قازاقستان رەسپۋبليكاسىنىڭ قىرعىز رەسپۋبليكاسىنداعى ەلشىلىگىندە ق ر پرەزيدەنتى نۇرسۇلتان نازاربايەۆتىڭ «تاۋەلسىزدىك ءداۋىرى» اتتى كىتابىنىڭ تۇساۋكەسەرى ءوتتى، دەپ حابارلايدى Qamshy.kz اقپارات اگەنتتىگ ق ر ءسىم باسپا ءسوز قىزمەتىنە سىلتەمە جاساي وتىرىپ. ءىس-شاراعا قىرعىز رەسپۋبليكاسىندا اككرەديتتەلگەن ديپلوماتيالىق كورپۋستىڭ، مينيسترلىكتەر مەن ۆەدومستۆولاردىڭ، قىرعىزستان حالقى اسسامبلەياسىنىڭ، قازاق دياسپوراسىنىڭ، بۇقارالىق اقپارات قۇرالدارىنىڭ، قىرعىزستان قوعامدىق-ساياسي جانە ىسكەر توپتارىنىڭ 150-دەن استام وكىلدەرى، سونداي-اق قازاق ينۆەستورلارى قاتىستى.
تۇساۋكەسەردە قازاقستان رەسپۋبليكاسىنىڭ توتەنشە جانە وكىلەتتى ەلشىسى كاريم كوكىرەكبايەۆ، قازاقستان رەسپۋبليكاسى پرەزيدەنتىنىڭ بۇرىنعى كەڭەسشىسى، ق ر ەڭبەك سىڭىرگەن قايراتكەرى، پروفەسسور، ەكونوميكا عىلىمدارىنىڭ دوكتورى س.پىرىمبەتوۆ، قىرعىز-قازاق ۋنيۆەرسيتەتىنىڭ رەكتورى، پروفەسسور، پەداگوگيكا عىلىمدارىنىڭ دوكتورى ا.قازماعامبەتوۆ، «قىرعىز تۋۋسۋ» گازەتىنىڭ جاۋاپتى حاتشىسى، «الەم جازۋشىلارى وداعىنىڭ مۇشەسى» ن.بايجىگىتوۆ بايانداما جاسادى.
قازاقستان ەلشىسى ك.كوكىرەكبايەۆ ءوز سوزىندە مەملەكەت باسشىسى ن.نازاربايەۆتىڭ «تاۋەلسىزدىك ءداۋىرى» اتتى كىتابىندا دامۋدىڭ «قازاقستاندىق مودەلىنىڭ» نەگىزگى قاعيداتتارى، تەتىكتەرى مەن قوزعاۋشى كۇشى باياندالعانىن، ەلدە توتاليتارلىق جۇيە قۇلاپ، نارىقتىق ەكونوميكا قالىپتاسقان جاڭعىرتۋدىڭ ءۇش تولقىنى سيپاتتالعانىن اتاپ كورسەتتى.
«كىتاپتىڭ باستى ەرەكشەلىگى - وقيعالار وسى تاريحي قۇبىلىستار مەن ۇدەرىستەردىڭ بەلسەندى قاتىسۋشىسى - ءبىزدىڭ ەلباسىمىزدىڭ اتىنان باياندالادى»، - دەدى ول. ەلشى كىتاپ پرەزيدەنتتىڭ جاڭا تەحنولوگيالاردى ەنگىزۋگە ەكپىن بەرىلگەن كەيىنگى جولداۋىمەن، سونداي-اق ق ر پارلامەنتى پالاتالارىنىڭ بىرلەسكەن وتىرىسىندا مەملەكەت باسشىسى ۇسىنعان «پرەزيدەنتتىك بەس الەۋمەتتىك باستامامەن» ۇشتاسىپ جاتىر دەگەن پىكىر ءبىلدىردى.
باسقا ءسوز سويلەۋشىلەر دە جاڭا قازاقستاننىڭ نەگىزگى قالىپتاسۋ كەزەڭدەرىنە، دامۋدىڭ قازاقستاندىق مودەلىنە نازار اۋداردى. اتاپ ايتقاندا، س.پىرىمبەتوۆ ەلىمىز قول جەتكىزگەن جەتىستىكتەر جەڭىلدىكپەن كەلمەگەنىن، مۇنىڭ ءبارى عىلىمي نەگىزدەمەلەردى، ەلىمىزدىڭ اۋقىمدى جاڭعىرۋىنىڭ قاتىسۋشىلارى - بارلىق قازاقستاندىقتاردىڭ كۇش جۇمىلدىرۋىن، ساياسي قۇرىلىستى قايتا قالىپتاستىرۋدى، ەتنوسارالىق قاتىناستاردى جەتىلدىرۋدى، تىرشىلىكتىڭ بارلىق سالالارىندا ساپالى رەفورمالاردىڭ ىسكە اسىرۋىن تالاپ ەتكەنىن باسا ايتتى. مۇنىڭ ءبارى پرەزيدەنتتىڭ كىتابىندا وقىرمانمەن ەركىن سۇحبات تۇرىندە ءوربيتىنىن ايتتى. ءار ادامعا قاراپايىم دا تۇسىنىكتى تىلمەن جازىلعان «تاۋەلسىزدىك ءداۋىرى» كىتابىنىڭ بىرەگەي تاريحي قۇجات رەتىندەگى قۇندىلىعىنا قىرعىز-قازاق ۋنيۆەرسيتەتىنىڭ رەكتورى ا.قازماعامبەتوۆ ايرىقشا ەكپىن بەردى.
«قازىرگى زامانعى كادرلاردى دايارلاۋعا جاۋاپتى جوعارى وقۋ ورنىنىڭ ۇجىمى قازاقستان دامۋىنىڭ قورىتىندىسى جاسالعان كىتاپتىڭ جارىققا شىعۋىن ۇلكەن قىزىعۋشىلىقپەن قابىلدادى. ءبىلىم الۋشى جاستار ءۇشىن اتالعان ەڭبەكتىڭ قۇندىلىعى ەرەكشە، سەبەبى وندا ءالى ەشبىر وقۋلىقتارعا ەنبەگەن ەلدىڭ دامۋ تاريحى تۋرالى ماڭىزدى اقپاراتتار جەتەرلىك»، - دەدى ول.
