16 ناۋرىزدا الماتى وبلىسى ەڭبەكشىقازاق اۋدانى قاراكەمەر ەلدى مەكەنىندە، قازاقستان رەسپۋبليكاسى ۇلتتىق ۇلانى  6654 اسكەري ءبولىمىنىڭ بازاسىندا كينولوگ-مامانداردى ەسىرتكى تابۋ اياسىندا وتكىزىلگەن بىلىكتىلىكتى جوعارىلاتۋ  (قايتا دايارلاۋ)  كۋرستارىنىڭ جابىلۋ سالتاناتى ءوتتى، دەپ جازادى Qamshy.kz اقپارات اگەنتتىگى.

شارا اياسىندا اتالعان وقۋ كۋرسىن وقىعانى تۋرالى سەرتيفيكاتقا ۇلتتىق ۇلاننىڭ بەس كينولوگ-مامانى يە بولدى.

ۇلتتىق ۇلاندا ەسىرتكى ىزدەۋشى ءيىسشىل يتتەردى قولدانۋ ساراپتاماسى وڭ كورسەتكىشتەرگە باستايتىندىعى بايقالعان. وسىلايشا، وتكەن جىلى ەلىمىزدىڭ ءار ءتۇرلى وڭىرىندە ەسىرتكى زاتتارىن تاركىلەۋ بويىنشا 56 دەرەك تىركەلدى. ناقتىلاي تۇسسەك، ماريحۋانا، گەروين، گاشيش سياقتى 103 كەلى ەسىرتكى زاتى تابىلىپ، تاركىلەنگەن. بۇل وسى كۇندەرى كينولوگتار قىزمەتتىك-جاۋىنگەرلىك تاپسىرمالاردى ورىنداۋدا ءيىسشىل يتتەردى ءساتتى قولدانىپ كەلە جاتقانىن كورسەتەدى.

ال يتتەردى دايىنداۋ قاراكەمەر كەنتىندە ورنالاسقان ۇلتتىق ۇلاننىڭ كينولوگيالىق ورتالىعىندا جۇزەگە اسىرىلۋدا. ءيىسشىل يتتەر ىزدەۋ، پاترۋلدىك-ىزدەۋ، قاراۋىلدىق قىزمەت پەن ەسىرتكى جانە جارىلعىش زاتتاردى ىزدەۋ، شابۋىلداۋ مەن اسكەري-جاۋىنگەرلىك جاتتىعۋلاردا قولدانۋ ماقساتىندا دايارلانادى. تاعى ءبىر ايتا كەتەرلىگى، وسى كەزگە دەيىن مۇنداي باعىتتاعى جاتتىعۋلار تۇركيا مەن اۆستراليادا ۇيىمداستىرىلعان بولاتىن.

بۇل جولى ۇلتتىق ۇلان كينولوگتارى ءۇشىن تاجىريبەلىك كومەكتى امەريكالىق ارىپتەستەر كورسەتتى. سەرتيفيكاتتاردى تاپسىرۋ سالتاناتىنا ەسىرتكىمەن كۇرەس بويىنشا باعدارلامانىڭ مەنەدجەرى مايور كريستوفەر كەنت، اقش-تىڭ الماتى قالاسىنداعى باس كونسۋلى مارك مۋدي مەن كينولوگ-نۇسقاۋشى بريۋس گۋدەيل جانە سكوتت زايتنەر قاتىستى.

جيىندا ءسوز العان كريستوفەر كەنت ەسىرتكىمەن كۇرەس قازاقستاندا عانا ەمەس، الەمدىك قاۋىمداستىق ءۇشىن دە كۇن تارتىبىنەن تۇسپەيتىن ماسەلە بولىپ تابىلاتىنىن ايتتى. «وسىنداي كۋرستاردى وتكىزۋ ارقىلى ءبىز تاجىريبە الماسىپ، بىلىكتىلىگىمىزدى شىڭدايمىز. بۇل باعىتتا قازاقستاندىق ارىپتەستەرىمىز ءبىزدىڭ سەنىمدى سەرىكتەسىمىز بولىپ تابىلادى. سوندىقتان دا الەمدىك قاۋىپسىزدىكتى كوزدەيتىن وسىنداي ناتيجەلى ىقپالداستىعىمىز ودان ءارى جالعاسا تۇسەدى دەپ ويلايمىن»، دەدى.

ءوز كەزەگىندە ۇلتتىق ۇلان باسشىلىعى اقش ەلشىلىگىنىڭ اسكەري ىقپالداستىق پەن قاۋىپسىزدىك ءبولىمى كەلىسىم اياسىندا ەسىرتكىلەردى تابۋ شەبەرلىگىن شاڭداۋ كۋرستارى العاش رەت ۇيىمداستىرىلىپ جاتقانىن تىلگە تيەك ەتتى. «وقىتۋدى امەريكادان كەلگەن جوعارى بىلىكتى ماماندار وتكىزدى. ۇلتتىق ۇلان كينولوگتارى كۋرس بارىسىندا جاقسى ناتيجەلەر كورسەتتى. بۇل تاجىريبە ولاردىڭ ەسىرتكى بيزنەسىمەن كۇرەس بويىنشا اسكەري – جاۋىنگەرلىك تاپسىرمالاردى شەشۋدە ءساتتى قولدانىلاتىن بولادى»، دەدى ۇلتتىق ۇلاننىڭ جاۋىنگەرلىك قىزمەت باس باسقارماسىنىڭ باستىعى پولكوۆنيك بااتر بامبۋكوۆ.

سونىمەن قاتار، ۇلتتىق ۇلان كينولوگتارىن اقش-تىڭ كونتراباندامەن كۇرەس بويىنشا تاجىريبەلى ماماندارى ۇيرەتتى.

امەريكالىقتار ساقىلداعان سارى اياز بەن 40-گرادۋستىق ىستىقتا ءيىسشىل يتتەرمەن جۇمىس ىستەۋدىڭ ادىستەرىن كورسەتىپ، تاجىريبەلەرىمەن ءبولىستى. حالىقارالىق ترەنينگ ءتورت اپتاعا سوزىلدى. كۋرس سوڭىندا قاتىسۋشىلار قورىتىندى ەمتيحان تاپسىرىپ، سەرتيفيكاتتارعا يە بولدى.  

شارانى وتكىزۋ بارىسىندا قىزمەتتىك يتتەرمەن ەسىرتكى زاتتارىن تابۋ مەن قىلمىسكەرلەردى ۇستاۋ بويىنشا وقۋ ادىستەرى جۇرتشىلىق نازارىنا ۇسىنىلدى.