نۇرسۇلتان نازاربايەۆ ورتالىق ازيا ەلدەرىنىڭ باسشىلارىن اقوردادا قارسى الىپ، بۇگىنگى كەزدەسۋدىڭ ماڭىزدىلىعىنا توقتالىپ ءوتتى، دەپ حابارلايدى Qamshy.kz اقپارات اگەنتتىگى. 

– بۇگىن استانادا تاجىكستان، وزبەكستان، قىرعىزستان پرەزيدەنتتەرى مەن تۇركمەنستان پارلامەنتى باسشىسىمەن كەزدەسىپ وتىرمىز. ەلىمىزدىڭ استاناسىندا سىزدەردى كورگەنىمە وتە قۋانىشتىمىن. ورتالىق ازيا ەلدەرى باسشىلارىنىڭ كونسۋلتاتيۆتىك كەزدەسۋىن وتكىزۋ باستاماسىن وزبەكستان پرەزيدەنتى شاۆكات ميرزيايەۆ كوتەرگەن بولاتىن. بۇگىن وزدەرىڭىزبەن اقىلداسا وتىرىپ، كوپتەگەن ماسەلەنىڭ شەشىمىن تابامىز. سوڭعى رەت 9 جىل بۇرىن كەزدەسىپ ەدىك. سودان بەرى جينالعانىمىز وسى. ارينە، بىر-بىرىمىزبەن قارىم-قاتىناسىمىزدى ۇزگەن جوقپىز، كەزدەسىپ، ارالاسىپ تۇردىق، الايدا بارلىعىمىز جينالعان باسقوسۋ بولمادى. بۇگىنگى جۇمىس ءتارتىبىمىزدى بىلايشا جوسپارلاۋعا ۇسىنىس بىلدىرەمىن: ەڭ الدىمەن مەن پىكىرىمدى ايتايىن، كەيىننەن اركىم ءوز قالاۋى بويىنشا سويلەسىن، - دەدى ەلباسى ءوزىنىڭ كىرىسپە سوزىندە.

ارى قاراي نۇرسۇلتان نازاربايەۆ وسى ۋاقىتقا دەيىن اتقارىلعان جۇمىستارعا توقتالىپ، بۇگىنگى كەزدەسۋدىڭ ماقساتىن ايتىپ ءوتتى.

– قازاقستان قاشان دا كورشىلەرىمەن تىعىز ەكونوميكالىق قارىم-قاتىناس ورناتۋدى كوزدەگەن. اسىرەسە، ءتۇبىمىز ءبىر، مادەنيەتىمىز بەن تاريحىمىز ورتاق بولعان ورتالىق ازيا مەملەكەتتەرىمەن. مۇنداي كەزدەسۋلەردىڭ باستى سەبەبى – بىرىنشىدەن، مەملەكەتتەردىڭ پوتەنسيالىن بىرىكتىرۋ؛ ەكىنشىدەن، ءوزارا ساۋدا-ساتتىق اينالىمىن ۇلعايتۋ؛ ۇشىنشىدەن، مەملەكەت قاۋىپسىزدىگىن نىعايتۋ؛ تورتىنشىدەن، اتالمىش ەلدەردىڭ حالقىن جاقىنداستىرۋ. سوڭعى جىلدارى بۇل ەلدەردىڭ اراسىندا ساياسي قاتىناس نىعايا تۇسكەنىنە قۋانامىن.

مەن بۇۇ قاۋىپسىزدىك كەڭەسىندە ءتوراعا قىزمەتىن اتقارعان كەزىمدە ءبىزدىڭ مينيسترلەردى نيۋ-يورك قالاسىندا كورىپ قۋانىپ قالدىم، بۇل ۇلكەن قولداۋ بولدى. سوندىقتان ءبىز ۇنەمى ءبىر-بىرىمىزدى قولداپ، بىرلەسە جۇمىس اتقارۋىمىز كەرەك. بىلتىرعى ناۋرىز ايىنان باستاپ ءبىر جىلدىڭ ىشىندە ورتالىق ازيا ەلدەرىنىڭ باسشىلارى بىر-بىرىمەن كەزدەسۋلەر وتكىزدى. كورشىلەس ەلدەر اراسىندا وزبەكستان باسشىسىنىڭ جۇمىسىن ەرەكشە اتاپ وتكىم كەلەدى. سوڭعى 20 جىلدا شەشىمىن تاپپاعان كوپتەگەن ماسەلەنىڭ باسىن اشىپ بەردى. سونىمەن قاتار قىرعىزستان ەلىنىڭ جاڭا باسشىسىنىڭ دا اتقارعان ىستەرىن اتاپ وتۋگە بولادى. تاجىكستان پ«رەزيدەنتى ەمومالي راحمون مىرزا دا بيىل سۋ ماسەلەسىنە قاتىستى وتە جوعارى دەڭگەيدەگى كونفەرەنسيا ۇيىمداستىرىپ وتىر. ءبىز ونى قاشان دا قولدايمىز. بيىل ارالدى قۇتقارۋ ۇيىمىنا 25 جىل تولىپ وتىر، – دەدى ەلباسى.

ايتا كەتەيىك، ورتالىق ازيا ەلدەرى، سونىڭ ىشىندە قازاقستان، قىرعىز رەسپۋبليكاسى، تاجىكستان، تۇرىكمەنستان جانە وزبەكستان باسشىلارىنىڭ كونسۋلتاتيۆتىك كەزدەسۋى 5 مەملەكەت اراسىنداعى ەكونوميكا، ساۋدا-ساتتىق، ينفراقۇرىلىم، لوگيستيكا سالاسىنداعى ماسەلەلەردى شەشۋگە باعىتتالعان.