قاپشاعايدا ۇلىستىڭ ۇلى مەيرامى ناۋرىز مەرەكەسى تال ەگۋدەن باستالدى. تۇرعىندارعا جەتى ءتۇرلى دامنەن دايىندالعان ناۋرىز كوجە ۇسىنىلىپ، اق تىلەكتەر ايتىلىپ، ورتالىق الاڭعا جاعالاي تىگىلگەن كۇيىز ۇيلەر مەرەكەنىڭ ءسانىن كىرگىزدى.

كوكتەمنىڭ ۇلىق مەرەكەسىندە قىدىر اتا باستاعان جانە الدار كوسە، تازشا بالا سياقتى قازاق ەرتەگىلەرىنىڭ كەيىپكەرلەرى بار تەاترلاندىرىلعان قويىلىم كورسەتىلىپ، كوپبالالى انالارعا التىن، كۇمىس القالار تاپسىرىلدى. التىن القانى ارداق ءۇينالاقوۆا مەن ماريام جۇمانوۆا، كۇمىس القانى نۇرگۇل ءابيروۆا مەن ايبولعان لوكاشيەۆا تاقتى.

«قاپشاعاي قالاسى ناۋرىز مەرەكەسىنە دايىندىقتى تازالىقتان باستادى. وبلىس اكىمىنىڭ شەشىمى بويىنشا ەكى ايلىق تازالىق كۇندەرى جاريالانعان. وسىعان وراي ءبىز بىرنەشە سەنبىلىك وتكىزدىك. وعان حالىق باعاسىن بەرە جاتار»، -دەدى قاپشاعاي قالاسى اكىمىنىڭ ورىنباسارى ءىلياس سۇگىروۆ.

مەيرام «الاتاۋ اندەرى»، «قۇلان ساز» فولكلورلىق ءانسامبلى مەن جەرگىلىكتى ونەرپازدار ازىرلەگەن مەرەكەلىك كونسەرتكە ۇلاستى.

ال الماتى وبلىسىنىڭ لاباسى اۋىلدىق وكرۋگىندە ناۋرىز تويى ۇلتتىق ويىندارمەن ەرەكشەلەندى. اۋىلداعى اعايىن ات جارىستىرىپ، قوشقار كوتەرىپ، ارقان تارتىستى.

لاباسى تاۋىنىڭ ەتەگىندە كوكتەمنىڭ جارشىسى بايشەشەك گۇلدەدى. ءدال وسى جەردە ءتورت اۋىلدىڭ حالقى بىرنەشە جىلدان بەرى ۇلىستىڭ ۇلى كۇنى ناۋرىزدى تويلاپ كەلەدى. 6 مىڭعا جۋىق حالىق جينالىپ، قازان-قازان ەت اسىلىپ، ناۋرىز كوجەدەن ءدام تاتقان قوناقتاردىڭ كوڭىلىن اشىق كۇن رايى دا ەسەلەي ءتۇستى.

ءبىر جەردە ەپتى دە بىلەكتى، يىقتى دا جۇرەكتى جىگىتتەر قوشقار كوتەرىپ، گىر تاسىن لاقتىرىپ مارە-سارە بولسا، ەندى ءبىر جەردە ارقان تارتىپ، بالۋاندار بەلدەسىپ ب ا ق سىناستى.

«وسىدان وتىز جىل بۇرىن باستالعان ۇلى توي لاباسى باۋرايىندا بىرنەشە جىلدان بەرى وسىلاي اۋقىمدى ءوتىپ كەلەدى، - دەيدى مادەنيەت جانە سپورت سالاسىنىڭ ارداگەرى باقىت شەڭگەلبايەۆ.  

ول وسى جەردە 30 جىل بۇرىن ناۋرىزدى اتاپ وتكەن جانداردىڭ ءبىرى. زەينەتكەردىڭ ايتۋىنشا، 1988 جىلى كوشە-كوشە بولىپ جينالىپ، ۇيىمشىلدىق تانىتىپ اتاپ وتكەن. ءقازىر دە سول اۋىزبىرلىكتىڭ ارقاسىندا دۇبىرلەتىپ توي ءوتىپ جاتىر.

قىستان امان شىققان اۋىل جۇرتىنىڭ بۇل تويدا اسىعا كۇتكەنى - ات جارىسى. حالىق توپ بايگە مەن تاي جارىس، الامان بايگەنى كورىپ كوڭىل تويدىردى. جانكۇيەر بولىپ قيقۋلاپ، شاباندوزداردى دەمەدى. تەڭگە ءىلۋ مەن قىز قۋۋ ويىندارى دا وتە قىزىقتى ءوتتى. شاباندوز قىزدىڭ مىڭگەن تۇلپارى دۇرىس شاپپاي جىگىت جىلدام قۋىپ جەتىپ الدى. ال بويجەتكەننىڭ اتى اياقتان شالىنىپ، يەسىن قۇلاتىپ الدى. سونداي-اق تەڭگە ىلۋدە دە ءبىر ازامات مىنگەن اتىنان ءبىر قۇلاپ تۇردى. ابىروي بولعاندا شاباندوزدار دا، جىلقى دا ءدىن امان.

اۋىلداعى ناۋرىز تويىندا بايگەدە وزا شاپقاندار ولجالى بولدى. قارجىلاي جانە ءتورت تۇلىك مالداي جۇلدەلەرىن قانجىعالارىنا بايلادى. ۇلىستىڭ ۇلى كۇنىندە ءبىر بىرىمەن قيماي تارقاسقان اعايىندى ەندى كوكتەمنىڭ دالا جۇمىستارى كۇتۋدە.