمىز. وزبەكستان، تاجىكستان ەلدەرىمەن ءالى دە كوپ جۇمىستار جاسايمىز. مۇنىڭ بارلىعى ەل ءۇشىن جاسالىپ وتىرعان ىستەر. بۇگىن بەس مەملەكەتتىڭ باسشىلارى كەزدەسىپ، تالقىلايتىن ماسەلەلەر بار. ءوزىمىزدىڭ ەكونوميكا، ساۋدا-ساتتىق، لوگيستيكا جانە باسقا دا ماسەلەلەردى شەشۋگە مۇمكىنشىلىك بولادى دەپ سانايمىن. ءوز پىكىرىڭىزدى ايتىڭىز، بىرلەسىپ شەشەمىز، - دەدى ەلباسى.

بۇگىن استانادا ورتالىق ازيا مەملەكەتتەرىنىڭ باسشىلارى كەزدەسەدى. باۋىرلاس ەلدەردىڭ جەتەكشىلەرى العاش رەت كرەملدىڭ قاتىسۋىنسىز ءوزارا جيىن وتكىزبەك.

بۇگىنگى جيىنعا قازاقستان، قىرعىزستان، تاجىكستان، وزبەكستان پرەزيدەنتتەرى جانە تۇركمەنستان پارلامەنتىنىڭ ءتوراعاسى قاتىسادى.