نۇرسۇلتان نازاربايەۆ رەسەيدە وتەتىن پرەزيدەنت سايلاۋىنا قاتىستى پىكىر ءبىلدىردى، دەپ حابارلايدى Qamshy.kz اقپارات اگەنتتىگى.

ەلباسى استانادا ءوتىپ جاتقان ورتالىق ازيا ەلدەرى باسشىلارىنىڭ كەزدەسۋى رەسەي جانە جۇڭگو سياقتى ايماقتاعى ۇلكەن ەلدەرمەن قارىم-قاتىناسىنا اسەر ەتپەيتىنىن ايتتى.

– ارينە، ءبىز ورتا ازيا ەلدەرى عانا جينالىپ الىپ، بۇل ماسەلەلەردىڭ شەشىمىن تاۋىپ وتىرعان جوقپىز. ءبىزدىڭ ۇلكەن كورشىلەرىمىز بار، ول – رەسەي مەن جۇڭگو حالىق رەسپۋبليكاسى. بۇل ەلدەرمەن دە ۇلكەن قارىم-قاتىناستامىز. ترانسپورت ىسىنە رەسەيمەن تىعىز بايلانىستا بولساق، جىبەك جولىنا قاتىستى قىتايمەن بىرگە جۇمىس ىستەپ كەلەمىز. ءبىز بۇل ۇلكەن كورشىلەرىمىزبەن ارى قاراي دا تىعىز قارىم-قاتىناستا بولامىز، بولعىمىز دا كەلەدى. بارشامىز رەسەيدەگى سايلاۋدىڭ جاقسى وتۋىنە تىلەكتەسپىز جانە ۆلاديمير ۆلاديميروۆيچ پۋتين مىرزاعا ۇلكەن جەتىستىك تىلەيمىز، - دەدى نۇرسۇلتان نازاربايەۆ.

ايتا كەتەيىك، ورتالىق ازيا ەلدەرىنىڭ باسشىلارى تمد، شىۇ، ۇقشۇ، يسلام كونفەرەنسياسى ۇيىمى، بۇۇ نەمەسە ەقىۇ ءتارىزدى ءىرى ۇيىمدار اياسىندا جينالاتىن، ونىڭ بارىنە رەسەي دە قاتىساتىن. ال بۇل جولعى كەزدەسۋ رەسەي باسشىسىنىڭ قاتىسۋىنسىز ءوتىپ جاتىر.