باقتىباي جولبارىس ۇلى اتىنداعى№18 ورتا مەكتەپ – ليسەيىندە ەلباسى ن.نازاربايەۆتىڭ «تاۋەلسىزدىك ءداۋىرى» اتتى كىتابى بويىنشا وقىرماندار كونفەرەنسياسى ءوتتى. ەلباسىنىڭ ەل  تاريحى مەن ونىڭ ەرتەڭىنە دەگەن كوزقاراسىنىڭ بولاشاق ءۇشىن تاعىلىمدى تاريح ەكەنىن وقىرماندارعا ۇعىندىرۋ، جەتكىزۋ ماقساتىن كوزدەگەن شارا  وقۋشىلاردىڭ  قىزىعۋشىلىعىن تۋعىزدى.

مەكتەپ كىتاپحاناشىسى ماريا  بوتايەۆا   كىرىسپە سوزىندە: « بۇگىن سىزدەرمەن ۇلكەن تاريحي ەڭبەكتىڭ تالقىلاۋىن وتكىزبەكپىز. ول ەڭبەك – ەلباسىنىڭ «تاۋەلسىزدىك ءداۋىرى» كىتابى. بۇل  كىتاپ تاريحي پۋبليسيستيكا  جانرىندا جازىلعان، وندا ەلىمىزدىڭ تاريحىنىڭ جاڭا بەتتەرى  مەن ونىڭ ەرتەڭىنە دەگەن كوزقاراسى باياندالعان.  تاۋەلسىز مەملەكەتىمىزدىڭ  26 جىلدىق قالىپتاسۋ كەزەڭدەرى سارالانعان. ءسوز باسىندا پرەزيدەنت: «بۇل كىتاپ مەنىڭ ۇلى قولداۋشىم، كەمەل كەلەشەگىنە ءوزىنىڭ قازاقستاندىق جولىمەن قارىشتاعان جاسامپاز حالقىما ارنالادى» دەپ كىتاپتىڭ مازمۇنىن ايقىنداپ بەرەدى،-دەدى.

        كىتاپتا «قازاقستاندىق دامۋ ۇلگىسىنىڭ» تابيعاتى مەن ونىڭ ەۆوليۋسياسى باستى ۇستانىمدارى مەن قوزعاۋشى كۇشتەرى سارالانعان. قازاقستاندى جاڭعىرتۋدىڭ ءۇش تولقىنى كەڭىنەن اشىلىپ كورسەتىلگەن. «ءبىرىنشى جانە ەكىنشى جاڭعىرۋ اياسىندا توتاليتارلىق جۇيەدەن تۇبەگەيلى اجىراپ، نارىقتىق ەكونوميكانى قۇرۋ جانە باسەكەگە بارىنشا قابىلەتتى ەلۋ ەلدىڭ قاتارىنا قوسىلۋ مىندەتى مەرزىمىنەن بۇرىن ورىندالدى. ءۇشىنشى جاڭعىرۋدىڭ ماقساتى ەلىمىزدى قالىپتاسقان جاڭا جاھاندىق  احۋال جاعدايىندا جاڭعىرتا وتىرىپ، الەمدەگى ەڭ  وركەندى 30 مەملەكەتتىڭ قاتارىنا قوسۋ ەكەندىگى باياندالعان.

«تاۋەلسىزدىك ءداۋىرى» وتاندىق جانە شەتەلدىك قالىڭ وقىرمان قاۋىمدى قىزىقتىرار تۋىندى.كىتاپ ەلىمىزدىڭ جاڭا تاريحىن تۇتاس قامتىعان، مازمۇنى اسا باي 4 بولىمنەن تۇرادى.  تاريح ءپانىنىڭ ءمۇعالىمى گۇلنار نۇراحمەتوۆا كىتاپ  بولىمدەرى بويىنشا وقىرماندارعا ءتۇسىندىرىپ بەردى. بۇدان كەيىن وقۋشىلار ءوز ويلارىمەن ءبولىستى.

مەكتەپ ديرەكتورىنىڭ  عىلىمي-ادىستەمەلىك جۇمىستارى جونىندەگى ورىنباسارى   بيعايشا قاۋمەتوۆا: «تاۋەلسىزدىك ءداۋىرى»- ءاربىر  ازاماتىمىزدىڭ  تاعدىرى تۋرالى جازىلعان كىتاپ. مۇندا بارلىق قازاقستاندىقتاردىڭ شەجىرەسى مەن تاريحى قامتىلعان. سول سەبەپتى بولاشاقتا بۇل كىتاپ  جاستار ءۇشىن تەرەڭ ءبىلىم الاتىن وقۋلىققا اينالۋى ءتيىس.  ەگەمەندى ەل بولىپ، «تاۋەلسىزدىكتىڭ كوك بايراعىن كوتەرگەن ءسات – قازاقستاننىڭ ءار ازاماتى ءۇشىن قۋانىش،تاريحتىڭ  ۇلكەن بەتبۇرىسى بولعانى انىق.  «ادام تاعدىرى  وتانىمەن تاعدىرلاس»- دەيدى ەلباسى.  «قازاقستاندى جوعارى  دامىعان مەملەكەتكە اينالدىراتىن  ازات ويلى جاڭاشىل دا جاسامپاز ازاماتتار. ول ءۇشىن اركىم جان – جاقتى جانە كەمەل  بىلىمگە دەن قويىپ، ءوزىن – ءوزى تولاسسىز جەتىلدىرۋدى ءومىر سالتىنا اينالدىرۋى قاجەت» — دەپ كونفەرەنسيانى قورىتىندىلادى.