بۇگىن وڭتۇستىك قازاقستان وبلىسىنىڭ اكىمى جانسەيىت تۇيمەبايەۆ قازاقستان رەسپۋبليكاسى ۇلتتىق ۇلانى باس قولباسشىسىنىڭ تاربيە جانە الەۋمەتتىك-قۇقىقتىق جۇمىستارى جونىندەگى ورىنباسارى گەنەرال-مايور مۇحامەتقالي ساتوۆتى جانە ۇلتتىق ۇلان جاۋىنگەرلەرى: «ايبىن» وردەنىنىڭ يەگەرى اعا لەيتەنانت ەربول وتاربايەۆ پەن «جاۋىنگەرلىك ەرلىگى ءۇشىن» مەدالىنىڭ يەگەرى سىرىم سۇندەتوۆتى اتا-انالارىمەن بىرگە قابىلدادى.
كەزدەسۋ بارىسىندا ءوڭىر باسشىسى وڭتۇستىكتەن شىققان ەر جاۋىنگەرلەردىڭ ەڭبەگىنە جوعارى باعا بەرىپ، تاربيەلەپ وسىرگەن اتا-انالارىنا ريزاشىلىعىن ءبىلدىردى جانە ولاردىڭ ەرلىك ۇلگىسىندە وسكەلەڭ ۇرپاقتى تاربيەلەۋ كەرەك ەكەنىن اتاپ ءوتتى.
ءوز كەزەگىندە ءسوز العان گەنەرال-مايور مۇحامەتقالي ساتوۆ، وڭىردەن شىققان جاۋىنگەرلەردىڭ ەرلىك وقيعاسى اسكەردەگى تاربيە جۇمىستارىنىڭ وزەگىنە ارقاۋ بولعانىن اتاپ ءوتتى. سونداي-اق كەشە عانا قازاقستاندىق كينوتەاترلاردا كەڭ پروكاتتا كورسەتىلە باستاعان ۇلتتىق ۇلان جاۋىنگەرلەرىنىڭ باتىلدىعى مەن قايسارلىعىن باياندايتىن «التىنشى بەكەت» كوركەم ءفيلمى تۋرالى ءسوز قوزعاپ، ونىڭ جاستاردى قازاقستاندىق پاتريوتيزم رۋحىندا تاربيەلەۋ جۇمىسىندا ويىپ ورىن الاتىنىن تىلگە تيەك ەتتى.
كەزدەسۋ سوڭىندا وبلىس اكىمى جانسەيىت تۇيمەبايەۆ ەرجۇرەك جاۋىنگەرلەردى العىس حاتپەن ماراپاتتاپ، باعالى سىيلىقتار تاپسىردى. ال، باتىرلاردىڭ اتا-انالارىنا قازاقى داستۇرمەن شاپان جاۋىپ، قامزول كيگىزدى.
