بۇگىن قازاقستان جانە وزبەكستان مۇسىلماندارى ءدىني باسقارمالارى تاشكەنت قالاسىندا ءوزارا ىنتىماقتاستىق تۋرالى مەموراندۋم قابىلدادى.
باس ءمۇفتي سەرىكباي قاجى ورازدىڭ وزبەكستانعا جاساعان رەسمي ساپارى بارىسىندا ەكى ەلدىڭ مۇفتيلەرى ءدىن سالاسىنداعى ۇزاقمەرزىمدى ىنتىماقتاستىقتى ورناتۋعا ارنالعان قۇجاتقا قول قويدى.
مەموراندۋم قازاقستان مەن وزبەكستان اراسىنداعى دوستىق قارىم-قاتىناستى ودان ءارى نىعايتۋدى، ەكى ەلگە ورتاق ءدىني مەكتەپتى جاڭعىرتۋدى، ءبىرىزدى ءپاتۋالار شىعارۋدى، مادەني-رۋحاني بايلانىستى ارتتىرۋدى، تاجىريبە الماسۋدى، عىلىمي جوبالاردى جۇزەگە اسىرۋدى، ءدىن قىزمەتكەرلەرىنىڭ بىلىكتىلىگىن كوتەرۋدى كوزدەيدى.
مەموراندۋم نەگىزىندە تاراپتار بىر-بىرىنە حالىقارالىق دەڭگەيدە ءوزارا كومەك پەن قولداۋ كورسەتۋگە مىندەتتەلەدى. ىنتىماقتاستىق شەڭبەرىندە ەكى ەلدىڭ بولاشاق ۇرپاعىنا پاتريوتيزم مەن بەيبىتشىلىك قۇندىلىقتارى ناسيحاتتالىپ، يسلامنىڭ رۋحاني باعا جەتپەس مۇراسى مەن مادەنيەتى دارىپتەلەدى.
اتالعان ىنتىماقتاستىق قۇرانعا، حاديستەرگە جانە حانافي مازحابىنىڭ ىلىمىنە، قازاقستان جانە وزبەكستان رەسپۋبليكاسىنىڭ حالىقارالىق مىندەتتەمەلەرى مەن ۇلتتىق زاڭنامالارىنا نەگىزدەلەدى.
سونىمەن قاتار ازاماتتاردىڭ ەكى ەل اۋماعىندا ورنالاسقان تاريحي قاسيەتتى جەرلەرگە زيارات ەتۋى قامتاماسىز ەتىلەدى.
تاراپتار بەكىتىلگەن ءدىني ءپاتۋالار نەگىزىندە ءدىني مەرەكەلەردى ھيجري جىل ساناۋى بويىنشا ءبىرىزدى وتكىزۋدى قولعا الادى.
قازاقستان مۇسىلماندارى ءدىني باسقارماسىنىڭ ءتوراعاسى سەرىكباي قاجى ورازدىڭ وزبەكستانعا جاساعان رەسمي ساپارى بارىسىندا ەكى ەلدىڭ ءدىني مەرەكەلەرىنە قاتىستى ورتاق ءپاتۋا شىعارۋ تۋرالى كەلىسىم جاسالدى.
باس ءمۇفتي سەرىكباي قاجى ساتىبالدى ۇلى مەن وزبەكستان مۇسىلماندارى ءدىني باسقارماسىنىڭ ءتوراعاسى وسمانحان قاجى اليموۆتىڭ قاتىسۋىمەن وتكەن ەكى جاقتى كەزدەسۋدە ءدىني مەرەكەلەردى بىرىزگە ءتۇسىرۋ ماسەلەسى تالقىلاندى.
رەسمي باسقوسۋدا سەرىكباي قاجى وراز قازاق-وزبەك ۇلتىنىڭ ۇستاناتىن ءمازھابى مەن ءدىني سەنىمى ءبىر ەكەنىن اتاپ ءوتىپ، ءدىني مەرەكەلەردى بىرىزگە ءتۇسىرۋ قاجەتتىگىن ءسوز ەتتى. ءوز كەزەگىندە وزبەكستان ءمۇفتيى وسمانحان اليموۆ بۇل ۇسىنىستى قولدايتىنىن مالىمدەپ، باۋىرلاس ەلدەردىڭ ءدىني سالاداعى بايلانىسىن ودان ارى نىعايتا ءتۇسۋ كەرەك ەكەنىن تىلگە تيەك ەتتى.
ەكى جاقتى كەزدەسۋ ناتيجەسىندە ورتاق مەموراندۋم قابىلداندى.
«تاراپتار ءدىني مەرەكەلەردى (ورازا، قۇربان ايت، ت.ب.) ھيجري جىل ساناۋى بويىنشا ءبىرىزدى وتكىزۋگە، زاماناۋي وزەكتى ماسەلەلەردە ورتاق ءپاتۋا، شەشىم شىعارۋعا مىندەتتەلەدى»، – دەلىنگەن ءوزارا ىنتىماقتاستىق تۋرالى مەموراندۋم ماتىنىندە.
«وزدەرىڭىزگە بەلگىلى، وسىعان دەيىن ءبىزدىڭ ارامىزدا ءدىني مەرەكەلەردىڭ كۇنىنە قاتىستى ايىرماشىلىقتار بولدى. وسى ولقىلىقتىڭ ورنىن تولتىرۋ ماقساتىندا وزبەكستاندىق ارىپتەستەرىمىزبەن كەلىسىم نەگىزىندە ءوزارا ىنتىماقتاستىق تۋرالى مەموراندۋم قابىلدادىق. مەموراندۋمدا كورسەتىلگەن ماسەلەلەر بويىنشا وزەكتى تاقىرىپتار اياسىندا ورتاق ءپاتۋالار مەن شەشىمدەر قابىلدايتىن بولامىز»، – دەدى باس ءمۇفتي سەرىكباي قاجى وراز وزبەكستاندىق ب ا ق وكىلدەرىنە بەرگەن سۇحباتىندا.
