الماتىدا ۇلتتىق ۇلان قىزمەتكەرى ادام ءومىرىن ساقتاپ قالدى، دەپ حابارلايدى Qamshy.kz اقپارات اگەنتتىگى. 

16 ناۋرىزدا تاڭ الاگەۋىممەن قىزمەتكە كەلە جاتقان ۇلتتىق ۇلاننىڭ 3650 اسكەري ءبولىمىنىڭ اسكەري قىزمەتشىسى، قاراۋىل باستىعى پراپورششيك ن.نۇربايەۆ ۇشەۋدىڭ ءبىر ادامعا جابىلىپ جاتقانىن كورىپ، كومەككە كەلەدى. جەكپە-جەك ۇرىسىنىڭ تاسىلدەرىن قولدانعان ول ءبىر قۇقىقبۇزۋشىنى ۇستايدى، باسقالارى بەلگىسىز باعىتقا قاشىپ كەتەدى.

الماتى قالاسىنىڭ رايىمبەك داڭعىلىنىڭ ۇستىمەن وتەتىن جاياۋ جۇرگىنشىلەر كوپىرىندە ءۇش بۇزاقى قارسى كەلە جاتقان ادامنىڭ قۇندى زاتتارىن الماقشى بولىپ، شابۋىل جاساعانى بەلگىلى بولدى. سول جەردە تەكەتىرەس باستالىپ كەتكەن، بۇزاقى ۇشەۋگە جابىرلەنۋشى جالعىز ءوزى قارسى كەلەدى. تەكەتىرەس بارىسىندا بۇزاقىلاردىڭ بىرەۋى جابىرلەنۋشىگە ءتورت رەت پىشاق سۇعىپ العان. 

جاراقات العان ادامعا العاشقى مەديسينالىق كومەك كورسەتكەن پراپورششيك نۇربايەۆ پوليسيا قىزمەتكەرلەرىن، جەدەل مەديسينالىق كومەكتى شاقىرادى. قازىرگى ۋاقىتتا جابىرلەنۋشى س-نىڭ جاعدايى ءبىرقالىپتى.

پراپورششيك نۇربايەۆ نۇربول نيازاقىن ۇلى ۇلتتىق ۇلان قاتارىندا 20 جىلدان استام ۋاقىت قىزمەت ەتىپ كەلەدى. وتباسىلى، ءتورت بالاسى بار.

قۇقىقبۇزۋشىلاردى ۇستاۋدا باتىل ارەكەت ەتكەنى ءۇشىن 3650 اسكەري ءبولىمىنىڭ قولباسشىلىعى پراپورششيك ن.ن. نۇربايەۆتى كوتەرمەلەۋ تۋرالى جوعارى قولباسشىلىققا ۇسىنىس جاسادى. 

ۇلتتىق ۇلاننىڭ

«وڭتۇستىك» وڭىرلىك قولباسشىلىعى باسپا ءسوز قىزمەتى