تاشكەنت-شىمكەنت ۆەلوشەرۋىنىڭ قاتىسۋشىلارى 130 كم قاشىقتىقتى ارتقا تاستاپ شىمكەنت قالاسىنا كەلدى، دەپ حابارلايدى Qamshy.kz اقپارات اگەنتتىگى sputniknews.kz سايتىنىڭ دەرەگىن نەگىزگە الا وتىرىپ. 

تاڭعى ساعات 10-دا تاشكەنتتىڭ ورتالىعىنان ۆەلوشەرۋ باستاۋ الدى. ۆەلوسيپەدشىلەر «جىبەك جولى» كەدەندىك بەكەتىنە جەتىپ «جاسىل ءدالىز» ارقىلى ءوتتى. قازاقستان جەرىندە جۇرەك جالعاپ العان قاتىسۋشىلار، الداعى  100 كم قاشىقتىقتى ءجۇرىپ ءوتۋدى ماقسات ەتتى. اتالعان ۆەلوشەرۋگە قاتىسۋعا قازاقستان جانە وزبەكستان ازاماتتارى ءوتىنىش بىلدىرگەن. وزبەكستانداعى باق-تىڭ حابارلاۋىنشا، ولاردىڭ اراسىندا قازاقستاننىڭ وزبەكستانداعى ەلشىسى ەرىك وتەمبايەۆ تا بولدى.

قازاقستاننان الماتى، استانا، تاراز جانە شىمكەنت قالالارىنىڭ تۇرعىندارى قاتىستى. قاتىسۋشىلار اراسىندا ەڭ ۇلكەنىنىڭ جاسى – 60 جاستا بولسا، ەڭ كىشكەنتايى — 11 جاستا.

ايتا  كەتەيىك، قاتىسۋشىلاردىڭ بارلىعى كاسىپقوي ۆەلوسيپەدشىلەر ەمەس. ولاردىڭ بارلىعىنا ارنايى جاعداي جاسالىپ، ءاربىر 25 شاقىرىم سايىن جۇرەك جالعايتىن تاعامدار ۇيىمداستىرىلعان شاتىرلار ورنالاستىرىلعان بولاتىن.

ۆەلوشەرۋگە قاتىسۋشىلار 130 شاقىرىمدى  باسىپ ءوتىپ، كەشكى 18:00-دە شىمكەنت قالاسىنىڭ ورتالىعىنا كەلىپ جەتتى. ولاردى كۇتىپ العان وڭتۇستىكقازاقستاندىقتار زور قوشەمەتپەن قارسى الدى.