كاسىپورىن جانىنان جەڭىل ونەركاسىپ بويىنشا وقۋ ورتالىعى اشىلعان.

الماتى وبلىسى تەكەلى مونوقالاسىندا «تەكەلى بارىس» كاسىپورىنىنىڭ بازاسىندا وقۋ ورتالىعى ىسكە قوسىلدى. وندا جۇمىسسىز ازاماتتاردى تىگىن ىسىنە تەگىن وقىتىپ، مەملەكەتتىك شاكىرتاقى تولەيدى. وقۋ ورتالىعى 2017-2021 جىلدارعا ارنالعان ءونىمدى جۇمىسپەن قامتۋ جانە جاپپاي كاسىپكەرلىكتى دامىتۋ باعدارلاماسى اياسىندا جۇمىسسىزدار ءۇشىن قىسقامەرزىمدى وقىتۋ جۇرگىزۋ ماقساتىندا اشىلعان.  

ايتا كەتسەك، تەكەلى قالاسىندا ەكونوميكالىق تۇرعىدان بەلسەندى حالىق 17512 ادامدى قۇراسا، جۇمىسپەن قامتىلعان حالىقتىڭ سانى – 16629 ادامدى قۇرايدى ەكەن. سونىڭ ىشىندە: جالدامالى قىزمەتكەرلەر 11218، ءوز بەتىنشە جۇمىسپەن قامتىلعاندار 5411، جۇمىسپەن قامتۋ دەڭگەيى – 95،0 پايىز، جۇمىسسىزدىقتىڭ دەڭگەيى 5 پايىزدى قۇرايدى.

ال جۇمىسپەن قامتۋ سۇراقتارى بويىنشا جۇگىنگەندەردىڭ سانى 1253 ادام، ولاردىڭ ىشىندە جۇمىسپەن قامتىلعاندار –1066 ادامدى قۇرايدى. كەشەندى جوسپاردىڭ كورسەتكىشتەرى 12 ايدا 1478 ادام نەمەسە 109،1%-عا جەتكەن.

«تەكەلى بارىس» ج ش س باسشىسى ايگەرىم ساكەن قىزىنىڭ ايتۋىنشا، قازىرگى تاڭدا 30 تەكەلىلىك ورتالىقتا جاڭا ماماندىق الۋعا نيەت ءبىلدىرىپ وتىرعاندار بار ەكەن.

«وقۋ ورتالىعىندا ساباقتار مەن تاجىريبەلىك ساباقتار وتكىزۋگە ارنالعان بولمەلەر بار. 13 تىگىن ماشيناسى، قاجەتتى ماتالار مەن ماتەريالداردى ساتىپ الدىق. وقۋشىلار ءبىلىم الۋمەن بىرگە تاپسىرىس الىپ، ونى ورىنداپ وتىرادى. كۋرستىڭ سوڭىنا قاراي قاتىسۋشىلاردىڭ كەيبىرىن كومپانيامىزعا جۇمىسقا الساق، ال قالعانى ءوز كاسىپتەرىن اشا الۋعا بىلىكتىلىكتەرى مەن مۇمكىندىكتەرى جەتەدى دەگەن سەنىمدىمىز»، - دەيدى ايگەرىم سارسەن قىزى.

«تەكەلى بارىس» ج ش س وقۋ ورتالىعى تەكەلىدە كاسىپورىن بازاسىندا اشىلىپ، وڭىرلىك كاسىپكەرلەر پالاتاسى جانىنداعى وقۋ ورتالىقتارىنىڭ رەەسترىنە ەنگەن العاشقى مەكەمە بولىپ تابىلادى.  

كاسىپكەرلەر پالاتاسىنىڭ تەكەلى قالالىق فيليالىنىڭ ديرەكتورى تۇرىسبەك ءجۇمادىلوۆتىڭ ايتۋىنشا، الداعى ۋاقىتتا تەكەلى تاۋ-كەن وڭدەۋ كەشەنىندە دە وقۋ ورتالىعىن اشۋ الداعى ۋاقىتتا  جوسپارلانىپ وتىر ەكەن. ول جەردە مەتتاللۋرگيا سالاسىنا قاجەتتى مامانداردى دايىندايتىن بولادى.

ايتا كەتسەك، اعىمداعى جىلى الماتى وبلىسىندا ءونىمدى جۇمىسپەن قامتۋ جانە جاپپاي كاسىپكەرلىكتى دامىتۋ باعدارلاماسى اياسىنداعى قىسقامەرزىمدى ءبىلىم بەرۋ كۋرسى بارىسىندا 500 ادامدى جاڭا ماماندىقتار بويىنشا وقىتۋ جوسپارلانۋدا.

وبلىستاعى كاسىپكەرلەر پالاتاسى حالىقتى جاپپاي جۇمىسپەن قامتۋعا بار كۇشىن جۇمىلدىرۋدا.