ق ر ۇكىمەت باسشىسى باقىتجان ساعىنتايەۆ بۇگىنگى ۇكىمەت وتىرىسىندا رەسەيدە بولعان جانتۇرشىگەرلىك ورتكە قاتىستى ءوز پىكىرىن ءبىلدىردى، دەپ جازادى Qamshy.kz اقپارات اگەنتتىگى.

«رەسەيدىڭ كەمەروۆو قالاسىندا ۇلكەن اپات بولىپ، قايعىلى جاعداي ورىن العانى بارىمىزگە بەلگىلى. الاپات ءورتتىڭ سالدارىنان كوز جۇمعانداردىڭ كوپشىلىگى كىشكەنتاي بالالار. ءبىزدىڭ ەلباسىمىز رەسمي تۇردە رەسەي باسشىسىنا كوڭىل ايتتى. ءبىز دە بۇل توتەنشە وقيعادان ساباق الۋىمىز كەرەك. ءقازىردىڭ وزىندە بۇل ماسەلە الەۋمەتتىك جەلىلەردە وتە جوعارى دەڭگەيدە تالقىلانىپ جاتىر. بلوگەرلەر وزدەرىنىڭ باستاماسى بويىنشا ساۋدا ورتالىقتارىنا بارىپ، اپاتتىق ەسىكتەردىڭ اشىق نەمەسە جابىق تۇرعانىن تەكسەرىپ ءجۇر. سول سەبەپتى ىشكى ىستەر مينيسترلىگى، ورتكە قارسى قىزمەتتەر مەن اكىمدىكتەر بىرلەسىپ، ساۋدا ورتالىقتارىندا تەكسەرۋ وتكىزىپ، ءتيىستى شارالاردى قولعا الۋى قاجەت»، - دەپ اتاپ ءوتتى باقىتجان ساعىنتايەۆ.

ەستەرىڭىزگە سالا كەتەيىك، ماسكەۋ ۋاقىتى بويىنشا 26 ناۋرىزعا قاراعان ءتۇنى كەمەروۆو قالاسىنداعى «زيمنيايا ۆيشنيا» ساۋدا ورتالىعىنىڭ كينوتەاتر مەن بالالاردىڭ ويىن الاڭدارى ورنالاسقان ءتورتىنشى قاباتىندا ءورت شىققان بولاتىن. كۋاگەرلەردىڭ ايتۋىنشا، ءورت شىققان كەزدە دابىل بەرۋ جۇيەسى جۇمىس ىستەمەگەن ەكەن. سوڭعى دەرەكتەر بويىنشا، ءورتتىڭ سالدارىنان قۇربان بولعانداردىڭ سانى 64-كە جەتىپ، 70-كە جۋىق ادام ءىز-تۇزسىز جوعالعان. ونىڭ كوپشىلىگى – بالالار.