ق ر ەڭبەك سىڭىرگەن قايراتكەرى، ءداستۇرلى ءانشى ساۋلە جانپەيىسوۆا قالامىزداعى قانابەك بايسەيىتوۆ اتىنداعى ساز كوللەدجىنىڭ بىلىمگەرلەرىمەن كەزدەسىپ، شەبەرلىك ساباعىن وتكىزدى.
ەڭ اۋەلى وركەستر قۇرامى بىرنەشە شىعارما ورىنداپ، بۇرىن-سوڭدى ەش جەردە ورىندالماعان تۋىندىنىڭ تۇساۋىن كەستى. ايتا كەتەيىك، اتالمىش وقۋ ورنى ءداستۇرلى ءان باعىتى بويىنشا ەكى جىل كولەمىندە شاكىرت تاربيەلەپ كەلەدى. ناتيجەسى كوڭىل قۋانتارلىقتاي. جاس ونەر يەلەرى تەك ەلىمىزدە عانا ەمەس، الىس-جاقىن شەت ەلدەردە ونەر كورسەتىپ، جۇلدەگەر اتانۋدا. ءبىلىم ورداسىنىڭ باسشىسى بۇل ءۇردىستى بيىلعى جىلى دا جالعاستىرۋ جوسپاردا ەكەندىگىن اتاپ ءوتتى.
كەزدەسۋگە ارنايى كەلگەن ساۋلە جانپەيىسوۆا ءداستۇرلى ءان ونەرىنىڭ كەشەگىسى مەن بۇگىنى، ءداستۇر جالعاستىعى، ۇستازدىق جولىنداعى قىزىقتى ساتتەر مەن قيىندىقتار جايلى كەڭىنەن تارقاتىپ بەردى. اڭگىمە بارىسىندا “ونەر جولىندا قيىن كەزەڭدەر كوپ كەزدەسەدى. سونىڭ بارلىعىنا توتەپ بەرە ءبىلۋ قاجەت. قانداي قىزمەت اتقارسام دا ونەرىمدى تاستاعان ەمەسپىن. سەبەبى، حالىق ەڭ اۋەلى مەنى ءانشى رەتىندە تانيدى، باعالايدى”-دەدى.
سونىمەن قاتار كوللەدج بىلىمگەرلەرىمەن شەبەرلىك ساباعىن وتكىزدى. ولاردىڭ ساحنا مادەنيەتىن مەڭگەرۋ دەڭگەيى، ءاندى ناقىشىنا كەلتىرە ورىنداۋ، دومبىرادا ويناۋ شەبەرلىكتەرىنە نازار اۋدارا وتىرىپ، بىرنەشە پايدالى كەڭەستەرىمەن ءبولىستى.
