جەتىسۋدىڭ باس قالاسى تالدىقورعاندا ۇلىستىڭ ۇلى مەرەكەسى - ناۋرىز مەيرامى سان-سالتاناتپەن تويلانىپ جاتىر. بيىل «جاستار» ساياباعىنا جينالعان حالىقتىڭ لەگى ەرەكشە كوپ.

تالدىقورعاندىقتار اسىرەسە قىرعىزستاننان كەلگەن ەرەكشە ونەر يەلەرىن ەرەكشە قىزىعۋشىلىقپەن تاماشالادى. 11 ادامنان قۇرالعان توپتىڭ باعدارلاماسىندا ادامنىڭ ۇستىمەن كولىكپەن ءجۇرىپ ءوتۋ، اۋىر گىر تاستارىن كوتەرۋ، بيىكتەگى ارقان جىپتە ءارتۇرلى تريۋكتار ورىنداۋ سىندى ونەرلەر بار. ولار سونداي-اق حالىقتىڭ اراسىندا ءتۇرلى ويىندار ۇيىمداستىرىپ، جينالعاندارعا بارىنشا كوتەرىڭكى كوڭىل-كۇي سىلاۋعا تىرىستى. جينالعان جۇرتتىڭ قۇرمەت-قوشەمەتىنە بولەنگەن 11 ادامنىڭ بارلىعى دا ءبىر اۋلەتتىڭ مۇشەلەرى ەكەن.

«سىزدەرگە ونەر كورسەتىپ جاتقان جاندار راحمانوۆتار اۋلەتىنىڭ التىنشى ۇرپاعى. ءوزىم ءقازىر وسى توپقا جەتەكشىلىك ەتۋدەمىن، 56 جاستامىن. بالا كۇنىمنەن ءبىزدى وسى ونەرگە باۋلىدى. ءقازىر بۇل ءداستۇرىمىز ۇرپاقتان-ۇرپاققا جالعاسىپ كەلە جاتىر.  توپتىڭ ەڭ كىشكەنتاي مۇشەسى 4 جاستا، ءوزىمنىڭ نەمەرەم (...). بۇل جولى تالدىقورعان قالاسى اكىمدىگىنىڭ شاقىرتۋىمەن ارنايى  كەلدىك. گونورارىمىز جاقسى بولادى دەپ ۇمىتتەنەمىز. ءبىراق قانشا بەرسە دە قاناعات تۇتامىز. جالپى تالدىقورعانعا ءبىرىنشى رەت كەلىپ تۇرمىز. نەگىزى  قازاقستاننىڭ الماتى،  وسكەمەن، شىمكەنت سىندى قالالارىندا بولىپ، ونەر كورسەتتىك. حالىقتىڭ ىقىلاسى، پەيىلى وتە جاقسى ەكەن. بارشاڭىزدى ۇلىستىڭ ۇلى مەيرامى - ناۋرىز مەرەكەسىمەن شىن جۇرەكتەن قۇتتىقتايمىز. ءار وتباسى باقىتتى بولسىن»، - دەدى اليشەر راحمانوۆ.

قىرعىزستاننىڭ وش قالاسىنان كەلگەن اۋلەتتىڭ ونەرىنە ءتانتى بولعان تالدىقورعاندىقتار ريزاشىلىعىن ءبىلدىرىپ،  ارنايى قوراپقا اقشالارىن دا سالىپ جاتتى.

جالپى ناۋرىز مەرەكەسى تويلانعان «جاستار» پاركىندە ساۋدا دا قىزا ءتۇستى. ماسەلەن ءتۇرلى ءمۋلتفيلمنىڭ پەرسوناجدارىمەن سۋرەتكە ءتۇسۋ قۇنى 500 تەڭگە. ال ءبىر ستاكان ناۋرىز كوجە 200-250 تەڭگەدەن ساۋدالاندى.