وبلىستىق «جەتىسۋ» تەلەارناسىنىڭ ءتول ءونىمى «ءان شىرقايىق» باعدارلاماسىنىڭ ەكى جىلدىق مەرەيتويىنا وراي اتالمىش ارنا ۇجىمى قايىرىمدىلىق كەش وتكىزدى.

ءوڭىرىمىز قاشاندا جىلاعاننىڭ كوز جاسىن ءسۇرتىپ، جىعىلعانعا دەم بەرىپ، قينالعانعا قول ۇشىن سوزا بىلەتىن جومارت جاندارعا تولى. جەتىسۋ جۇرتشىلىعى بۇل جولى دا وسى قالپىنان اينىماي سۇيەك قاڭقاسىنىڭ قاتەرلى ىسىگىنە شالدىققان ازامات راxىمبەكتىڭ دەرتىنە بەي-جاي قاراماي، بالاقايدىڭ ەمىنە قاجەتتى قاراجاتتىڭ ءبىر بولىگىن جينادى. الاڭسىز اسىر سالار بالعىن بالالىق شاعىن ءۇي مەن اۋرۋxانا اراسىندا وتكىزىپ جۇرگەن قارشاداي بالانىڭ «ءومىر سۇرەم» دەپ اۋىر دەرتپەن كۇرەسۋى كىم-كىمنىڭ دە جۇرەگىن سىزداتقانى ءسوزسىز. ءيا، ول وسىناۋ ۋاقىتشا توبەدە ۇيىرىلگەن قارا بۇلتتىڭ ءبىر كۇنى سەيىلەرىنە، ۋايىمسىز، قورقىنىشسىز شۇعىلالى اق تاڭنىڭ اتارىنا سەنەدى. ءبىر وتباسىنىڭ ءىزىن جالعاستىرۋشى ۇرپاقتى دۇنيەگە اكەلگەن انا جۇرەگى دە ءۇمىت ساۋلەسىنىڭ سونبەيتىنىن سەزەدى.

قايىرىمدىلىق  شاراسىنا ايماعىمىزدىڭ، سونىمەن قاتار، الىپ شاhار الماتىدان ارنايى كەلگەن ونەرپازدار دا ءوز ۇلەستەرىن قوستى. دارىبايەۆتار وتباسىلىق ءانسامبلى، ءلاززات بايىربەكوۆا، ەسەت ءسادۋاقاسوۆ، ەستاي الىكەيەۆ سىندى ەسترادا جۇلدىزدارى اسەم اننەن شاشۋ شاشتى. بيلەتتەن تۇسكەن 380 مىڭ، «قايىرىمدىلىق جاشىگىنە» جينالعان، سونداي-اق،  جۇرەگى جومارت كاسىپكەرلەر ۇسىنعان قاراجات ازاماتتىڭ اناسىنىڭ قولىنا تابىستالدى.