اعىمداعى  جىلدىڭ 22 اقپانىندا ترانسپارەنسي ينتەرنەشنل ۇيىمى وتكەن  جىلعى سىبايلاس جەمقورلىقتى ءتۇيسىنۋ يندەكسى قورىتىندىسىن جاريالاعان بولاتىن. وندا قازاقستان 31 ۇپايمەن 180 ەلدىڭ ىشىندە 122 ورىنعا تابان تىرەپ، بۇرىنعى جىلدارمەن سالىستىرعاندا ءبىراز جاقسارا باستاعانىن اڭعارتقان. وسىعان بايلانىستى، تالدىقورعاندا وڭىرلىك كوممۋنيكاسيالار قىزمەتىنىڭ ۇيىمداستىرۋىمەن «ارنايى مونيتورينگتەۋ توبىنىڭ جۇمىسى جانە قازاقستاننىڭ ترانسپارەنسي  ينتەرنەشنل رەيتينگىندەگى باعالانۋى» تاقىرىبىندا ءباسپاسوز-ماسليحاتى ءوتتى.

ايماقتاعى قوعام بەلسەندىلەرى مەن ب ا ق وكىلدەرى قاتىسقان باسقوسۋدا ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ الماتى وبلىسى بويىنشا دەپارتامەنتى باسشىسىنىڭ ورىنباسارى دانيار سابىربايەۆ بۇل باعىتتا اتقارىلىپ جاتقان جۇمىستار جايىن كەڭىنەن ءتۇسىندىرىپ شىقتى. سونداي-اق ول: «الماتى وبلىسىنىڭ ارنايى مونيتورينگتەۋ توبىنىڭ ىشىنە «نۇر وتان» پارتياسىنىڭ، قوعامدىق ۇيىمداردىڭ، ءبىلىم سالاسى، ازاماتتىق اليانس، بيزنەس وكىلدەرى جانە وبلىس اكىمدىگىنىڭ جانە دەپارتامەنت قىزمەتكەرلەرى كىردى. اتالعان توپتىڭ نەگىزگى ماقساتى – ق ر سىبايلاس جەمقورلىققا قارسى 2015-2025 جىلدارعا ارنالعان ستراتەگياسىنىڭ اتقارۋىنىڭ باقىلاۋ جانە وعان سىرتقى تالداۋ جۇرگىزۋ. توپ  مۇشەلەرى قوعامدىق باقىلاۋ اياسىندا الماتى وبلىسى قۇرىلىس وبەكتىلەرىنىڭ ساپاسىن مونيتورينگتەۋ جۇمىستارىن اتقاردى. ماسەلەن، وتكەن جىلى ارنايى مونيتورينگتەۋ توبىنىڭ 4 وتىرىسى ءوتىپ،  سونىڭ ناتيجەسىندە الماتى وبلىسىنىڭ جەرگىلىكتى اتقارۋشى ورگاندارىنا جانە ورتالىق مەملەكەتتىك ورگاندارىنا 24 ۇسىنىس بەرىلگەن. بۇگىندە بۇل توپتىڭ 2018 جىلعا ارنالعان جاڭا جوبا-جوسپارلارى دايىندالعان» – دەدى. وسىدان سوڭ ارنايى مونيتورينگتەۋ توبىنىڭ مۇشەلەرى جەكە-جەكە ءسوز الىپ، ورتاق وي ءبولىستى.