الماتى وبلىسى ىلە اۋدانىنىڭ اكىمدىگى 28،8 ملن تەڭگەگە بەلارۋستەن مەكتەپ پارتالارىنا الدىرتۋعا نيەتتى ەكەنىن ايتتى، دەپ جازادى Qamshy.kz اقپارات اگەنتتىگى. بۇل تۋرالى تالدىقورعاندا وتكەن وتاندىق تاۋار وندىرۋشىلەرگە قولداۋ كورسەتۋ شەڭبەرىندە ساتىپ الۋ سالاسىنداعى جۇمىس كوميسسياسىنىڭ كەزەكتى وتىرىسىندا ءمالىم بولدى.

كوميسسيا حاتشىسى، الماتى وبلىسى كاسىپكەرلەر پالاتاسى ديرەكتورىنىڭ قۇقىقتىق ماسەلەلەرى بويىنشا ورىنباسارى قانات قابدييەۆتىڭ ايتۋىنشا، 2017 جىلدىڭ تامىزىندا ىلە اۋدانىنىڭ ءبىلىم ءبولىمى «تەمير گراند» جشس-مەن مەكتەپ پارتالارىن جەتكىزۋ بويىنشا كەلىسىم-شارتقا قول قويعان.

ايتا كەتسەك، العاشىندا اكىمدىك 19،7 ملن تەڭگەگە 1376 دانا تاۋارعا تاپسىرىس بەرگەن، كوميسسيانىڭ كەزەكتى وترىسىندا بۇل كورسەتكىشتىڭ سانىن ارتتىرۋعا شەشىم قابىلداندى.

«ءىشىنارا جۇرگىزىلگەن ساراپتاما بويىنشا، تەحنيكالىق سيپاتتاماسى مەن شارتتار بويىنشا تاۋاردى جەتكىزۋ مەرزىمى كەلىسىمگە قول قويىلعان كۇننەن باستاپ 20 كۇن رەتىندە انىقتالعان. ياعني، 2017 جىلدىڭ 12 قىركۇيەگىنەن كەشىكتىرمەي قول قويىلۋ كەرەك. الايدا 26 قىركۇيەك كۇنى قوسىمشا كەلىسىم دايىندالىپ، كەلىسىم-شارتتىڭ جالپى سوماسى 28 863 296 تەڭگەگە دەيىن ارتقان. ج ش س تاۋاردى بەلارۋس رەسپۋبليكاسىن جەتكىزگەن. قازاقستاننىڭ جيھاز وندىرۋشىلەرى جانە اعاش وڭدەۋ ونەركاسىبى قاۋىمداستىعىنىڭ مالىمەتىنشە ەلىمىزدە جيھاز شىعاراتىن 50 شاقتى كاسىپورىن بار ەكەن»، - دەدى قانات قابدييەۆ.

قانات قابدييەۆ 20 كۇن رەتىندە بەكىتىلگەن تاپسىرىستى جەتكىزۋ مەرزىمىنە نازار اۋدارۋ قاجەتتىگىن ايتتى.

«جيھاز شىعارۋمەن اينالىساتىن جەرگىلىكتى كاسىپكەرلەر بۇل ۋاقىت ىشىندە وسىنشاما كولەمدەگى مەكتەپ پارتاسىن جەتكىزۋ مۇمكىن ەمەستىگىن ايتادى»، - دەدى قانات قابدييەۆ.

ىلە اۋدانى اكىمدىگىنىڭ وكىلى تاراپىنان جيىنعا قاتىسپاۋ سەبەبىنەن اتالمىش دەرەك بويىنشا ەش تۇسىنىكتەمە بەرىلمەدى.

جالپى مەملەكەتتىك ساتىپ الۋ ۆەب-پورتالىنداعى مالىمەت بويىنشا 2017 جىلى ىلە اۋدانىنداعى بيۋدجەتتىك باعدارلامالاردىڭ 30 اكىمشىسى 13،339 ملرد تەڭگەگە 1164 كەلىسىم-شارت جاساعان.

وتىرىس بارىسىندا قاراساي اۋدانى جانە دەنساۋلىق ساقتاۋ باسقارماسىنىڭ كاسىپكەرلەردى ساتىپ الۋ سالاسىندا قولداۋ ماسەلەلەرى بويىنشا اتقارعان جۇمىس قورىتىندىلارى تىڭدالدى. ايتا كەتەيىك، قاراساي اۋدانى وبلىس بويىنشا ساتىپ الۋداعى جەرگىلىكتى قۇرام ۇلەسى بويىنشا 74%ء-تى كورسەتىپ، جوعارى كورسەتكىشكە يە بولعان. اكىمدىكتەگىلەر اتالمىش كورسەتكىشتى جاقسارتۋ بويىنشا شارالار جالعاساتىنىن ايتتى. جالپى اۋداندا 2018 جىلعا ساتىپ الۋ جۇرگىزۋ ءۇشىن 4،8 ملرد تەڭگە بولىنگەن.

دەنساۋلىق ساقتاۋ باسقارماسىنىڭ اقپاراتىنشا، 2017 جىلى مەملەكەتتىك ساتىپ الۋ سەگىز نىسان بويىنشا 1،2 ملرد تەڭگەدەن استام سوماعا وتكىزىلگەن. وتاندىق وندىرۋشىلەردى قولداۋ اياسىندا جەتى كاسىپورىنمەن 120-دان استام دارىلىك زاتتار مەن مەديسينالىق ماقساتتاعى ونىمدەر بويىنشا جەتى ۇزاقمەرزىمدى كەلىسىم-شارت جاسالعان. ولاردىڭ قاتارىندا «اكسەل ي ا» ج ش س، «دولچە» ج ش س،  «المەرەك» ج ش س، «ابدي يبراحيم گلوبال فارم» ج ش س، «ەلەاس» ج ش س، «نوبەل» ج ش س، «كەلۋن-كازفارم» ج ش س.

سونىمەن بىرگە اكىمدىكتەر مەن وبلىستىق باسقارمالارعا وتكىزىلەتىن مەملەكەتتىك ساتىپ الۋ جونىندەگى اقپاراتتى ينتەرنەت-رەسۋرستارعا جاريالاۋ جانە ساتىپ الۋ اكىمشىلەرىنە ۇسىنىس رەتىندە جولداناتىن وتاندىق تاۋار وندىرۋشىلەر رەەسترىن ازىرلەۋ مەن ونى اكىمدىك سايتتارىن ورنالاستىرۋ جونىندە ۇسىنىستار بەرىلدى.

ايتا كەتەيىك، وتاندىق تاۋار وندىرۋشىلەرگە قولداۋ كورسەتۋ شەڭبەرىندە ساتىپ الۋ سالاسىنداعى جۇمىس كوميسسياسىنىڭ وتىرىستارىن تالدىقورعان قالاسىندا اپتا سايىن وتكىزىپ، وندا اكىمدىكتەر مەن سالالىق باسقارمالاردىڭ ساتىپ الۋ سالاسى بويىنشا جۇمىستاردى تىڭداۋ جوسپارلانعان. وتكەن وتىرىستا تالدىقورعان قالاسى جانە قاراتال اۋدانىنىڭ اكىمدىكتەرىنىڭ، وبلىستىق قۇرىلىس باسقارماسىنىڭ ەسەپتەرى تىڭدالعان بولاتىن.