بۇگىن، 15 ناۋرىزدا الماتى مەتروپوليتەنى «م.اۋەزوۆ دراما تەاترى» بەكەتىندە م.اۋەزوۆ اتىنداعى قازاق مەملەكەتتىك اكادەميالىق دراما تەاترى «تەاتر الەمى» اتتى كورمەنىڭ لەنتاسىن قيدى. سالتاناتتى تۇردە اشىلعان كورمە ەلباسى ن.ءا.نازاربايەۆتىڭ «رۋحاني جاڭعىرۋ» باعدارلاماسى اياسىندا جانە تەاتر مۋزەيىنىڭ 50 جىلدىعىنا وراي ۇيىمداستىرىلدى.

بۇل كورمە – وسكەلەڭ ۇرپاققا، تەاتر ونەرىنە، تاريحىنا قىزىعاتىن ىزدەنۋشىلەرگە، جالپى ونەرسۇيگىش قاۋىمعا قازاق ونەرىنىڭ قاراشاڭىراعى، 92 جىلدىق تاريحى بار م.اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ قۇرىلعان كەزەڭىنەن باستاپ بۇگىنگى كۇنگە دەيىنگى ونەر شەجىرەسىنەن سىر شەرتىپ، تەاتر مۋزەيىنىڭ تىنىس-تىرشىلىگىنەن، مول مۇرا، قۇندى جادىگەرلەرى تۋرالى  ماعلۇمات بەرەدى.

تەاتر ارتيستەرىنىڭ ءار جىلدارى ءارقانداي قويىلىمداردا كيگەن ساحنالىق كوستيۋمدەرى، فوتوسۋرەتتەر مەن پورترەتتەر، افيشالار مەن باعدارلامالار، ونەر مايتالماندارىنىڭ جەكە زاتتارى جانە ت.ب. قۇندى جادىگەرلەر كورمەدەن ورىن الدى.

كورمەنىڭ لەنتاسى قيىلماس بۇرىن تەاتر حورى «ايتتىم سالەم قالامقاس» دەپ اۋەلەتىپ ءان شىرقاسا، تەاتر ارتيستەرى رەپەرتۋارداعى «قىز جىبەك» سپەكتاكلىنەن اريالار ورىندادى. ال، ن.نازاربايەۆتىڭ سوزىنە جازىلعان ب.تىلەۋحاننىڭ «جەرىم مەنىڭ» ءانى جيىلعان قاۋىمدى ءبىر سەرپىلتىپ تاستادى.

ەلباسى ن.ءا.نازاربايەۆتىڭ «بولاشاققا باعدار: رۋحاني جاڭعىرۋ»  اياسىنداعى ۇلى دالا اسپانىنا الاش ارمانىن الىپ شىعاتىن ايتۋلى شارالاردىڭ ءبىرى، ۇلت مۇراتى ءۇشىن بىتىمگەرشىلىك پەن بىرلىكتى ماقسات تۇتقان،  92 جىلدىق تاريحى بار تەاترىمىزدىڭ قازىنالى جادىگەرلەرى مەن مۇرالارىن 50 جىل بويى ەل يگىلىگىنە جاراتىپ كەلە جاتقان تەاتر مۋزەيىنىڭ اسىل دۇنيەلەرى مەن تەاتر رۋحانياتىن بىرىكتىرگەن «الماتى مەتروپوليتەن» مەكەمەسىمەن بىرلەسىپ جاساعان ءىس- شارامىز مادەنيەتكە قوسىلعان تاعى ءبىر ۇلەس دەپ بىلەمىز.

بۇل – مادەنيەتىمىز بەن يدەولوگيامىزدى دامىتۋ جولىندا جاسالعان ناقتى ارەكەت ءارى وسكەلەڭ ۇرپاقتى تەاتر سىندى رۋحاني ازىق بەرەر ورىندارعا شاقىرۋدىڭ ءبىر جولى جانە «رۋحاني جاڭعىرۋ» مەن ۇلتتىق كود سىندى ۇعىمداردىڭ حالىققا كەڭىنەن ناسيحاتتالۋىنا اسەر ەتەر فاكتور بولادى دەگەن سەنىمدەمىز.