ۇلىستىڭ ۇلى كۇنى — ءاز ناۋرىز مەرەكەسى ەلىمىزدىڭ ءار تۇكپىرىندە تويلانىپ جاتىر. وسى ءبىر ايتۋلى مەيرامدى قالامگەرلەر قاۋىمى دا ەرەكشە ىقىلاسپەن قارسى الدى دەپ جازادى Qamshy.kz اقپارات اگەنتتىگى. قازاقستان جازۋشىلار وداعى ۇيىمداستىرعان ناۋرىز تويى اراعا بىرنەشە جىل ءۇزىلىس سالىپ، قايتا جاڭعىرىپ وتىر.
مەرەكە كۇنى جازۋشىلار وداعىنىڭ عيماراتى الدىنا ارنايى كيىز ۇيلەر تىگىلىپ، ناۋرىز كوجە ازىرلەنىپ، ۇلتتىق مەيرام دۋمانى ايرىقشا سالتاناتپەن ءوتتى.
قازاقستان جازۋشىلار وداعى باسقارماسىنىڭ ءتوراعاسى، قازاقستان رەسپۋبليكاسى مەملەكەتتىك سىيلىعىنىڭ يەگەرى، اقىن ۇلىقبەك ەسداۋلەت مەرەكەلىك شارانى اشىپ، قۇتتىقتاۋ ءسوز سويلەدى. جينالعان جۇرتشىلىققا ىزگى تىلەگىن ايتىپ، جاڭا جىلدىڭ جاقسى جاڭالىقتارعا تولى بولۋىنا تىلەكتەستىك ءبىلدىردى.
قازاقستاننىڭ حالىق جازۋشىسى قابدەش ءجۇمادىلوۆ اقساقالدار اتىنان ءسوز الىپ، باتاسىن بەردى.
كەش باراسىندا اقىندار قاۋىمى ولەڭ وقىپ، جىردان شاشۋ شاشتى. مارالتاي رايىمبەك ۇلى، امانعازى كارىپجان، ەرلان ءجۇنىس باستاعان اقىنداردىڭ ولەڭ-جىرى كەش كوركىن قىزدىردى.
ءبىرقاتار جازۋشىلارعا قازاقستان رەسپۋبليكاسىنىڭ مادەنيەت جانە سپورت ءمينيسترى ارىستانبەك مۇحامەدي ۇلىنىڭ قۇتتىقتاۋى تابىس ەتىلدى.
قازاقستان جازۋشىلار وداعىنىڭ جاڭا باسشىسى ۇلىقبەك ەسداۋلەت جازۋشىلار وداعىندا ابىرويلى ەڭبەك ەتىپ، ەرەكشە كوزگە تۇسكەن ءبىرقاتار قىزمەتكەردى العىس حاتپەن ماراپاتتادى.
«اق جاۋىن» مەملەكەتتىك كامەرالىق وركەسترى شىمىلدىعىن تۇرگەن ناۋرىز تويىندا ءانشى، كومپازيتور قادىرعالي كوبەنتاي باستاعان ونەر يەلەرى اندەرىن تارتۋ ەتتى.
قوناقتار جازۋشىلار وداعىنىڭ عيماراتى الدىندا تىگىلگەن كيىز ۇيلەرگە ايالداپ، ناۋرىز كوجە ءىشىپ، ارنايى جايىلعان داستارحاننان ءدام تاتتى.
ناۋرىز تويىنا جينالعان اعايىننىڭ مەرەيى تاسىپ، اق تىلەگىن اقتارىپ، مەرەكەنى ەرەكشە قۋانىشپەن وتكىزدى.
