الماتى وبلىسىندا جاۋىن-شاشىن مەن ەرىگەن قار سۋى كۇرە جولدار ارقىلى تاسىپ، ۇيلەردى باسۋدا. ءبىر مىڭ ادام ءقاۋىپسىز جەرگە كوشىرىلدى.

الماتى وبلىستىق توتەنشە جاعدايلار دەپارتامەنتىنىڭ باسپا ءسوز قىزمەتىنەن ءمالىم ەتكەندەي، 27 اقپان كۇنى سۋ باسۋ قاۋپىنە بايلانىستى تالعار اۋدانىنىڭ تۇزدىباستاۋ اۋىلىندا 250 ۇيدەن 1 مىڭ ادام ەۆاكۋاسيالاندى. حالىقتى ءقاۋىپسىز جەرگە كوشىرۋمەن جەرگىلىكتى اتقارۋشى ورگان (25 جۇمىسشى، 7 تەحنيكا)، توتەنشە جاعدايلار دەپارتامەنتى (17 قىزمەتكەر، 3 تەحنيكا)، «قازسەلقورعانىس» مەملەكەتتىك باسقارماسى (4 قىزمەتكەر، 1 تەحنيكا) جانە اۋداندىق ىشكى ىستەر ءبولىمى (18 قىزمەتكەر، 6 تەحنيكا) اينالىستى. «7 اۆتوبۋس جۇمىلدىرىلدى، تالعار قالاسىندا ەۆاكۋاسيالىق پۋنكتتەر دايىندالدى (№13 جانە 31 مەكتەپتەر، ەكونوميكالىق كوللەدج، مەديسينالىق كوللەدج). 28 اقپان كۇنى ساعات 00.45-تە ەۆاكۋاسيالىق شارالار اياقتالدى»، - دەلىنگەن تجد اقپاراتىندا.

اتاپ وتىلگەندەي، اۋىل تۇرعىندارى تۋىس-تۋعاندارىنا كەتتى.

سونداي-اق تجد اقپاراتىنا سايكەس، 27 اقپان كۇنى رەسپۋبليكالىق ماڭىزى بار 6 كۇرە جول ارقىلى سۋ تاسىعان. قوزعالىس شەكتەلمەگەن. قازىرگى ۋاقىتتا «قازاقاۆتوجول» رمك سۋدى بۇرۋ جانە قۇبىرلى وتكەلدەردى تازالاۋ جۇمىستارىن جۇرگىزۋدە.

اتاپ ايتقاندا، سۋ تاسقىنىنىڭ سالدارىن جويۋ جۇمىستارى جامبىل اۋدانى، «الماتى-تاشكەنت» رەسپۋبليكالىق ماڭىزى بار تاسجولىنىڭ 134-شاقىرىمىندا، ەڭبەكشىقازاق اۋدانى، «الماتى-كوكپەك-كوكتال» رەسپۋبليكالىق اۆتوجولىنىڭ 30-شاقىرىمىندا، تالعار اۋدانى، «الماتى-تالعار» رەسپۋبليكالىق اۆتوموبيل جولىنىڭ 64-شاقىرىمىندا، قاراساي اۋدانى، «الماتى-جاندوسوۆ» رەسپۋبليكالىق تاسجولىنىڭ 22، 25 جانە 43ء-ىنشى شاقىرىم ارالىقتارىندا جۇرگىزىلۋدە.

بۇعان دەيىن حابارلاعانىمىزداي، سۋ تاسقىنىنا بايلانىستى جامبىل اۋدانىندا توتەنشە جاعداي جاريالاندى. الماتى وبلىستىق تجد-دان ءمالىم ەتكەندەي، اۋداننىڭ قاينازار اۋىلىندا ءتورت كوشەدەگى 50 ءۇيدى سۋ الدى.

سونداي-اق 27 اقپان، كەشكى ساعات 18:15-تەگى جاعداي بويىنشا جامبىل اۋدانىنىڭ ۇزىناعاش اۋىلىنداعى باسپانا كوشەسىندە 100 اۋلانى سۋ باستى.

بۇدان بولەك، ساعات 19:32-دەگى جاعداي بويىنشا تالعار اۋدانى تالعار قالاسىنىڭ قونايەۆ كوشەسىندە ورنالاسقان جەر ءۇي تولىعىمەن قيرادى. زارداپ شەككەندەر جوق. ءۇيدىڭ تۇرعىندارى تۋىستارىنا ورنالاستىرىلدى.

«سۋ تاسقىنى بولعان جەرلەرگە توتەنشە جاعداي قىزمەتكەرلەرى مەن تەحنيكالارى جىبەرىلدى»، - دەلىنگەن تجد اقپاراتىندا.