وڭىرىمىزدەگى  ساپالى ءبىلىم مەن سانالى تاربيە بەرۋ جايىن تالقىلاعان القالى جيىن وبلىس اكىمىنىڭ ورىنباسارى جاقسىلىق وماردىڭ توراعالىعىمەن ءوتتى. تالدىقورعان پوليتەحنيكالىق كوللەدجىندە وتكەن جيىنعا ءبىلىم باسقارماسىنىڭ قىزمەتكەرلەرى، اۋدان، قالا اكىمدەرىنىڭ ورىنباسارلارى، ءبىلىم ءبولىمى باسشىلارى مەن مەكتەپ ديرەكتورلارى قاتىستى.

وبلىسىمىزدا جىل سايىن  ونداعان ءبىلىم ورداسى پايدالانۋعا بەرىلىپ، جەتكىنشەكتەردىڭ الاڭسىز ءبىلىم الۋىنا جاعداي جاسالىپ وتىر. الايدا، ءبىلىم ساپاسى كوڭىل كونشىتپەي وتىر. سالادا  قوردالانعان ماسەلە كوپ.

كەڭەستە وبلىستىق ءبىلىم باسقارماسىنىڭ باسشىسى داۋرەن ءجۇنىسوۆ ءبىلىم ساپاسىن جاقسارتۋ، ۇلتتىق ءبىرىڭعاي تەستىلەۋگە دايىندىق تۋراسىندا بايانداما جاسادى.

وبلىس اكىمىنىڭ ورىنباسارى ج. ومار  وتكەن جىلعى  ءبىلىم سىناعىندا تومەن ناتيجە كورسەتكەن  جامبىل، پانفيلوۆ، كەربۇلاق اۋداندارىنىڭ ءبىلىم ءبولىمىنىڭ باسشىلارىن جانە مەكتەپ ديرەكتورلارىن ورىندارىنان تۇرعىزىپ، ماسەلەنىڭ ءمان-جايىن سۇرادى. سونداي-اق، ەڭ ناشار ءبىلىم  دەڭگەيىن  كورسەتىپ وتىرعان  بەس بىردەي  مەكتەپ ديرەكتورلارىن جۇمىستان بوساتۋدى دا تاپسىردى.

مۇنان ءارى وبلىستىق ءبىلىم باسقارماسى باسشىسىنىڭ ورىنباسارى  ج. سۇلەيمەنوۆا  جاسوسپىرىمدەر اراسىنداعى قىلمىستى تىلگە تيەك ەتتى.  ەڭ اۋىرى- مەكتەپ قابىرعاسىندا  ءبىلىم الىپ جۇرگەن قىزداردىڭ جۇكتى بولۋى. وبلىستىق دەنساۋلىق ساقتاۋ باسقارماسىنىڭ مالىمەتىنشە، بۇگىندە 221 ءجاسوسپىرىم قىز جۇكتىلىك بويىنشا تىركەۋگە الىنعان. وسى بويىنشا اۋدان، قالا اكىمدەرىنىڭ ورىنباسارلارى مەن ءبىلىم ءبولىمىنىڭ باسشىلارىنان سۇراۋ العان وبلىس اكىمىنىڭ ورىنباسارىن  كوپشىلىگىنىڭ مۇنداي دەرەكپەن تانىس بولماۋى قىنجىلتتى.

القالى كەڭەستە وبلىستىق ءبىلىم ساپاسىن باقىلاۋ دەپارتامەنتىنىڭ ديرەكتورى س. دوسماتوۆانىڭ دا ەسەبى تىڭدالدى. تەكسەرۋ بارىسىندا باستاۋىش سىنىپ وقۋشىلارىنىڭ ءبىلىم دەڭگەيىنىڭ  تومەندىگى انىقتالعان. 26 مەكتەپتىڭ 19-ىندا قورىتىندى باعالاۋ سايكەسسىزدىگى بايقالعان. بۇل دەگەن باعانى كوتەرمەلەپ قويۋ، «التىن بەلگىگە» ۇمىتكەر ەمەس وقۋشىلاردى نەگىزسىز جەتەلەۋ ءتارىزدى جايتتار ورىن العان.