كوركەمونەر گالەرەياسىندا  سۋرەتشى شاتتىق باتاننىڭ “بوياۋلار كۇمبىرى” اتتى جەكە شىعارماشىلىق كورمەسى ءوتتى. وندا بەينەلەۋ ونەرىندە وزىندىك قولتاڭباسى بار دارىن يەسىنىڭ 30-دان استام تۋىندىسى قويىلدى.

ۇيىمداستىرۋشىلار كورمەنى وتكىزۋدەگى ماقسات — ەگەمەندى ەلىمىزدىڭ ۇلتتىق مادەني مۇراسىن، سالت – ءداستۇر، رۋحاني بايلىعىمىزدى، قول جەتكىزگەن تولىمدى تابىستارىمىز بەن  جەتكەن جەتىستىكتەرىمىزدى كەڭىنەن ناسيحاتتاۋ دەيدى.  سۋرەتشى شىعارمالارىنىڭ نەگىزگى وزەگى – تاڭعاجايىپ تابيعاتتىڭ سۇلۋلىعى، قاراپايىم اۋىل ادامدارىنىڭ كۇندەلىكتى تىنىس-تىرشىلىگى. وسىلايشا قىلقالام شەبەرى ءومىردىڭ سان الۋان قۇبىلىستارىن قاز-قالپىندا بەينەلەيدى. ق ر سۋرەتشىلەر وداعىنىڭ مۇشەسى ش. باتان “ءبىز سۋرەت ونەرىن ۇلتتىق دەڭگەيدە باعالاۋعا ۇمتىلۋىمىز كەرەك. الىسقا بارماي-اق ءوزىمىزدىڭ سۋرەتشىلەرىمىزدىڭ كومپوزيسيالارىنان ءنار الىپ، ناعىز ونەردى تانۋعا تالپىنايىق. ءبىز ولاردى قانشالىقتى كوككە كوتەرە الساق، ءتول مادەنيەتىمىز دە سونشالىقتى بيىك بولادى. ءبىر كارتينانى سالدىڭ دەلىك.  ول جاي عانا ورىنداۋشىلىق. ءبىراق، تۋىندىعا جان ءبىتىرۋ ءۇشىن وندا سەنىڭ شىعارماشىلىق شەشىمىڭ، بوياۋىڭ، ءتۇسىڭ بولۋى شارت. ءوزىڭنىڭ كوڭىل كۇيىڭدى سول كارتيناعا بەرە الساڭ عانا ول جاندانىپ، ناعىز ونەر تۋىندىسىنا اينالادى. كارتينالارىمدا ۇلتتىق بوياۋلارعا، قانىمىزعا ءتان قانىق تۇستەرگە باسىمدىق بەرەمىن. ءار شىعارمام جانىمنىڭ ءبىر بولشەگى سياقتى. ناعىز ونەردى ساۋداعا سالۋعا بولمايدى. ول سول ءداۋىردىڭ تىنىسىن بولاشاققا جەتكىزۋشى. سۋرەتپەن تىنىستايمىن، سۋرەتپەن ءومىر سۇرەمىن. ەڭ نەگىزگى ماقساتىم — ونەر الدىنداعى تازالىقتى ساقتاۋ. كيەلى ونەردىڭ ءقادىرىن كەتىرمەۋ، تۇنىعىن لايلاماۋ” – دەيدى.